Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 48: Agibeoni Azeru

Nkhani 48: Agibeoni Azeru

ŴANTHU a m’misumba yinandi ya mu Kanani anozgeka kurwa nkhondu ndi Ayisraele. Yiwu aŵanaŵana kuti aŵathereskengi Ayisraele. Kweni ŵanthu ŵa mu msumba wa Gibeoni wo we pafupi ndi Ayisraele aŵanaŵana viyo cha. Agibeoni agomezga kuti Chiuta ndiyu watovya Ayisraele ndipu yiwu akhumba cha kulimbana ndi Chiuta. Sonu kumbi wachiziŵa cho Agibeoni anguchita?

Yiwu angujichitiska kuti akawoneki nge kuti atuliya ku charu chakutali ukongwa. Anyaki anguvwala vakuvwala vakuperuka ndipuso sapatu zakumala. Yiwu anguŵika mikati yawu yakumila m’mathumba ngakuperuka ndipu angumangiriya pa mahachi ngawu. Ndipu anguluta kwaku Yoswa ndi kumukambiya kuti: ‘Tatuliya ku charu chakutali, chifukwa tikuvwa zaku Yehova Chiuta winu wanthazi. Tikuvwa vinthu vosi vo wangukuchitiyani mu Egipiti. Sonu alongozgi ŵidu angutikambiya kuti tijinozge chakurya cha paulendu kuti tizikukambiyeni kuti: “Isi ndisi ateŵeti winu. Tilayizgeni kuti muchitengi nasi nkhondu cha.” Mukhoza kuwona kuti tavwala vakuvwala vakumala kweniso vakurya vidu vamila chifukwa tayenda ulendu utali.’

Yoswa ndi alongozgi anyaki angugomezga vo Agibeoni angukamba. Sonu angupangana kuti achitengi nawu nkhondu cha. Kweni pati pajumpha mazuŵa ngatatu anguvwa kuti Agibeoni angutuliya nadi mu msumba wapafupi.

Ndipu Yoswa wanguŵafumba kuti: ‘Nchifukwa wuli mungutikambiya kuti mwatuliya kucharu chakutali?’

Agibeoni angumuka kuti: ‘Tinguchita viyo chifukwa tikuvwa kuti Yehova Chiuta winu wakukulayizgani kuti wakupaskeningi charu chosi cha Kanani. Mwaviyo tinguwopa kuti mungatibaya.’ Kweni Ayisraele angusunga phanganu ndipu anguŵabaya cha Agibeoni. Mmalu mwaki anguŵakambiya kuti aŵengi anchitu ŵawu.

Fumu ya ku Yerusalemu yingukwiya ukongwa yati yavwa kuti Agibeoni ŵe pachimangu ndi Ayisraele. Sonu fumu iyi yingukambiya mafumu nganyaki nganayi kuti: ‘Zani mundiwovyi kurwana nkhondu ndi Agibeoni.’ Ivi ndivu mafumu ngankhondi nganguchita nadi. Kumbi kwenga kwazeru kuti Agibeoni aje pachimangu ndi Ayisraele, cho chinguchitiska kuti mafumu ngankhondi ngaŵayukiyi? Tiwonengi.

Yoswa 9:1-27; 10:1-5.



Mafumbu

  • Kumbi Agibeoni apambananga wuli ndi ŵanthu a mtundu wa Chikanani wo ajanga mu misumba yapafupi nawu?
  • Nge po chithuthuzi chilongole, kumbi Agibeoni achitanji, nanga nchifukwa wuli achita viyo?
  • Kumbi ndi phanganu wuli lo Yoswa ndi alongozgi a Chiyisraele angupangana ndi Agibeoni, ndipu nchinthu wuli cho anguzisaniya pati pajumpha mazuŵa ngatatu?
  • Kumbi nchinthu wuli cho chinguchitika mafumu nga mu misumba yinyaki ngati ngavwa kuti Agibeoni ŵe pachimangu ndi Ayisraele?

Mafumbu ngakusazgiyapu

  • Ŵerenga Yoswa 9:1-27.

    Pakuti Yehova wangukambiya mtundu wa Yisraele kuti ‘ubayi wosi wo ajanga m’charu,’ kumbi ndi mijalidu niyi yo wangulongo chifukwa cha kuvikiliya Agibeoni? (Yos. 9:22, 24; Mate. 9:13; Machi. 10:34, 35; 2 Pet. 3:9)

    Mwakusunga phanganu lenilo wangupangana ndi Agibeoni, kumbi Yoswa wangulongo wuli chakuwoniyapu chamampha kwa Akhristu mazuŵa nganu? (Yos. 9:18, 19; Mate. 5:37; Ŵaefe. 4:25)

  • Ŵerenga Yoswa 10:1-5.

    Kumbi mzinda ukuru mazuŵa nganu ulondo wuli Agibeoni, nanga ndi yani yo walimbana nawu? (Yos. 10:4; Zeka. 8:23; Mate. 25:35-40; Chivu. 12:17)