Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 59: Chifukwa cho Davidi Wakhumbikiya Kuthaŵa

Nkhani 59: Chifukwa cho Davidi Wakhumbikiya Kuthaŵa

DAVIDI wati wabaya Goliati, Abnere mula wa asilikali a Yisraele wanguluta nayu kwaku Sauli. Sauli wangukondwa ukongwa kuwona Davidi. Ndipu wangumuŵika kuja mula wa asilikali ŵaki ndipu wangumuto kuti wakajengi ku nyumba yachifumu.

Asilikali ŵati aweku kuchirwana nkhondu ndi Afilisti, anthukazi angumba kuti: ‘Sauli wakubaya masawuzandi kweni Davidi wabaya masawuzandi nganandi ukongwa.’ Ivi vingumuchitiska sanji Sauli chifukwa ŵanthu angutumbika ukongwa Davidi kuphara Sauli. Kweni Jonafani mwana waku Sauli wengavi sanji. Iyu ndi Davidi ayanjananga ukongwa ndipu angupangana kuti ayanjanengi nyengu zosi.

Fumu Sauli waponya mkondu

Davidi wambanga umampha ukongwa zeze ndipu Sauli waziyanjanga sumu zo wambanga. Zuŵa linyaki, Sauli wanguchita chinthu chinyaki chiheni ukongwa chifukwa cha sanji. Panyengu yo Davidi wambanga zeze, Sauli wanguto mkondu ndipu wangumuponya nawu Davidi. Iyu wanguti: ‘Ndimugwaziyengi kumoza ndi chimati Davidi.’ Kweni Davidi wanguŵeka ndipu mkondu ungumugwaza cha. Zuŵa linyaki, Sauli wangutondeka so kumugwaza ndi mkondu Davidi. Sonu Davidi wanguziŵa kuti watenere kutcheŵa.

Kumbi ukumbuka vo Sauli wangulayizga? Iyu wangukamba kuti munthu yo wazamubaya Goliati wazakumupaska mwana waki munthukazi kuti wazije muwoli waki. Sauli wangumukambiya Davidi kuti wamupaskengi mwana waki Mikala asani wabaya dankha arwani ŵawu 100 Achifilisti. Sauli wagomezganga kuti Davidi wamubayika ndi Afilisti. Kweni yiwu angumubaya cha, sonu Sauli wangumupaska Davidi mwana waki kuti watorani nayu nthengwa.

Zuŵa linyaki, Sauli wangukambiya Jonafani ndi anchitu ŵaki kuti wakhumba kubaya Davidi. Kweni Jonafani wangukambiya awiski kuti: ‘Kumubaya cha Davidi. Palivi cho wakukunangiyani. M’malumwaki iyu watikuchitiyani vinthu vamampha. Panyengu yo wangubayiya Goliati, iyu wanguŵika umoyu waki pangozi ndipu wati wamubaya, imwi mungukondwa.’

Davidi waŵeka mkondu

Sauli wangumuvwiya mwana waki ndipu wangulayizga kuti wamubayengi cha Davidi. Davidi wanguwere kwaku Sauli ndipu wangulutirizga kumugwiriya nchitu nge pakwamba. Kweni zuŵa linyaki Davidi wachimba sumu, Sauli wangumuponya so ndi mkondu. Davidi wanguŵeka ndipu mkondu ungugwaza pachimati. Yaka kenga kachitatu. Sonu Davidi wanguziŵa kuti watenere kuthaŵa.

Usiku weniwo, Davidi wanguluta ku nyumba kwaki. Kweni Sauli wangutuma ŵanthu kuti akamubayi. Mikala wanguziŵa vo awiski akhumbanga kuchita. Sonu wangukambiya murumu waki kuti: ‘Asani uleka kuthaŵa usiku unu, mawa ufwengi.’ Usiku weniwo, Mikala wangumuwovya Davidi kuti wathaŵi kutuliya pa windu. Kwa vyaka 7, Davidi wajaliyanga kubisama kuwopa kuti Sauli wangamubaya.

1 Samuele 18:1-30; 19:1-18.



Mafumbu

  • Nchifukwa wuli Sauli wachitiyanga sanji Davidi, nanga iyu wapambananga wuli ndi mwana waki Jonafani?
  • Kumbi nchinthu wuli cho chinguchitika zuwa linyaki panyengu yo Davidi wambiyanga Sauli zeze?
  • Kumbi Sauli wangukambiya Davidi kuti wachitenji wechendato mwana waki Mikala kuja muwoli waki, ndipu nchifukwa wuli Sauli wangukamba viyo?
  • Panyengu yo Davidi wambiyanga Sauli zeze, kumbi nchinthu wuli cho chinguchitika kachitatu nge po chithuthuzi chilongole?
  • Kumbi Mikala wangutaska wuli umoyu waku Davidi, nanga nchinthu wuli cho Davidi wakhumbikanga kuchita kwa vyaka 7?

Mafumbu ngakusazgiyapu

  • Ŵerenga 1 Samuele 18:1-30.

    Kumbi chanju chambula kumala chaku Jonafani ndi Davidi chilongo wuli chithuzithuzi cha kukoliyanaku kwa ‘mbereri zinyaki’ ndi a ‘kamskambu kamana’? (1 Samu. 18:1; Yoha. 10:16; Luka 12:32; Zeka. 8:23)

    Chinanga wuli Jonafani ndiyu wenga wakwenele kuhara ufumu wa awiski a Sauli, kumbi lemba la 1 Samuele 18:4, lilongo wuli kuti Jonafani wenga wakujithereska ukongwa ku munthu yo wangusankhika kuti waje fumu?

    Kumbi vo Sauli wanguchita vilongo wuli kuti sanji yingatilongozge ku ubudi ukulu, nanga ivi vitititcheŵeskanji? (1 Samu. 18:7-9, 25; Yako. 3:14-16)

  • Ŵerenga 1 Samuele 19:1-17.

    Kumbi Jonafani wanguŵika wuli umoyu waki pangozi po wangukamba mazu ngo ngakulembeka pa 1 Samuele 19:4, 5? (1 Samu. 19:1, 6)