Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 54: Munthu Wanthazi Ukongwa

Nkhani 54: Munthu Wanthazi Ukongwa

KUMBI utimuziŵa munthu wanthazi ukongwa yo wengaku nyengu yakali? Zina laki lenga Samsoni, iyu wenga mweruzgi. Yehova ndiyu wangupaska Samsoni nthazi. Samsoni wechendaweku, Yehova wangukambiya anyina aku Samsoni kuti: ‘Uŵengi ndi mwana munthurumi. Iyu wazamuwovya Ayisraele, kuŵapozomoska kwa Afilisti.’

Samsoni wapumana ndi nkharamu

Afilisti ajanga m’charu cha Kanani ndipu ŵenga ŵanthu aheni ukongwa. Yiwu ŵenga ndi asilikali anandi ndipu aŵabayanga ukongwa Ayisraele. Nyengu yinyaki po Samsoni walutanga kwa Afilisti, wangukumana ndi nkharamu yikulu ndipu yingukoroma kukhumba kumubaya. Kweni Samsoni wangubaya nkharamu yo ndi manja. Iyu wangubaya so Afilisti aheni anandi.

Pavuli paki, Samsoni wenga paubwezi ndi munthukazi munyaki zina laki Delila. Alongozgi ŵa Afilisti, angulayizga Delila kuti asani waŵakambiyengi cho chitimuchitiska Samsoni kuja ndi nthazi, amupaskengi ndalama zasiliva zakukwana 1,100. Delila wanguzikhumba ukongwa ndalama zo. Iyu wamuyanjanga mwakufikapu cha Samsoni ndipuso waŵayanjanga cha ŵanthu aku Chiuta. Sonu nyengu zosi wafumbanga Samsoni cho chamuchitiskanga kuti waje ndi nthazi.

Delila ndi Samsoni

Pakumaliya paki, Delila wanguchitiska Samsoni kuti wamukambiyi chisisi cha nthazi zaki. Iyu wangukamba kuti: ‘Sisi langu lechendasengekepu. Chiuta wakundisankha ndechendaweku kuti ndizije muteŵeti waki wapade, Mnaziri. Asani sisi langu lingasengeka, nthazi zangu zosi zimalengi.’

Delila wati waziŵa ivi, wanguchitiska kuti Samsoni wagoni tulu pa chipakatu chaki. Ndipu wangudana munthu kuti wazimusengi sisi Samsoni. Sonu iyu wati wayuka wanguwona kuti wengavi nthazi. Pavuli paki, Afilisti anguza kuzimuko. Yiwu angumutolo masu ngosi ngaŵi ndipu wanguja kapolu wawu.

Samsoni wawisa mizati ya nyumba

Zuŵa linyaki Afilisti ŵenga ndi sekeresu likulu lakuti asopi chiuta wawu Dagoni, ndipu anguchito Samsoni m’jeri kuti wakaje chakusekesa. Panyengu iyi sisi laku Samsoni ndipu lame so. Samsoni wangukambiya m’nyamata mweniyo wangumuko pajanja kuti: ‘Ndiwovyi kuti ndiko mizati ya nyumba iyi.’ Sonu Samsoni wanguromba kwaku Yehova kuti wamupaski nthazi ndipu iyu wangukoleska mizati ya nyumba yo. Ndipu wangudanirizga kuti: ‘Ndifwiyi nawu pamoza Afilisti yaŵa!’ Pa phwandu lo penga Afilisti akujumpha 3,000 ndipu Samsoni wati watutuzga mizati, nyumba yo yinguwa ndi kubaya ŵanthu wosi aheni.

Ŵeruzgi chaputala 13 mpaka 16.



Mafumbu

  • Kumbi munthu wanthazi ukongwa yo wengaku nyengu yakali zina laki wenga yani, ndipu ndiyani yo wangumupaska nthazi?
  • Nge mo uwone pachithuthuzi, kumbi zuŵa linyaki Samsoni wanguchitanji ndi nkharamu yikulu?
  • Kumbi pachithuthuzi po, Samsoni watimusumuliya chisisi wuli Delila, ndipu kumbi ivi vinguchitiska wuli kuti Samsoni wakoleki ndi Afilisti?
  • Kumbi Samsoni wanguchita wuli kuti arwani akujumpha 3,000, a Chifilisti afwi pazuŵa lo iyu wangufwiya?

Mafumbu ngakusazgiyapu

  • Ŵerenga Ŵeruzgi 13:1-14.

    Kumbi Manowa ndi muwoli waki, nchakuwoniyapu chamampha wuli kwa apapi pakulela ŵana? (Ŵeru. 13:8; Sumu 127:3; Ŵaefe. 6:4)

  • Ŵerenga Ŵeruzgi 14:5-9 ndi 15:9-16.

    Kumbi vo Samsoni wanguchita pakubaya nkharamu, kudumuwa vingwi vo angumumanga navu ndipuso mo wangugwiriskiya nchitu chiwanga cha chibwanyu cha bulu kubayiya anthurumi 1,000, vilongo wuli mo mzimu utuŵa waku Yehova ugwiriya nchitu?

    Kumbi mzimu utuŵa utitiwovya wuli mazuŵa nganu? (Ŵeru. 14:6; 15:14; Zeka. 4:6; Machi. 4:31)

  • Ŵerenga Ŵeruzgi 16:18-31.

    Kumbi Samsoni wangukwasika wuli ndi mabwezi ngaheni, nanga isi tisambiranjipu? (Ŵeru. 16:18, 19; 1 Ŵako. 15:33)