Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 46: Mpanda wa Yeriko

Nkhani 46: Mpanda wa Yeriko

KUMBI nchinthu wuli cho chiwiska mpanda wa Yeriko? Pawoneka nge pawa bomba likulu lo lachitiska kuti mpanda uwi. Kweni panyengu iyi ŵanthu ŵengavi mabomba pamwenga futi. Ichi nchakuziziswa chinyaki cho Yehova wanguchita. Tiyi tiwoni vo vinguchitika.

Mpanda wa Yeriko utuwa

Yivwa vo Yehova wangukambiya Yoswa, iyu wanguti: ‘Iwi ndi ankhondu ŵaku muyendi kuzunguliya msumba. Muwuzunguliyengi kamoza pa zuŵa, kwa mazuŵa 6. Ndipu mupingengi bokosi la phanganu. Kweniso asembi 7 ayendengi panthazi pa bokosi lo ndipu ambengi mbata.’

‘Pazuŵa la nambala 7 muzunguliyi msumba maulendu 7. Ndipu mumbi mbata kwanyengu yitali, pavuli paki weyosi wadanilizgi ukongwa nge kuti kwachitika nkhondu. Ndipu pakumaliya paki mpanda uwengi pasi.’

Yoswa ndi ŵanthu wosi anguchita vo Yehova wangukamba. Panyengu yo azunguliyanga, wosi anguja cheti. Pengavi munthu yo walongoronga. Kwavwikanga waka kuliya kwa mbata zo ambanga kweniso mdinu wa malundi ngawu. Arwani a ŵanthu ŵaku Chiuta wo ŵenga mu Yeriko anguchita mantha. Kumbi wachiwona chingwi chiyera cho chilende pa windu? Kumbi ndi windu la nyumba yaku yani? Rahabi wanguchita nadi vo azondi ŵaŵi angumukambiya. Iyu ndi banja laki losi ŵenga m’nyumba ndipu awonanga vo vachitikanga.

Yoswa

Pazuŵa la nambala 7, ŵati amala kuzunguliya msumba maulendu 7, ankhondu angumba mbata, pavuli paki angudanirizga ndipu mpanda wosi unguwa. Ndipu Yoswa wangukamba kuti: ‘Bayani weyosi yo we mu msumba ndipu muwuwotchi. Wotchani chechosi, kweni siliva, golidi, mkuŵa ndi chisulu mukavipereki mwakusungiya chuma, cha chihema chaku Yehova.’

Yoswa wangukambiya azondi ŵaŵi ŵa kuti: ‘Lutani m’nyumba yaku Rahabi, ndipu mukamutuzgi iyu ndi banja laki losi.’ Rahabi ndi banja laki angupozomoka nge mo azondi angumulayizgiya.

Yoswa 6:1-25.



Mafumbu

  • Kumbi Yehova wangukambiya anthurumi a nkhondu ndi asembi kuti achitenji kwa mazuŵa 6?
  • Kumbi anthurumi ŵenaŵa akhumbikanga kuchitanji pazuŵa la nambala 7?
  • Nge po uwone pa chithuthuzi, kumbi nchinthu wuli cho chichitikiya mpanda wa Yeriko?
  • Kumbi nchifukwa wuli chingwi chiyera chingumangika pawindu?
  • Kumbi Yoswa wangukambiya anthurumi ankhondu kuti achitenji nawu ŵanthu kweniso msumba, nanga siliva, golidi, mkuŵa ndi chisulu achitenji navu?
  • Kumbi azondi ŵaŵi wanguŵakambiya kuti achitenji?

Mafumbu ngakusazgiyapu

  • Ŵerenga Yoswa 6:1-25.

    Kumbi kuzunguliya Yeriko ko Ayisraele anguchita pazuŵa la nambala 7, kuyanana wuli ndi nchitu yakupharazga yo Akaboni aku Yehova achita mazuŵa ngakumaliya nganu? (Yos. 6:15, 16; Yesa. 60:22; Mate. 24:14; 1 Ŵako. 9:16)

    Kumbi uchimi wo ukulembeka pa Yoswa 6:26, ungufiskika wuli vyaka 500 vati vakapu, nanga kufiskika uku kutitisambizanji za mazu ngaku Yehova? (1 Ŵaka. 16:34; Yesa. 55:11)