Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 49: Lumwi Lama

Nkhani 49: Lumwi Lama

AMUWONI Yoswa yo. Iyu watiti: ‘Lumwi yima!’ Ndipu lumwi lama nadi. Ilu lama pakatikati kuchanya, kwa zuŵa losi lamphumphu. Yehova ndiyu wachitiska venivi. Tiyi tiwoni chifukwa cho Yoswa wakhumbiyanga kuti lumwi lilutirizgi kuŵala.

Lumwi

Mafumu ngankhondi ngaheni nga m’charu cha Kanani ngati ngayamba nkhondu ndi Agibeoni, yiwu angutuma munthu kuti waluti kwaku Yoswa kuchimukambiya kuti wakaŵawovyi. Munthu uyu wanguti: ‘Zani kunu liŵi, mutitaski! Mafumu ngosi ngakumapiri ngaza kuzirwana nasi nkhondu taŵateŵeti winu.’

Nyengu yeniyo, Yoswa ndi asilikali ŵaki angusoka. Yiwu angwenda usiku wosi. Ŵati afika ku Gibeoni, asilikali ŵa mafumu ngankhondi anguchita mantha ndipu angwamba kuthaŵa. Pavuli paki, Yehova wanguchitiska kuti kuwi vuwa yamatalala. Ndipu asilikali wo angufwa ndi vuwa yamatalala ŵenga anandi kuphara wo angubayika ndi asilikali aku Yoswa.

Yoswa

Yoswa wanguwona kuti pambula kuswela lumwi liserengi. Ndipu asani kwafipa asilikali wosi a mafumu ngankhondi akhoza kuthaŵa. Sonu ndichu chifukwa chaki Yoswa wanguromba kwaku Yehova ndipu pavuli paki wangukamba kuti: ‘Lumwi yima!’ Ndipu lumwi lati lalutirizga kuŵala, Ayisraele angusaniya mwaŵi wakupunda nkhondu.

Mu Kanani mwenga mweche mafumu nganandi ngaheni ngo ngatinkhanga ŵanthu ŵaku Chiuta. Panguto vyaka pafupifupi 6 kuti Yoswa ndi gulu laki la nkhondu athereski mafumu 31 nga mu Kanani. Vati vachitika ivi, Yoswa wangugaŵiya charu cha Kanani ku mafuku ngeningo ngengavi malu.

Vyaka vinandi vati vajumpha, Yoswa wangufwa we ndi vyaka 110. Panyengu yo iyu ndi anyaki ŵenga ŵeche ndi umoyu, ŵanthu avwiyanga Yehova. Kweni ŵanthu amampha yaŵa ŵati ŵafwa, ŵanthu angwamba kuchita vinthu viheni ndipu angukumana ndi masuzgu. Yapa ndipu angukhumbika nadi kuti Chiuta waŵawovyi.

Yoswa 10:6-15; 12:7-24; 14:1-5; Ŵeruzgi 2:8-13.



Mafumbu

  • Nge mo uwone pachithuthuzi, kumbi Yoswa wakambanji ndipu nchifukwa wuli wakamba venivo?
  • Kumbi Yehova wangumuwovya wuli Yoswa ndi anthurumi ŵaki a nkhondu?
  • Kumbi Yoswa wanguthereska mafumu ngalinga, ndipu wanguto vyaka vilinga kuti wangathereski?
  • Kumbi nchifukwa wuli Yoswa wangugaŵa charu cha Kanani?
  • Kumbi Yoswa wangufwa we ndi vyaka vilinga, ndipu nchinthu wuli cho chinguchitikiya ŵanthu iyu wati wafwa?

Mafumbu ngakusazgiyapu

  • Ŵerenga Yoswa 10:6-15.

    Kumbi kuziŵa kuti Yehova wangumika lumwi ndi mwezi chifukwa cha Ayisraele, kutitiwovya kuja ndi chigomezgu wuli mazuŵa nganu? (Yos. 10:8, 10, 12, 13; Sumu 18:3; Ntha. 18:10)

  • Ŵerenga Yoswa 12:7-24.

    Kumbi ndiyani yo wanguchitiska kuti mafumu 31 nga ku Kanani ngathereskeki, ndipu nchifukwa wuli kuziŵa ivi nkhwakukhumbika kwaku isi mazuŵa nganu? (Yos. 12:7; 24:11-13; Mara. 31:8; Luka 21:9, 25-28)

  • Ŵerenga Yoswa 14:1-5.

    Kumbi charu chingugaŵika wuli pakati pa mafuku nga Chiyisraele, ndipu ivi vilongonji pa mwenimo ŵanthu azamuhariya Paradayisu? (Yos. 14:2; Yesa. 65:21; Ezek. 47:21-23; 1 Ŵako. 14:33)

  • Ŵerenga Ŵeruzgi 2:8-13.

    Nge mo wenge Yoswa mu Yisraele, ndiyani mazuŵa nganu yo watitivikiliya ku ŵanthu achigaruka? (Ŵeru. 2:8, 10, 11; Mate. 24:45-47; 2 Ŵatesa. 2:3-6; Tito 1:7-9; Chivu. 1:1; 2:1, 2)