KUMBI waviziŵa vo ŵanthu atondo pasi po? Yiwu atondo vinthu vakuwoneka nge matalala kweni ndi matalala cha, nchakurya.

Ayisraele atondo mana

Ayisraele wati atuwa ku Egipiti, pangujumpha waka mwezi umoza pe kuti azifiki m’chipululu. Chakurya chenga chakusuzga m’chipululu ndipu ŵanthu angwamba kudandawula kuti: ‘Ku Egipiti kwenga kwamampha ukongwa chifukwa kwenga vakurya vosi vo takhumbanga.’

Sonu Yehova wanguti: ‘Ndiwiskengi chakurya kutuwa kuchanya.’ Ndipu ivi ndivu nadi Yehova wanguchita. Kwati kwacha, Ayisraele anguwona vinthu vituŵa venivo vinguwa, ndipu angufumbana kuti: ‘Kumbi ivi ndi vinthu wuli?’

Mosese wanguŵamuka kuti: ‘Ichi nchakurya chenicho Yehova wakupaskani kuti muryengi.’ Ndipu ŵanthu anguchidana kuti MANA. Chakurya ichi chanowanga nge makeki ngakudaku uchi.

Mosese wangukambiya ŵanthu kuti: ‘Weyosi watondongi mana ngakuti wangaguta.’ Sonu yiwu achitanga ivi mulenji wewosi. Kweni asani lumwi lafunda, mana ngo ngajangaku kwambula kungatondo ngasongonokanga.

Mosese wanguŵakambiya so kuti: ‘Paŵevi munthu wakusunga mana kufika mlenji unyaki.’ Kweni ŵanthu anyaki avwiyanga cha. Kumbi waviziŵa vo vachitikanga? Mana ngosi ngo asunganga kufika mlenji unyaki, ngachitanga mphorozi ndipu nganunkhanga.

Kweni pa sabata yeyosi penga zuŵa limoza lo Yehova wangukambiya ŵanthu kuti atondongi mana nganandi kuphara ngo atondonga mazuŵa nganyaki. Ili lenga zuŵa la nambala 6. Ndipu Yehova wanguŵakambiya kuti pazuŵa ili, asungengi mana nganyaki kuti aziryi pa zuŵa la nambala 7, lo iyu walekanga kuwiska mana. Mana ngo asunganga kuti aziryi pazuŵa la nambala 7 ngachitanga mphorozi cha ndipuso nganunkhanga cha. Ichi chenga chakuziziswa chinyaki.

Vyaka vosi vo Ayisraele ŵenga m’chipululu, Yehova waŵapaskanga mana

Chituwa 16:1-36; Maŵerengedu 11:7-9; Yoswa 5:10-12.



Mafumbu

  • Kumbi pachithuthuzi po ndi vinthu wuli vo ŵanthu atondo?
  • Kumbi Mosese wanguŵalunguchizganji ŵanthu wo atondonga mana?
  • Kumbi Yehova wangukambiya ŵanthu kuti achitengenji pazuŵa la nambala 6, ndipu nchifukwa wuli?
  • Kumbi nchakuziziswa wuli cho Yehova wachitanga asani mana ngasungika mpaka pazuŵa la nambala 7?
  • Kumbi Yehova wanguryisa ŵanthu ŵaki mana kwa vyaka vilinga?

Mafumbu ngakusazgiyapu

  • Ŵerenga Chituwa 16:1-36 ndi Maŵerengedu 11:7-9.

    Kumbi lemba la Chituwa 16:8 lilongonji pankhani ya kutumbika ŵanthu wo aŵikika paudindu mu mpingu wachikhristu? (Ŵahe. 13:17)

    Kumbi m’chipululu, Ayisraele akumbuskikanga wuli kuti atenele kugomezga Yehova nyengu zosi? (Chitu. 16:14-16, 35; Mara. 8:2, 3)

    Kumbi Yesu wangukamba kuti mana ngamiyanganji, ndipu isi tiyanduwa wuli kutuwa ku ‘chiŵandi chakutuwa kuchanya’ chenichi? (Yoha. 6:31-35, 40)

  • Ŵerenga Yoswa 5:10-12.

    Kumbi Ayisraele angurya mana kwa vyaka vilinga ndipu ivi vingwesa wuli kugomezgeka kwawu, nanga nkhani yeniyi yititisambizanji? (Chitu. 16:35; Maŵe. 11:4-6; 1 Ŵako. 10:10, 11)