Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 42: Bulu Walongoro

Nkhani 42: Bulu Walongoro

KUMBI ukumuvwapu bulu wachilongoro? Panyaki ungamuka kuti: ‘Awa, nyama zilongoro cha.’ Kweni Bayibolo likonkhoska kuti bulu wangulongoro. Tiyi tiwoni mo vinguchitikiya.

Mungelu

Sonu Ayisraele ŵenga pafupi kusere m’charu cha Kanani. Ndipu Balaki yo wenga fumu ya ku Moabu, waŵawopanga Ayisraele. Sonu iyu wangutuma munthu wazeru Balamu kuti waluti wakatembi Ayisraele. Balaki wangulayizga Balamu kuti wamupaskengi ndalama zinandi. Mwaviyo, Balamu wangukwera pa bulu waki ndi kwamba ulendu wakuluta kwaku Balaki.

Kweni Yehova wakhumbanga cha kuti Balamu wakatembi ŵanthu Ŵaki. Sonu iyu wangutuma mungelu yo wapinga lipanga kuti wami munthowa kuti Balamu watondeki kudumuwa. Balamu wangumuwona cha mungelu, kweni bulu ndiyu wangumuwona. Mwaviyo, bulu wanguyesesa kundele kumphepeti kuthaŵa mungelu ndipu pakumaliya paki wangugona waka pasi munthowa. Balamu wangukwiya ukongwa, ndipu wangumupuma bulu waki ndi nthonga.

Sonu Yehova wanguchitiska kuti Balamu wavwi bulu waki wachilongoro. Ndipu bulu wangufumba Balamu kuti: ‘Kumbi ndakunangiyanji po utindipuma viyo?’

Balamu wakwera pa bulu

Balamu wangumuka kuti: ‘Wandichitiska nge ndini muzeleza, asani ndenga ndi lipanga mphanyi ndakubaya.’

Ndipu bulu wangufumba kuti: ‘Kumbi chijaliyi ndikukuchitiyapu viyo?’

Balamu wangumuka kuti: ‘Awa.’

Sonu Yehova wanguchitiska Balamu kuti wawoni mungelu yo wanguma panthowa ndi lipanga. Ndipu mungelu yo wangufumba Balamu kuti: ‘Nchifukwa wuli upuma bulu waku? Ndaza kuzikujaliya nthowa kuti ungalutanga cha kuchitemba Ayisraele. Asani bulu waku wanguleka kundithaŵa ndatingi ndikubayengi kweni bulu waku, ndatingi ndimubayengi cha.’

Balamu wanguti: ‘Ndananga, pakuti ndinguziŵa cha kuti imwi mwayima munthowa.’ Sonu mungelu wangumuleka Balamu kuti waluti, ndipu Balamu wangulutirizga ulendu waki wakuchiwonana ndi Balaki. Kweni iyu wangulutirizga mbwenu kuyesa kuchitemba Ayisraele kweni m’malu mwaki Yehova wangumuchitiska kuti waŵatumbiki Ayisraele katatu.

Maŵerengedu 21:21-35; 22:1-40; 23:1-30; 24:1-25.



Mafumbu

  • Kumbi Balaki wenga yani, nanga nchifukwa wuli wangudanisa Balamu?
  • Kumbi nchifukwa wuli bulu waku Balamu wangugona munthowa?
  • Kumbi Balamu wanguvwa bulu wachiŵeleŵetanji?
  • Kumbi mungelu wangumukambiyanji Balamu?
  • Kumbi nchinthu wuli cho chinguchitika po Balamu wayesanga kutemba Ayisraele?

Mafumbu ngakusazgiyapu

  • Ŵerenga Maŵerengedu 21:21-35.

    Kumbi nchifukwa wuli Ayisraele anguthereska Sihoni Fumu ya Amori, kweniso Ogi Fumu ya Bashani? (Maŵe. 21:21, 23, 33, 34)

  • Ŵerenga Maŵerengedu 22:1-40.

    Kumbi Balamu wenga ndi chilatu wuli po wayesanga kutemba Ayisraele, nanga tingasambiranjipu? (Maŵe. 22:16, 17; Ntha. 6:16, 18; 2 Pet. 2:15; Yuda 11)

  • Ŵerenga Maŵerengedu 23:1-30.

    Chinanga wuli Balamu waŵeleŵetanga nge wenga wakusopa Yehova, kweni vo wachitanga vingulongo wuli kuti wasopanga Yehova cha? (Maŵe. 23:3, 11-14; 1 Samu. 15:22)

  • Ŵerenga Maŵerengedu 24:1-25.

    Kumbi nkhani ya m’Bayibolo yeniyi yititiwovya wuli kuti tije ndi chigomezgu chanthazi pa kufiskika kwa khumbu laku Yehova? (Maŵe. 24:10; Yesa. 54:17)