Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 38: Azondi 12

Nkhani 38: Azondi 12
Azondi achiyisraele anyamuwa vipasu

AWONA vipasu vo ŵanthu yaŵa apinga. Awona ukulu wa khoroza la mphereska ili. Achita kulipinga ŵanthu ŵaŵi ndipu alimangiliya pa chimiti. Awona so nkhuyu ndi makangaza. Kumbi vipasu vamampha viyo ivi avito pani? Avito ku charu cha Kanani. Kumbi ukumbuka kuti nyengu yinyaki, Abrahamu, Yisaki ndi Yakobe ajanga ku Kanani? Kweni chifukwa chakuti kunguziwa nja yikulu, Yakobe ndi banja laki angusamiya ku Egipiti. Sonu pati pajumpha vyaka 216, Mosese wangulongozga Ayisraele kuwere nawu ku Kanani. Yiwu angufika pamalu nganyaki m’chipululu ngo ngadanika kuti Kadeshe.

M’charu cha Kanani mwenga ŵanthu aheni. Mwaviyo, Mosese wangutuma azondi 12, ndipu wanguŵakambiya kuti: ‘Lutani mukawoni kuti m’charu cho mwe ŵanthu alinga, ndipuso kuti mbanthazi pamwenga mbambula nthazi. Mukawoni so asani charu cho chendi nyata. Ndipu mukayesesi kupingaku vipasu.’

Azondi ŵati awere ku Kadeshe, angukambiya Mosese kuti: ‘Ncharu chamampha ukongwa.’ Ndipu kulongo kuti chenga nadi chamampha, yiwu angumulongo Mosese vipasu vo angupinga. Kweni azondi 10 angukamba kuti: ‘Ŵanthu a m’charu cho mbakuzongomala ndipuso mbanthazi ukongwa. Asani tingachiyesa kulonda charu chawu akutibaya.’

Ayisraele ŵati ŵavwa ivi anguchita mantha. Ndipu angukamba kuti: ‘Kwatingi kuŵengi umampha asani tingufwiya m’charu cha Egipiti, pamwenga munu m’chipululu. Tamufwiya ku nkhondu ndipu ŵana ndi awoli ŵidu amukoleka. Tiyeni tisankhi mulongozgi munyaki m’malu mwaku Mosese, kuti tiwere ku Egipiti.’

Kweni azondi ŵaŵi wo agomezganga Yehova anguyesesa kupembuzga ŵanthu. Mazina ngawu ngenga Yoswa ndi Kalebe. Yiwu angukambiya ŵanthu kuti: ‘Kuwopa cha, Yehova we nasi. Tamulonda charu cho kwambula kusuzgika.’ Kweni ŵanthu anguŵavwiya cha. Ndipu akhumbanga kubaya Yoswa ndi Kalebe.

Ivi vingumukwiyiska ukongwa Yehova ndipu wangukambiya Mosese kuti: ‘Paŵengevi munthu wa vyaka 20 kuluta kunthazi, yo wamusere m’charu cha Kanani. Yiwu anguwona vakuziziswa vosi vo ndinguchita mu Egipiti kweniso m’chipululu, kweni atindigomezga mbwenu cha. Ndipu ayingengi m’chipululu kwa vyaka 40 mpaka wosi ŵafwi. Kweni Yoswa ndi Kalebe ndiwu alutengi m’charu cha Kanani.’

Maŵerengedu 13:1-33; 14:1-38.



Mafumbu

  • Kumbi nchinthu wuli cho uwona pa khoroza la mphereska lo, nanga angutuwa nalu pani?
  • Nchifukwa wuli Mosese wangutuma azondi 12 ku charu cha Kanani?
  • Kumbi azondi 10 anguchikambanji ŵati awere kwaku Mosese?
  • Kumbi azondi ŵaŵi angulongo wuli kuti agomezganga Yehova, kumbi ungazumbuwa mazina ngawu?
  • Kumbi nchifukwa wuli Yehova wangukwiya, nanga wangumukambiyanji Mosese?

Mafumbu ngakusazgiyapu

  • Ŵerenga Maŵerengedu 13:1-33.

    Kumbi mbayani wo angusankhika kuti akazondi charu ndipu ŵenga ndi mwaŵi ukulu wuli? (Maŵe. 13:2, 3, 18-20)

    Kumbi nchifukwa wuli Yoswa ndi Kalebe anguwona vinthu mwakupambana ndi azondi anyaki, nanga venivi vititisambizanji? (Maŵe. 13:28-30; Mate. 17:20; 2 Ŵako. 5:7)

  • Ŵerenga Maŵerengedu 14:1-38.

    Kumbi titenele kukumbuka chenjezu wuli pa nkhani yakudinginyikiya ŵanthu wo amiya Yehova panu pacharu chapasi? (Maŵe. 14:2, 3, 27; Mate. 25:40, 45; 1 Ŵako. 10:10)

    Kumbi lemba la Maŵerengedu 14:24, lilongo wuli kuti Yehova wakondwa ndi muteŵeti waki weyosi? (1 Ŵaka. 19:18; Ntha. 15:3)