Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 40: Mosese Wapuma Jarawi

Nkhani 40: Mosese Wapuma Jarawi

VYAKA vinandi vingukapu mpaka kufika chaka cha nambala 39. Ndipu Ayisraele ŵenga ŵeche m’chipululu. Kweni pa vyaka vosi ivi, Yehova waŵaphweriyanga ŵanthu ŵaki. Iyu waŵapaskanga mana. Nyengu ya msana waŵalongozganga ndi mtambu ndipu usiku waŵalongozganga ndi motu. Ndipu pa vyaka vosi ivi, vakuvwala vawu vamalanga cha kweniso malundi ngawu ngatupanga cha.

Ayisraele anguzija so pa Kadeshe. Anguzifika pamalu yanga m’mwezi wakwamba wa chaka cha nambala 40, kutuwa pa nyengu yo angutuliya mu Egipiti. Malu yanga ndingu ŵengapu kali panyengu yo azondi 12 angutumika kuchizonda charu cha Kanani, ŵe pafupi kukwaniska vyaka 40. Miriamu, mzichi waku Mosese wangufwiya pa Kadeshe. Ndipu nge mo anguchitiya pakwamba, ŵanthu angwamba so kudandawula.

Panyengu iyi, kwengavi kwakuti ŵanthu angasaniya maji. Sonu yiwu angudandawuliya Mosese kuti: ‘Mphanyi tingufwa waka. Nchifukwa wuli unguchitito ku Egipiti ndi kuza nasi kumalu ngaheni kunu, kwambula chakurya chechosi? Munu mulivi tirigu, nkhuyu, mphereska kweniso makangaza. Ndipu mulivi chinanga ndi maji ngakumwa.’

Mosese wapuma mwa

Ndipu Mosese ndi Aroni ŵati aluta ku chihema kuchisopa, Yehova wangukambiya Mosese kuti: ‘Wunganiska ŵanthu, ndipu ukambi ku jarawi lo, ŵanthu wosi achilereska. Maji nganandi ngatuwengi mu jarawi lo ndipu ŵanthu wosi ndi viŵetu amwengi.’

Sonu Mosese wanguwunganiska ŵanthu ndipu wanguti: ‘Avwani mwaŵanthu yimwi ambula chigomezgu mwaku Chiuta. Kumbi mukhumba kuti ini ndi Aroni tikutuzgiyeni maji mu jarawi ili?’ Pavuli paki, Mosese wangupuma jarawi kaŵi ndi nthonga ndipu mu jarawi mungutuwa maji nganandi ngakukwana ŵanthu wosi ndi viwetu viyo.

Kweni Yehova wangukwiyiya Mosese ndi Aroni. Kumbi wachiziŵa chifukwa chaki? Chenga chifukwa chakuti Mosese ndi Aroni angukamba kuti yiwu atuzgengi maji mu jarawi. Kweni wenga Yehova yo wangutuzga maji. Ndipu chifukwa chakuti Mosese ndi Aroni angukamba boza, Yehova wangukamba kuti waŵalangengi. Iyu wanguŵakambiya kuti: ‘Muŵalongozgengi cha ŵanthu ŵangu kuluta nawu m’charu cha Kanani.

Sonu Ayisraele angutuwaku ku Kadeshe. Ndipu pati pajumpha nyengu yimanavi, angufika paphiri la Horo. Pachanya pa phiri ili ndipu Aroni wangufwiya. Iyu wangufwa we ndi vyaka 123. Ayisraele anguchita chitima ukongwa ndipu angumuliya Aroni kwa mazuŵa 30. Ndipu mwana waki Eleazara ndiyu wenga mula wa asembi wa mtundu wa Yisraele.

Maŵerengedu 20:1-13, 22-29; Marangu 29:5.



Mafumbu

  • Kumbi Yehova waŵaphweriyanga wuli Ayisraele po ŵenga m’chipululu?
  • Kumbi Ayisraele adandawulanganji panyengu yo anguzenga msasa pa Kadeshe?
  • Kumbi Yehova wanguchita wuli kuti wapaski maji ŵanthu ndi viŵetu vawu?
  • Kumbi ndi yani yo watijilongo ndi chikumbu pachithuthuzi po, nanga nchifukwa wuli iyu wachita viyo?
  • Kumbi nchifukwa wuli Yehova wangukwiyiya Mosese ndi Aroni, ndipu wanguŵalanga wuli?
  • Kumbi nchinthu wuli cho chinguchitika paphiri la Horo ndipu ndiyani wanguzija mula wa asembi wa Yisraele?

Mafumbu ngakusazgiyapu

  • Ŵerenga Maŵerengedu 20:1-13, 22-29 ndi Marangu 29:5.

    Kumbi tisambirapunji pa mo Yehova waphweriyanga Ayisraele m’chipululu? (Mara. 29:5; Mate. 6:31; Ŵahe. 13:5; Yako. 1:17)

    Kumbi Yehova wanguviwona wuli vo Mosese ndi Aroni anguchita pakutondeka kumutumbika pamasu pa Ayisraele? (Maŵe. 20:12; 1 Ŵako. 10:12; Chivu. 4:11)

    Kumbi tisambirapunji pa mo Mosese wanguchitiya Yehova wati wamuchenya? (Maŵe. 12:3; 20:12, 27, 28; Mara. 32:4; Ŵahe. 12:7-11)

Ziŵani Vinandi

CHIGONGWI CHA ALINDA

February 2013