Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 43: Yoswa Wasankhika Kuja Mulongozgi

Nkhani 43: Yoswa Wasankhika Kuja Mulongozgi

MOSESE wakhumbanga kuluta nawu Ayisraele m’charu cha Kanani. Sonu iyu wangupempha Yehova kuti: ‘Ndizomerezgeni Yehova kuti ndiyambuki Msinji wa Yordane nkhawoni charu chamampha.’ Kweni Yehova wangumuka kuti: ‘Ja cheti, ungazindikambiyanga so cha venivo!’ Kumbi utichiziŵa chifukwa cho Yehova wangukambiya viyo?

Yehova wangukamba viyo chifukwa cha vo vinguchitika panyengu yo Mosese wangupuma jarawi. Kumbi ukumbuka kuti Mosese ndi Aroni angumutumbika cha Yehova? Yiwu anguŵakambiya cha ŵanthu kuti wenga Yehova yo wangutuzga maji mu jarawi. Pachifukwa ichi, Yehova wangukamba kuti waŵazomerezgengi cha kuti akasere m’charu cha Kanani.

Sonu Aroni wati wafwa, Yehova wangukambiya Mosese kuti: ‘Uto Yoswa umumiki panthazi paku Eleazara wasembi ndi ŵanthu wosi. Ndipu uŵakambiyi ŵanthu wosi kuti Yoswa ndiyu waŵengi mulongozgi winu.’ Mosese wanguchita vosi vo Yehova wangukamba nge po uwone pachithuthuzi yapa.

Mosese wakambiya ŵanthu kuti Yoswa ndi mulongozgi

Ndipu Yehova wangukambiya Yoswa kuti: ‘Ukhwimi, ungawopanga cha. Ulongozgengi Ayisraele m’charu cha Kanani chenicho ndikuŵalayizga, ndipu ndiŵengi nawi nyengu zosi.’

Pavuli paki, Yehova wangukambiya Mosese kuti wakweri pachanya pa Phiri la Nebo, m’charu cha Moabu. Sonu we paphiri penipo, Mosese wanguwona charu chakutowa cha Kanani cho chenga kusirya kwa Msinji wa Yordane. Ndipu Yehova wanguti: ‘Chenicho ndichu charu cho ndikulayizga kuti ndipaskengi ŵana ŵaku Abrahamu, Yisaki ndi Yakobe. Ndakuzomerezga kuti uchiwoni waka kweni ndikuzomerezgengi cha kuti useremu.’

Ndipu Mosese wangufwiya pachanya pa Phiri la Nebo. Iyu wangufwa we ndi vyaka 120. Iyu wenga weche ndi nthazi ndipu masu ngaki ngenga ngeche kuwona umampha. Sonu ŵanthu ŵenga ndi chitima chikulu ukongwa chifukwa cha nyifwa yaku Mosese. Kweni angukondwa kuti Yoswa ndiyu wajengi mulongozgi wawu.

Maŵerengedu 27:12-23; Marangu 3:23-29; 31:1-8, 14-23.



Mafumbu

  • Kumbi ŵanthu ŵaŵi wo ŵama ndi Mosese pachithuthuzi mbayani?
  • Kumbi Yehova wangumukambiyanji Yoswa?
  • Kumbi nchifukwa wuli Mosese wangukwera pachanya pa Phiri la Nebo, nanga Yehova wangumukambiyanji?
  • Kumbi Mosese wangufwa we ndi vyaka vilinga?
  • Nchifukwa wuli ŵanthu awoneka kuti ŵe ndi chitima, kweni nchifukwa wuli yiwu atenele kuja ndi likondwa?

Mafumbu ngakusazgiyapu

  • Ŵerenga Maŵerengedu 27:12-23.

    Kumbi Yoswa wangulonde nchitu wuli yakusuzga kutuliya kwaku Yehova, nanga mazuŵa nganu Yehova watiŵaphwere wuli ŵanthu Ŵaki? (Maŵe. 27:15-19; Machi. 20:28; Ŵahe. 13:7)

  • Ŵerenga Marangu 3:23-29.

    Kumbi nchifukwa wuli Yehova wanguleka kuzomerezga Mosese ndi Aroni kuluta ku charu cho wanguŵalayizga, ndipu tingasambiranji pa nkhani yeniyi? (Mara. 3:25-27; Maŵe. 20:12, 13)

  • Ŵerenga Marangu 31:1-8, 14-23.

    Kumbi mazu ngo Mosese wangukamba pakulayila Ayisraele ngalongo wuli kuti wangujiyuyuwa wati wachenyeka ndi Yehova? (Mara. 31:6-8, 23)

  • Ŵerenga Marangu 32:45-52.

    Kumbi Mazu ngaku Chiuta ngatenele kukwaska wuli mawumoyu ngidu? (Mara. 32:47; Ŵale. 18:5; Ŵahe. 4:12)

  • Ŵerenga Marangu 34:1-12.

    Chinanga wuli Mosese wanguwona Yehova chayiyu cha, kumbi lemba la Marangu 34:10, lilongonji pa ubwezi wo wenga nawu ndi Yehova? (Chitu. 33:11, 20; Maŵe. 12:8)