Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 36: Mwana wa Ng’ombi Wagolidi

Nkhani 36: Mwana wa Ng’ombi Wagolidi

KUMBI ŵanthu yaŵa achitanji sonu? Yiwu asopa mwana wa ng’ombi. Kumbi nchifukwa wuli yiwu achita venivi?

Mosese wati waja nyengu yitali kuphiri, ŵanthu angukamba kuti: ‘Tachiziŵa cha cho chamuchitikiya Mosese. Sonu tiyeni tipangi chiuta wakuti watilongozgi pakutuwa m’charu ichi.’

Mosese wataya pasi mya yiŵi

Aroni, muku waku Mosese, wanguti: ‘Chamampha, zuwani ndeŵereŵi zinu zagolidi mundipaski.’ Ndipu ŵanthu ŵati amupaska, Aroni wanguzisongono ndi kupanga mwana wa ng’ombi wagolidi. Ndipu ŵanthu angukamba kuti: ‘Uyu ndiyu Chiuta widu, mweniyo wakutituzga ku Egipiti.’ Mwaviyo Ayisraele anguchita sekeresu likulu ndi kusopa mwana wa ng’ombi wagolidi.

Yehova wati wawona ivi, wangukwiya ukongwa. Ndipu wangukambiya Mosese kuti: ‘Yendeska, sika liŵiliŵi. Ŵanthu achita chinthu chiheni ukongwa. Aluwa malangu ngangu ndipu asopa mwana wa ng’ombi wagolidi.’

Ŵanthu asopa mwana wa ng’ombi wa golidi

Mosese wangusika liŵiliŵi kutuwa kuphiri. Ndipu wati wafika pafupi, wanguwona kuti ŵanthu asopa nadi mwana wa ng’ombi. Ŵanthu ambanga ndi kuvina kuzunguliya mwana wa ng’ombi wagolidi. Mosese wangukwiya ukongwa, mwakuti wanguponya pasi mya yiŵi yo pangulembeka malangu ndipu yingusweka. Ndipu wanguto mwana wa ng’ombi wagolidi ndi kumusongono. Pavuli paki wangumusira kuja fuvu.

Ŵanthu yaŵa anguchita chinthu chiheni ukongwa. Mwaviyo, Mosese wangutuma anthurumi anyaki kuti ato malipanga. Ndipu wangukamba kuti: ‘Ŵanthu aheni wo asopanga mwana wa ng’ombi wagolidi abayiki.’ Ndipu anthurumi yaŵa angubaya ŵanthu akukwana 3,000. Kumbi ivi vilongo cha kuti titenere kusopa Yehova pe, kuleka kusopa achiuta aboza?

Chituwa 32:1-35.



Mafumbu

  • Kumbi ŵanthu wo ŵe pachithuthuzi achitanji, nanga nchifukwa wuli yiwu achita venivi?
  • Kumbi nchifukwa wuli Yehova wangukwiya, ndipu Mosese wanguchitanji wati wawona vo ŵanthu achitanga?
  • Kumbi Mosese wangukambiya anthurumi anyaki kuti achitenji?
  • Kumbi nkhani iyi yititisambizanji?

Mafumbu ngakusazgiyapu

  • Ŵerenga Chituwa 32:1-35.

    Kumbi nkhani iyi yilongo kuti Yehova watikuwona wuli kusazga kusopa kwauneneska ndi kwaboza? (Chitu. 32:4-6, 10; 1 Ŵako. 10:7, 11)

    Kumbi ndi chenjezu wuli lo Akhristu atenele kulondo pakusankha vakusangaluska nge kumba ndi kuvina? (Chitu. 32:18, 19; Ŵaefe. 5:15, 16; 1 Yoha. 2:15-17)

    Kumbi ŵana ŵaku Levi atitipaska chakuwoniyapu wuli pakumiya urunji? (Chitu. 32:25-28; Sumu 18:25)