Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 45: Kuyambuka Msinji wa Yordane

Nkhani 45: Kuyambuka Msinji wa Yordane

AWONA Ayisraele wo ayambuka Msinji wa Yordane. Kumbi nanga maji ngaya pani? Chifukwa chakuti panyengu iyi kwawanga vuwa yinandi, msinji wenga ndi maji nganandi ukongwa yiwu ŵechendayambuki. Kweni sonu maji ngosi ngakamuka ndipu Ayisraele ayambuka pamchenga wakumira nge po anguchitiya pa Nyanja Yiyera. Sonu kumbi maji ngosi ngaya pani? Tiyi tiwoni vo vinguchitika.

Ayisraele awoloka msinji wa Yordano

Yati yafika nyengu yakuti Ayisraele ayambuki Msinji wa Yordane, Yehova wangukambiya Yoswa kuti wakambiyi ŵanthu kuti: ‘Asembi apingi bokosi la phanganu ndipu adanjiyepu. Ndipu asani yiwu achibizga malundi ngawu m’maji nga Msinji wa Yordane, maji ngo ngamuleka kwenda.’

Sonu asembi anguto bokosi la phanganu ndi kudanjiyapu. Ndipu ŵati afika pa Yordane, asembi angubizga malundi ngawu m’maji. Panyengu iyi, msinji wo wenga ndi mweza ukulu kweniso ndimba. Kweni malundi ngawu ngati ngakwasa waka maji, mweza wo ungwamba kumala. Ichi chenga chakuziziswa. Yehova wangumika maji ngakunena kwa msinji. Ndipu pambula kuswera maji ngosi nganguphwa.

Asembi wo angupinga bokosi la phanganu anguma pakati pa msinji pakumila. Kumbi waŵawona pachithuthuzi po? Yiwu ŵati ŵama pakati pa Msinji wa Yordane, Ayisraele wosi anguyambuka pakumila.

Wosi ŵati ayambuka, Yehova wangukambiya Yoswa kuti wakambiyi anthurumi anthazi 12 kuti: ‘Lutani mu msinji po ŵama asembi ndi bokosi la phanganu. Mukatopu mya 12 ndipu muyiŵiki po mugonengi. Ndipu munthazi asani ŵana ŵinu azamufumba kuti mya iyi ying’anamuwanji, muziŵakambiyengi kuti maji nganguleka kwenda po bokosi la phanganu laku Yehova layambukanga Yordane. Ndipu mya iyi yazakukukumbuskani chakuziziswa ichi.’ Yoswa wanguŵika so mya 12 pakati pa msinji po asembi anguma.

Yoswa

Pakumaliya paki Yoswa wangukambiya asembi wo angupinga bokosi la phanganu kuti: ‘Zuwukanimu mu Yordane.’ Ndipu yiwu ŵati azuwuka waka, maji ngangwamba so kwenda.

Yoswa 3:1-17; 4:1-18.



Mafumbu

  • Kumbi Yehova wanguchita chakuziziswa wuli kuti Ayisraele ayambuki Msinji wa Yordane?
  • Kumbi Ayisraele akhumbikanga kuchitanji kuti alongo chigomezgu kuti ayambuki Msinji wa Yordane?
  • Nchifukwa wuli Yehova wangukambiya Yoswa kuti wawunjiki mya 12 ikuluikulu kutuwa mu msinji?
  • Kumbi nchinthu wuli cho chinguchitika asembi ŵati atuwa mu msinji wa Yordane?

Mafumbu ngakusazgiyapu

  • Ŵerenga Yoswa 3:1-17.

    Nge po nkhani iyi yakonkhoske, kumbi titenere kuchitanji kuti tilonde chovyu kweniso vitumbiku kutuliya kwaku Yehova? (Yos. 3:13, 15; Ntha. 3:5; Yako. 2:22, 26)

    Kumbi nchinthu wuli cho chinguchitikiya Msinji wa Yordane Ayisraele ŵati ayambuka kusere mu Charu Chakulayizgika, nanga ivi vingukweza wuli zina laku Yehova? (Yos. 3:15; 4:18; Sumu 66:5-7)

  • Ŵerenga Yoswa 4:1-18.

    Kumbi mya 12 yo yingutoleka mu msinji wa Yordane ndi kuziwunjikika ku Gilgala yenga ya nchitu wuli? (Yos. 4:4-7)