Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 68: Anyamata Ŵaŵi wo Angufwa ndi Kuyukiskika

Nkhani 68: Anyamata Ŵaŵi wo Angufwa ndi Kuyukiskika

ASANI mwana wafwa ndi kuyukiskika, kumbi uŵanaŵana kuti anyina angavwa wuli? Iwu angakondwa ukongwa. Kumbi asani munthu wafwa wangaŵa so ndi umoyu? Kumbi venivi vikuchitikapu?

Awona ŵanthu wo ŵe pachithuthuzi yapa. Munthurumi yo ndi mchimi Eliya. Munthukazi yo ndi choko cho chajanga mu msumba wa Zarefata ndipu mnyamata yo ndi mwana waki. Zuŵa linyaki mnyamata yo wangutama ukongwa mpaka wangufwa. Sonu Eliya wangukambiya munthukazi yo kuti: ‘Zanayu kunu mwana waku.’

Eliya we ndi choko ndi mwana waki yo wayuskika

Eliya wati wato mwana wakufwa yuwa, wangukwere nayu ku chipinda cha pachanya ndipu wangumugoneka pabedi. Ndipu wanguromba kuti: ‘Yehova, muyuskeni mwana uyu.’ Ndipu mnyamata yo wangwamba kututa. Sonu wati wayuka, Eliya wangusika nayu pasi ndi kukambiya anyina kuti: ‘Wona, mwana waku ngwamoyu.’ Ichi ndichu chifukwa chaki anyina awoneka akukondwa ukongwa.

Mchimi munyaki wakuzirwa waku Yehova wenga Elisha. Iyu wawovyanga Eliya. Kweni nyengu yinyaki, Yehova wangugwiriskiya nchitu Elisha kuti wachiti vakuziziswa. Zuŵa linyaki Elisha wanguluta mu msumba wa Shunemu, kweniko munthukazi munyaki wangumuchitiya vinthu vamampha. Pavuli paki, munthukazi uyu ndi murumu waki angubala mwana munthurumi.

Mwana uyu wati wakuwaku zuŵa linyaki wanguluta kumunda ndi awiski. Mwamabuchibuchi mwana yo wangwamba kuliya kuti: ‘Kotu mutu wangu kuŵaŵa!’ Ŵati afika nayu kunyumba, wangufwa. Anyina anguchita chitima ukongwa ndipu nyengu yeniyo anguluta kuchidana Elisha.

Elisha wati wafika, wangusere ku chipinda ndi mwana wakufwa yuwa. Iyu wanguromba kwaku Yehova ndi kusindamiya pa mwana wakufwa. Pati pajumpha nyengu yimanavi, liŵavu la mwana lingwamba kufunda ndipu wanguyethyemuwa kwakukwana 7. Anyina angukondwa ukongwa ŵati awona kuti mwana wawu wayuka.

Ŵanthu anandi akufwa. Ivi vichitiska kuti abali ndi abwezi ŵawu ajengi ndi chitima ukongwa. Isi tilivi nthazi zakuyuskiya akufwa. Kweni Yehova ndiyu wangaŵayuska. Kunthazi uku tisambirengi mo Yehova wazamuyuskiya ŵanthu anandi wo akufwa.

1 Ŵakaronga 17:8-24; 2 Ŵakaronga 4:8-37


Mafumbu

  • Kumbi ŵanthu ŵatatu wo ŵe pachithuthuzi mbayani, nanga nchinthu wuli cho chachitikiya mnyamata yo?
  • Kumbi Eliya wangurombanji vakukwaskana ndi mnyamata yo, nanga nchinthu wuli cho chinguchitika?
  • Zumbuwa zina la munthu yo wawovyanga Eliya.
  • Kumbi nchifukwa wuli Elisha wangudanika kuti waluti ku nyumba ya munthukazi wa ku Shunemu?
  • Kumbi Elisha wanguchitanji, nanga nchinthu wuli cho chinguchitikiya mwana yo wangufwa?
  • Nge po tawone vo Eliya ndi Elisha anguchita, kumbi Yehova we ndi nthazi wuli?

Mafumbu ngakusazgiyapu

  • Ŵerenga 1 Ŵakaronga 17:8-24.

    Kumbi kuvwiya ndipuso chivwanu chaku Eliya vingweseka wuli? (1 Ŵaka. 17:9; 19:1-4, 10)

    Kumbi nchifukwa wuli chivwanu cha choko cha ku Zarefata chenga chapade? (1 Ŵaka. 17:12-16; Luka 4:25, 26)

    Kumbi vo vinguchitikiya choko chaku Zarefata vilongo wuli uneneska wa mazu ngaku Yesu ngo ngakulembeka pa Mateyu 10:41, 42? (1 Ŵaka. 17:10-12, 17, 23, 24)

  • Ŵerenga 2 Ŵakaronga 4:8-37.

    Kumbi munthukazi wa ku Shunemu watitisambizanji pa nkhani ya kulonde alendu? (2 Ŵaka. 4:8; Luka 6:38; Ŵaro. 12:13; 1 Yoha. 3:17)

    Kumbi ndi nthowa nizi zo tingalongole wezi ku ateŵeti aku Chiuta mazuŵa nganu? (Machi. 20:35; 28:1, 2; Ŵaga. 6:9, 10; Ŵahe. 6:10)