Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 47: Angusaniya Munkhungu mu Yisraele

Nkhani 47: Angusaniya Munkhungu mu Yisraele
Akani wabisa vinthu vo waba

AWONA vinthu vo munthu yo wakhumba kuwundiya pasi mu hema laki. Iyu wakhumba kuwundiya chakuvwala chakutowa, mlaba wa golidi ndi ndalama za siliva. Vinthu vo wavito ku Yeriko. Kweni kumbi nchinthu wuli cho chakhumbikanga kuchitika ndi vinthu va mu Yeriko? Kumbi ukumbuka?

Vinthu ivi vakhumbikanga kuwotcheka, kupatuwaku golidi ndi siliva kuti akapereki kwakusungiya chuma cha chihema chaku Yehova. Kweni ŵanthu yaŵa angumuvwiya cha Chiuta. Yiwu ŵaba vinthu vaku Chiuta. Yo we ndi chakuvwala m’manja, zina laki ndi Akani ndipu wo wenawu mba m’banja laki. Tiyi tiwoni vo vinguchitika.

Akani wati waba vinthu ivi, Yoswa wangutuma ŵanthu kuti akarwi nkhondu ndi ŵanthu ŵa mu msumba wa Ai. Kweni anguthereskeka. Anyaki angubayika, ndipu anyaki wosi anguthaŵa. Yoswa wanguchita chitima ukongwa. Iyu wangugona pasi kavunama ndi kuromba kwaku Yehova kuti: ‘Nchifukwa wuli mwazomerezga kuti ivi vitichitikiyi?’

Yehova wangumuka Yoswa kuti: ‘Yuka, Ayisraele ananga. Yiwu ato vinthu vinyaki vo vingwenere kuwotcheka kweniso vinthu vo angwenere kupereka ku chihema chaku Yehova. Yiwu akuba chakuvwala chakutowa ndipu akuchibisa. Ndipu ndikutumbikeningi cha mpaka muchinangi chinthu yichi ndi kubaya munthu yo wakuto vinthu ivi.’ Yehova wangukamba kuti wamulongongi Yoswa munthu muheni uyu.

Sonu Yoswa wanguwunganiska ŵanthu wosi ndipu Yehova wangumulongo kuti munthu muheni wenga Akani. Ndipu Akani wangukamba kuti: ‘Ndananga. Ndinguwona chakuvwala chakutowa, mlaba wa golidi ndi ndalama za siliva. Ndinguvikhumbira ukongwa ndipu ndinguvito. Mwakuvisaniya pasi mu hema langu ndimu ndikuviwundiya.

Sonu ŵati avisaniya vinthu yivi anguza navu kwaku Yoswa. Ndipu iyu wangumufumba Akani kuti: ‘Nchifukwa wuli watidaniya suzgu? Sonu Yehova wakulangengi nawi.’ Nyengu yeniyo ŵanthu wosi angumuponya mya Akani ndi banja laki ndipu wosi angufwa. Kumbi ivi vilongo cha kuti mbuheni kuto vinthu vakuti vidu cha?

Pavuli paki, Ayisraele anguluta so kuchirwa nkhondu ku Ai. Panyengu iyi, Yehova wanguŵawovya ŵanthu ŵaki ndipu angupunda nkhondu.

Yoswa 7:1-26; 8:1-29.



Mafumbu

  • Kumbi pachithuthuzi po, ndi yani yo wawundiya vinthu vo vingutoleka ku Yeriko, nanga wo atimuwovya mbayani?
  • Nchifukwa wuli vo Akani ndi banja laki anguchita venga vakofya ukongwa?
  • Kumbi Yehova wangukambanji, Yoswa wati wafumba kuti nchifukwa wuli Ayisraele anguthereskeka pankhondu ya ku Ai?
  • Kumbi nchinthu wuli chinguchitikiya Akani ndi banja laki ŵati atoleke kwaku Yoswa?
  • Kumbi ndi sambiru lakukhumbika nili lo tisambira pa cheruzgu cho chinguperekeka kwaku Akani?

Mafumbu ngakusazgiyapu

  • Ŵerenga Yoswa 7:1-26.

    Kumbi marombu ngaku Yoswa ngalongo wuli ubwezi wo iyu wenga nawu ndi Mulengi waki? (Yos. 7:7-9; Sumu 119:145; 1 Yoha. 5:14)

    Kumbi vo Akani wanguchita vilongonji, ndipu vitititcheŵeskanji? (Yos. 7:11, 14, 15; Ntha. 15:3; 1 Timo. 5:24; Ŵahe. 4:13)

  • Ŵerenga Yoswa 8:1-29.

    Kumbi weyosi pakuyija watenere kuchitanji asani mu mpingu Wachikhristu wa mazuŵa nganu, muchitika vinthu viheni? (Yos. 7:13; Ŵale. 5:1; Ntha. 28:13)