Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 53: Layizgu Laku Jefta

Nkhani 53: Layizgu Laku Jefta
Mwana munthukazi waku Jefta

KUMBI nyengu yinyaki ukulayizgapu munthu, kweni pavuli paki unguwona kuti vo ungulayizga venga vakusuzga kuvichita? Munthu yo we pachithuthuzi ichi wanguchitapu venivi, ndichu chifukwa chaki wawoneka kuti wachita chitima ukongwa. Munthu yo wenga mweruzgi wa Yisraele ndipu wenga wambula mantha. Zina laki ndi Jefta.

Jefta wengaku panyengu yo Ayisraele anguleka kusopa Yehova. Yiwu angwamba so kuchita vinthu viheni. Sonu Yehova wanguzomerezga ŵanthu a Chiamoni kubaya Ayisraele. Ivi vinguchitiska kuti Ayisraele amudandawuliyi Yehova kuti: ‘Takunangiyani, chondi tipozomoskeni.’

Jefta ndi ŵanthu ŵaki

Ŵanthu yaŵa anguleka kuchita vinthu viheni. Yiwu angwamba so kusopa Yehova kulongo kuti angusintha nadi. Ndipu Yehova wanguŵawovya so.

Sonu ŵanthu angusankha Jefta kuti ndiyu wakarwi nkhondu ndi ŵanthu a Chiamoni. Jefta wangukhumbisiska kuti Yehova ndiyu wamuwovyi pankhondu iyi. Ndipu iyu wangulayizga Yehova kuti: ‘Asani muperekengi Amoni mu janja langu, munthu wakwamba yo wamutuwa m’nyumba yangu kuzindilondere asani ndachipunda nkhondu, ndimuperekengi kwaku imwi.’

Yehova wanguvwiya vo Jefta wangulayizga ndipu wangumuwovya nadi kuti wakapundi nkhondu. Kumbi utimuziŵa munthu wakwamba yo wanguchimulondere Jefta panyengu yo waweriyanga ku nyumba kwaki? Wenga mwana waki munthukazi yumoza pe yo wangubala. Jefta wati wamuwona, wanguliya kuti: ‘Kotu mwana wangu! Wandipaska chitima. Kweni pakuti ndamulayizga kali Yehova nditondekengi cha kufiska.’

Sonu mwana waku Jefta wati wavwa vo awiski angulayizga, pakwamba nayuso wanguchita chitima ukongwa. Ivi vang’anamuwanga kuti iyu walekanengi nawu awiski ndipuso mabwezi ngaki. Chifukwa watingi wakajengi ku chihema chaku Yehova ku Shilo ndi kumuteŵete kwa umoyu waki wosi. Ndipu wanguŵakambiya awiski kuti: ‘Asani mwalayizga kwaku Yehova, mutenere kufiska vo mwalayizga.’

Mwaviyo, mwana waku Jefta wanguluta ku Shilo, iyu wanguja kweniko umoyu waki wosi ndipu wanguteŵete Yehova pa chihema chaki. Chaka ndi chaka, anthukazi a Chiyisraele alutanga kuchimuwona ndi kuchichezga nayu kwa mazuŵa nganayi. Ŵanthu amuyanjanga ukongwa mwana waku Jefta chifukwa wenga muteŵeti wamampha waku Yehova.

Ŵeruzgi 10:6-18; 11:1-40.



Mafumbu

  • Kumbi Jefta wenga yani, ndipu wangujaku panyengu niyi?
  • Kumbi Jefta wangumulayizganji Yehova?
  • Nchifukwa wuli Jefta wenga ndi chitima po wawenga ku nkhondu yo wanguthereska a Amoni?
  • Kumbi mwana munthukazi waku Jefta wangukambanji wati wavwa layizgu lo awiski angukamba?
  • Nchifukwa wuli ŵanthu ayanjanga mwana munthukazi waku Jefta?

Mafumbu ngakusazgiyapu

  • Ŵerenga Ŵeruzgi 10:6-18.

    Kumbi mbiri ya kuleka kugomezgeka kwa Ayisraele kwaku Yehova, yitititcheŵeskanji? (Weru. 10:6, 15, 16; Waro. 15:4; Chivu. 2:10)

  • Ŵerenga Ŵeruzgi 11:1-11, 29-40.

    Kumbi tiziŵa wuli kuti vo Jefta wanguchita pakupereka mwana waki nge ‘sembi yakotcha’ kwang’anamuwanga kumuwotcha pamotu chayiku cha? (Ŵeru. 11:31; Ŵale. 16:24; Mara. 18:10, 12)

    Kumbi Jefta wangumupereka wuli mwana waki nge sembi?

    Kumbi tisambiranji pa mo Jefta wanguchitiya ndi layizgu laki kwaku Yehova? (Ŵeru. 11:35, 39; Waku. 5:4, 5; Mate. 16:24)

    Kumbi mwana waku Jefta nchakuwoniyapu chamampha wuli kwa Akhristu achinyamata wo akhumba uteŵeti wa nyengu zosi? (Ŵeru. 11:36; Mate. 6:33; Ŵafi. 3:8)