Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 51: Ruti ndi Naomi

Nkhani 51: Ruti ndi Naomi

M’BAYIBOLO usaniyengemu buku lo lidanika kuti Ruti. Buku ili, likonkhoska za banja lo lengaku m’nyengu yo Ayisraele ŵenga ndi ŵeruzgi. Ruti wenga msungwana wa ku Moabu, iyu wenga wa mtundu wa Yisraele cha. Kweni Ruti wati wasambira zaku Yehova Chiuta wawuneneska, iyu wangwamba kumuyanja ukongwa Yehova. Naomi wenga wakukota ndipu iyu wangumuwovya Ruti kuti waziŵi Yehova.

Naomi wenga munthukazi wa Chiyisraele. Iyu ndi murumu waki kweniso ŵana ŵawu anthurumi ŵaŵi, angusamiya ku charu cha Moabu panyengu yo chakurya chenga chakusoŵa mu Yisraele. Sonu zuŵa linyaki murumu waku Naomi wangufwa. Pavuli paki ŵana anthurumi ŵaŵi aku Naomi anguto anthukazi a Chimoabu, Ruti ndi Oropa. Kweni pati pajumpha vyaka 10, ŵana anthurumi ŵaŵi aku Naomi angufwa. Naomi ndi akumwana ŵaki ŵaŵi ŵenga ndi chitima chikulu ukongwa. Kumbi sonu Naomi watingi wachitengi wuli?

Zuŵa linyaki Naomi wanguŵanaŵana kuti wawere kumuzi kwawu ko kwenga abali ŵaki. Ruti ndi Oropa akhumbanga kuja ndi Naomi, mwaviyo angusoka nayu. Kweni ŵati ayenda mtunda umanavi, Naomi wangukambiya akumwana ŵaki kuti: ‘Wereriyani, lutani kwa anyinamwi.’

Naomi wanguŵafyofyontha akumwana ŵaki ndi kuŵakambiya kuti ayendi umampha. Yiwu angwamba kuliya chifukwa amuyanjanga ukongwa Naomi. Ndipu anguti: ‘Awa, tilutengi namwi kwa abali ŵinu.’ Kweni Naomi wanguŵakambiya kuti: ‘Wereriyani mwaŵana ŵangu. Kungaŵa umampha asani mungaluta kwinu.’ Sonu Oropa wanguwere kwawu. Kweni Ruti wangukana.

Naomi wangukambiya Ruti kuti: ‘Oropa waluta. Iwi nawi lutanga.’ Kweni Ruti wangumuka kuti: ‘Lekani kundikambiya kuti ndikusiyeni. Ndizomerezgeni ndiluti namwi. Ko mulutengi ndiku nani ndilutengi, ko mwamuja ndiku nani ndamuja. Abali ŵinu amuja abali ŵangu ndipu Chiuta winu wamuja Chiuta wangu. Ko mwamufwiya ndiku nani ndamufwiya, ndipu ndamuŵikika kweniko.’ Ruti wati wakamba ivi, Naomi wanguleka kumukambiya kuti wawere kwawu.

Pakumaliya paki, Naomi ndi Ruti anguchifika ku Yisraele ndipu anguja kweniko. Ruti wati wafika wangwamba kugwira nchitu m’minda chifukwa yenga nyengu yakuvuna barile. Munthu munyaki zina laki Boazi wanguzomerezga Ruti kuti wakunkhengi barile m’munda waki. Kumbi anyina aku Boazi utiŵaziŵa? Ŵenga a Rahabi wo ajanga mu msumba wa Yeriko.

Zuŵa linyaki Boazi wangukambiya Ruti kuti: ‘Ndikuvwa vosi vakukwaskana ndi iwi, kweniso mo ujaliya nayu umampha Naomi. Ndiziŵa mo ukusiliya awusu ndi anyoku, charu chaku ndipuso mo ukuziya kunu kuzija ndi ŵanthu ambula kuŵaziŵa. Yehova wakutumbiki.’

Ruti wangumuka kuti: ‘Mwandichitiya lisungu, ndipu mazu ngamampha ngo mwandikambiya ngandikondweska.’ Boazi wangumuyanja ukongwa Ruti, ndipu pati pajumpha nyengu yimanavi angutorana. Ivi vingumukondweska Naomi. Kweni Naomi wangukondwa so ukongwa Ruti ndi Boazi ŵati abala mwana wakwamba, Obedi. Pavuli paki, Obedi wanguzija mbuyaki waku Davidi. Tisambirengi zaku Davidi kunthazi.

Ruti ndi Naomi

Buku la m’Bayibolo la Ruti.



Mafumbu

  • Kumbi vinguchitika wuli kuti Naomi wasaniriki m’charu cha Moabu?
  • Kumbi Ruti ndi Oropa ŵenga ayani?
  • Naomi wati wakambiya Ruti ndi Oropa kuti awere kumuzi kwawu, kumbi weyosi pakuyija wangumukanji?
  • Kumbi Boazi wenga yani ndipu wanguwovya wuli Ruti ndi Naomi?
  • Kumbi mwana yo Boazi ndi Ruti angubala wenga yani, nanga nchifukwa wuli titenele kumukumbuka?

Mafumbu ngakusazgiyapu

  • Ŵerenga Ruti 1:1-17.

    Kumbi Ruti wangukamba mazu wuli ngakukondweska ngakulongo chanju chambula kumala? (Ruti 1:16, 17)

    Kumbi vo Ruti wanguchita vilongo wuli mtima wo ‘mbereri zinyaki’ zilongo pa akupakika wo ŵe pacharu chapasi mazuŵa nganu? (Yoha. 10:16; Zeka. 8:23)

  • Ŵerenga Ruti 2:1-23.

    Kumbi Ruti wangulongo wuli chakuwoniyapu chamampha kwa anthukazi mazuŵa nganu? (Ruti 2:17, 18; Ntha. 23:22; 31:15)

  • Ŵerenga Ruti 3:5-13.

    Kumbi Boazi wangukuwona wuli kukhumbisiska kwaku Ruti kuti watorani ndi iyu m’malu mwakutorana ndi munthurumi munyaki wachinyamata?

    Kumbi vakuchitika vaku Ruti vititisambizanji pankhani ya chanju chambula kumala? (Ruti 3:10; 1 Ŵako. 13:4, 5)

  • Ŵerenga Ruti 4:7-17.

    Kumbi anthurumi achikhristu mazuŵa nganu angachita wuli kuti aje nge Boazi? (Ruti 4:9, 10; 1 Timo. 3:1, 12, 13; 5:8)