Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 35: Yehova Wapereka Malangu Ngaki

Nkhani 35: Yehova Wapereka Malangu Ngaki

PATI pajumpha myezi yiŵi Ayisraele ŵati atuwa mu Egipiti, yiwu angufika ku Phiri la Sinai, lo lidanika so kuti Horebe. Malu yanga ndingu Yehova wangukambiskanapu ndi Mosese, kutuliya m’chivwati cho chingukole motu. Ayisraele anguzenga msasa wawu pamalu yanga kwa mazuŵa ngamanavi.

Mosese wati wakwera ku phiri, ŵanthu amulindizganga m’mphepeti mwa phiri. Mosese we pachanya pa phiri, Yehova wangumukambiya kuti Iyu wakhumba kuti Ayisraele amuvwiyengi kuti azije ŵanthu ŵaki apade. Mosese wati wasika, wangukambiya Ayisraele vo Yehova wangukamba. Ndipu ŵanthu angukamba kuti yiwu avwiyengi Yehova, chifukwa akhumba kuja ŵanthu ŵaki.

Sonu Yehova wanguchita chinthu chinyaki chachilendu. Wanguchitiska kuti pachanya pa phiri pachiti josi kweniso limphezi. Ndipu wangukambiya so ŵanthu kuti: ‘Ndini Yehova Chiuta winu yo wakukutuzgani mu Egipiti.’ Ndipu wanguŵalamula kuti: ‘Mungasopanga achiuta anyaki cha kweni musopengi ini pe.’

Mya yiŵi

Chiuta wangupaska Ayisraele malangu nganyaki so 9. Ŵanthu anguchita mantha ukongwa. Ndipu angukambiya Mosese kuti: ‘Iwi ndiwi ulongoro nasi, chifukwa tiwopa kuti asani Chiuta wangalongoro nasi mbwenu tifwengi.’

Pavuli paki Yehova wangukambiya Mosese kuti: ‘Kwere kunu ku phiri. Ndipu ndikupaskengi mya yiŵi yo ndalembapu malangu ngangu ngo ndikhumba kuti ŵanthu angasungi.’ Sonu Mosese wangukwera so ku phiri. Iyu wanguja kweniko kwa mazuŵa 40.

Chiuta wenga ndi malangu nganandi ngakuti wapaski ŵanthu ŵaki. Ndipu Mosese wangulemba malangu ngosi. Chiuta wangupaska so Mosese mya yiŵi. Pa mya iyi, Chiuta wangulembapu yija malangu 10 ngo wangukambiya ŵanthu wosi. Ndipu ngadanika kuti Malangu 10.

Mosese pa Phiri la Sinai

Malangu 10 yanga ngakukhumbika ukongwa. Kweni malangu nganyaki so ngo Chiuta wangupaska Ayisraele nangu ngakukhumbika ukongwa. Dangu limoza pa malangu yanga ndakuti: ‘Uyanjengi Yehova Chiuta waku ndi mtima waku wosi, maŵanaŵananu ngaku ngosi, umoyu waku wosi ndipuso nthazi zaku zosi.’ Ndipu linyaki ndakuti: ‘Uyanjengi munyaku nge po utijiyanjiya wamweni.’ Mwana waku Chiuta, Yesu Khristu, wangukamba kuti malangu ngaŵi yanga, ngo Yehova wangupaska ŵanthu ŵaki Ayisraele ndingu ngenga ngakulungakulu. Kunthazi tisambirengi vinthu vinandi vakukwaskana ndi Mwana waku Chiuta kweniso vo iyu wasambizanga.

Chituwa 19:1-25; 20:1-21; 24:12-18; 31:18; Marangu 6:4-6; Ŵalevi 19:18; Mateyu 22:36-40.



Mafumbu

  • Pati pajumpha pafupifupi myezi yiŵi, Ayisraele ŵati atuŵa ku Egipiti, kumbi anguchizenga pani msasa wawu?
  • Kumbi Yehova wangukamba kuti wakhumbanga kuti ŵanthu achitengenji ndipu yiwu angumukanji?
  • Nchifukwa wuli Yehova wangupaska Mosese mya yiŵi?
  • Kumbi ndi malangu nganyaki nanga ngo Yehova wangupaska Ayisraele kusazgiyapu pa Malangu 10?
  • Kumbi Yesu Khristu wangukamba kuti malangu ngaŵi ngakulungakulu ngenga nanga?

Mafumbu ngakusazgiyapu

  • Ŵerenga Chituwa 19:1-25; 20:1-21; 24:12-18; 31:18.

    Kumbi mazu ngo nge pa lemba la Chituwa 19:8, ngatitiwovya wuli kuziŵa cho chikhumbika pa kujipereka kwa Chikhristu? (Mate. 16:24; 1 Pet. 4:1-3)

  • Ŵerenga Marangu 6:4-6; Ŵalevi 19:18; ndi Mateyu 22:36-40.

    Kumbi Akhristu alongo wuli kuti atanja Chiuta ndi anasi ŵawu? (Marko 6:34; Machi. 4:20; Ŵaro. 15:2)