Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 37: Chihema Chakusopiyamu

Nkhani 37: Chihema Chakusopiyamu

KUMBI wachiziŵa cho chiwoneka pachithuthuzi ichi? Ichi nchihema chakupaturika chakusopiyamu Yehova. Ŵanthu ŵati atuwa ku Egipiti, angwamba kuzenga chihema ichi ndipu anguchimaliza kwa chaka chimoza. Kumbi utimuziŵa yo wanguchitiska kuti ŵanthu azengi chihema ichi?

Chihema

Wenga Yehova. Panyengu yo Mosese wenga paphiri la Sinai, Yehova wangumukambiya mo wangazenge chihema ichi. Wangumukambiya kuti wachizengi mwakuti chingazisuzganga cha kuchipasuwa. Kamangiru yaka, kawovyanga kuti vipangizu va chihema ichi vipingikengi kwambula kusuzga kuluta navu malu nganyaki kuti akachizengi so. Mwaviyo, Ayisraele achisamiya ku malu nganyaki m’chipululu, apinganga chihema.

Asani ungawona mukati mwa chipinda chimana cho che kumazge kwa chihema, uwonengemu bokosi. Ilu lidanika kuti bokosi la phanganu. Pachanya pa bokosi ili pe angelu ŵaŵi, pamwenga kuti akerubi. Akerubi yaŵa akupangika ndi golidi ndipu kuwumalilu kwekosi kwa bokosi ili kwe m’ngelu yumoza. Chiuta wangulemba so Malangu 10 pa mya yiŵi, chifukwa chakuti Mosese wanguswa mya yakwamba. Mya iyi yasungikanga mukati mwa bokosi la phanganu. Mukati mwenimo angusungamu so kachiŵiya ko anguŵikamu mana. Kumbi utingakumbuka mana?

Yehova wangusankha Aroni muku waki waku Mosese kuti waje mula wa asembi. Iyu ndiyu walongozganga ŵanthu pakusopa Yehova. Ndipu ŵana ŵaki nawu ŵenga asembi.

Sonu awona chipinda chikulu muchihema mo. Ichu nchikulu ndipu chipinda chimana cho chiselemu kaŵi. Kumbi waliwona bokosi lo pachanya paki pasunkha josi? Ilu ndi guŵa lo asembi awotchapu vinthu vakununkhira umampha vo atividana kuti libani. Kweniso pe chakuŵikapu nyali cho che ndi nyali 7. Ndipu chinthu chachitatu cho che m’chipinda ichi ndi thebulu. Pathebulu lenilo asungangapu viŵandi 12 va mkati.

Pa balaza la chihema ichi, pe so beseni likulu lakuzaza maji. Asembi atiligwirisiya nchitu pakusamba m’manja ndi m’malundi. Ndipuso pe guŵa la sembi likulu. Pa guŵa ili, awotchiyapu nyama zo apereka sembi kwaku Yehova. Chihema ichi che pakatikati pa msasa wa Ayisraele.

Chituwa 25:8-40; 26:1-37; 27:1-8; 28:1; 30:1-10, 17-21; 34:1, 2; Ŵahebere 9:1-5.



Mafumbu

  • Kumbi nyumba yo ye pachithuthuzi yidanika kuti wuli, ndipu atiyigwiriskiya nchitu wuli?
  • Nchifukwa wuli Yehova wangukambiya Mosese kuti wapangi chihema chambula kusuzga kuchipasuwa?
  • Kumbi ndi bokosi wuli lo le m’chipinda chimana cho che kumazge kwa chihema, nanga mukati mwaki mwenji?
  • Kumbi Yehova wangusankha yani kuti waje mula wa asembi, nanga mula wa asembi wachitanganji?
  • Zumbuwa vinthu vitatu vo ve m’chipinda chikulu cha chihema.
  • Kumbi ndi vinthu viŵi nivi vo ve pa balaza la chihema, ndipu ativigwiriskiya nchitu wuli?

Mafumbu ngakusazgiyapu

  • Ŵerenga Chituwa 25:8-40; 26:1-37; 27:1-8; 28:1.

    Kumbi akerubi wo ŵe pa “bokosi la phanganu” amiyanganji? (Chitu. 25:20, 22; Maŵe. 7:89; 2 Ŵaka. 19:15)

  • Ŵerenga Chituwa 30:1-10, 17-21; 34:1, 2; ndi Ŵahebere 9:1-5.

    Kumbi nchifukwa wuli Yehova wangulongo kuti uchanda wenga wakukhumbika ukongwa kwa asembi wo ateŵetiyanga pachihema, ndipu isi vititikwaska wuli mazuŵa nganu? (Chitu. 30:18-21; 40:30, 31; Ŵahe. 10:22)

    Kumbi wakutumika Paulo wangulongo wuli kuti chihema ndi phanganu la Dangu vingumala nchitu panyenguyo iyu walembiyanga kalata Akhristu a Chihebere? (Ŵahe. 9:1, 9; 10:1)