Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 55: Mnyamata Wateŵete Chiuta

Nkhani 55: Mnyamata Wateŵete Chiuta

MNYAMATA we pachithuthuzi ichi ngwakutowa, asi viyo? Zina laki ndi Samuele. Ndipu munthu yo wako pamutu paku Samuele ndi Eli, mula wa asembi wa Ayisraele. Anyaki wo mba Elkana, awiski aku Samuele ndipu anyaki wo mbanyina a Hana. Ndipu yiwu ŵaza ndi Samuele kwaku Eli.

Samuele wakumana ndi wasembi mura Eli

Samuele we ndi vyaka pafupifupi vinkhondi. Iyu wajengi mu chihema chaku Yehova limoza ndi Eli kweniso asembi anyaki. Kumbi nchifukwa wuli Elkana ndi Hana atimupereka Samuele weche munamana kuti wateŵete Yehova pa chihema? Tiyi tiwoni.

Pangujumpha waka vyaka vimanavi kutuwa panyengu yo Hana wenga ndi chitima chikulu ukongwa. Iyu wenga ndi chitima chifukwa chakuti wabalanga cha, ndipu wakhumbisiskanga kuti waje ndi mwana. Sonu zuŵa linyaki Hana wati waluta ku chihema chaku Yehova, iyu wanguromba kuti: ‘Yehova mungandiluwanga cha, asani mungandipaska mwana munthurumi, ndilayizga kuti ndimuperekengi kwinu kuti wakakuteŵetiyeni umoyu waki wosi.’

Yehova wangumuka rombu laku Hana. Ndipu pati pajumpha myezi, iyu wangubala Samuele. Hana wangumuyanja ukongwa mwana waki, ndipu wangwamba kumusambiza zaku Yehova weche mwana. Hana wangukambiya murumu waki kuti: ‘Asani Samuele wakuwa kweniso waleka kuwonkha ndakumupereka ku chihema kuti wakateŵete Yehova.’

Sonu ivi ndivu Hana ndi Elkana anguchita nge mo tiwone pachithuthuzi yichi. Chifukwa chakuti Samuele wangusambizika umampha ndi apapi ŵaki, iyu sonu ngwakukondwa ukongwa kuti wateŵetiyengi Yehova pa chihema chaki. Chaka ndi chaka Hana ndi Elkana alutanga kuchisopa ku chihema chakupaturika ndipuso kuchiwona mwana wawu. Hana wasonanga mkhanju chaka ndi chaka ndipu wachipaskanga Samuele.

Samuele wangulutirizga kuteŵete Yehova pa chihema ndipu Yehova kweniso ŵanthu amuyanjanga ukongwa. Kweni Hofini ndi Finehasi ŵana ŵaku Eli mula wa asembi ŵenga ŵanthu aheni. Yiwu achitanga vinthu vinandi viheni ndipu achitiskanga so ŵanthu anyaki kuleka kuvwiya Yehova nge mo achitiyanga yiwu. Eli wakhumbikanga kulekeska ŵana ŵaki nchitu ya usembi, kweni iyu wanguchita viyo cha.

Samuele wanguzomerezga cha kuti vinthu viheni vo vachitikanga pa chihema, vimutondekeski kuteŵete Yehova. Kweni chifukwa chakuti ŵanthu wo ayanjanga ukongwa Yehova ŵenga amanavi, pangujumpha nyengu yitali Yehova wechendakambiskani ndi munthu weyosi. Sonu Samuele wati wakuwa panguchitika vinthu vinyaki.

Zuŵa linyaki Samuele wati wagona mu chihema, wanguvwa kudana. Ndipu iyu wangumuka kuti: ‘Nde pano!’ Ndipu wanguyuka ndi kutchimbiriya kwaku Eli, ndi kumukambiya kuti: ‘Ndaza pakuti ndavwa kudana.’

Kweni Eli wangumuka kuti: ‘Ndakudana cha, luta kagoni.’ Sonu Samuele ŵanguluta kuchigona.

Iyu wanguvwa kudana kachiŵi kuti: ‘Samuele!’ Ndipu Samuele wanguyuka ndi kutchimbiriya so kwaku Eli. Iyu wanguti: ‘Ndaza pakuti ndavwa kudana.’ Kweni Eli wanguti: ‘Ndakudana cha mwana wangu. Luta kagoni so.’ Ndipu Samuele wanguluta kuchigona.

Wanguvwa kudana kachitatu kuti: ‘Samuele!’ ndipu Samuele wangutchimbiriya kwaku Eli. Ndipu wanguti: ‘Ndaza, pakuti sonu ndavwa kuti ndimwi nadi mwandidana.’ Eli wanguziŵa kuti yo wamudananga watenere kuti wenga Yehova. Sonu wangukambiya Samuele kuti: ‘Luta kagoni, asani wachikudana so, ukamuki kuti: Kambani Yehova pakuti muteŵeti winu watuvwa.’

Ivi ndivu Samuele wangumuka wati wadanika so ndi Yehova. Ndipu Yehova wangukambiya Samuele kuti, walangengi Eli ndi ŵana ŵaki. Pavuli paki, Hofini ndi Finehasi angubayika ndi Afilisti ku nkhondu ndipu Eli wati wavwa vo vinguchitika wanguwa pasi ndipu khosi laki lingufyoka ndipu nayu wangufwiya penipo. Sonu mazu ngaku Yehova ngangufiskika nadi.

Samuele wati wakuwa wanguzija mweruzgi wakumaliya wa Ayisraele. Ndipu wati wakota, ŵanthu angumupempha kuti: ‘Tisankhiyeni fumu yo yitilamuliyengi.’ Samuele wakhumbanga cha kuchita vo ŵanthu angumupempha, chifukwa iyu wanguziŵa kuti Yehova ndiyu wenga fumu yawu. Kweni Yehova wangumukambiya kuti wavwiyi vo ŵanthu angumukambiya.

1 Samuele 1:1-28; 2:11-36; 4:16-18; 8:4-9.



Mafumbu

  • Kumbi mnyamata yo we pachithuthuzi zina laki ndiyani, nanga anyaki wo mbayani?
  • Kumbi zuŵa linyaki Hana wangurombanji panyengu yo wanguluta ku chihema chaku Yehova, nanga Yehova wangumumuka wuli?
  • Kumbi Samuele wenga ndi vyaka vilinga po wangutoreke kuti wakateŵete pa chihema chaku Yehova, ndipu anyina amuchitiyanganji chaka chechosi?
  • Zumbuwa mazina nga ŵana aku Eli, nanga yiwu ŵenga ndi nkharu wuli?
  • Kumbi Yehova wangumudana wuli Samuele, ndipu wangumupaska uthenga wuli?
  • Kumbi Samuele wati wakuwa wanguzija yani, ndipu nchinthu wuli cho chinguzichitika wati wakota?

Mafumbu ngakusazgiyapu

  • Ŵerenga 1 Samuele 1:1-28.

    Kumbi nchakuwoniyapu chamampha wuli ku mitu ya mabanja cho Elkana wangulongo pakuja mulongozgi pa kusopa kwauneneska? (1 Samu. 1:3, 21; Mate. 6:33; Ŵafi. 1:10)

    Kumbi tisambiranji pa mo Hana wanguchitiya ndi suzgu lakumala zeru lo wangukumana nalu? (1 Samu. 1:10, 11; Sumu 55:22; Ŵaro. 12:12)

  • Ŵerenga 1 Samuele 2:11-36.

    Kumbi Eli wangutumbika wuli ŵana ŵaki kuluska Yehova, ndipu ivi vitititcheŵeskanji? (1 Samu. 2:22-24, 27, 29; Mara. 21:18-21; Mate. 10:36, 37)

  • Ŵerenga 1 Samuele 4:16-18.

    Kumbi ndi vinthu vinayi nivi vo vikukambika mu uthenga wa soka wo ungutuliya ku nkhondu, ndipu ivi vingumukwaska wuli Eli?

  • Ŵerenga 1 Samuele 8:4-9.

    Kumbi nchinthu wuli cho Ayisraele anguchita cho chingumuguŵiska ukongwa Yehova, nanga isi tingalongo wuli kuti tiwovya Ufumu waki mwakugomezgeka mazuŵa nganu? (1 Samu. 8:5, 7; Yoha. 17:16; Yako. 4:4)

Ziŵani Vinandi

SAMBIZANI ŴANA ŴINU

Samuele Wangulutirizga Kuchita Vinthu Vamampha

Kumbi ungamuyezga wuli Samuele ndipuso kulutirizga kuchita vinthu vamampha chinanga kuti ŵanthu anyaki achita vinthu viheni?

YEZGANI CHIVWANU CHAWU

Samuele ‘Wangulutirizga Kukuwa Umampha Wachilumbika’ Ndi Yehova

Kumbi nchitu wuli cho nchakuziziswa pa nkhani ya mo Samuele wakulereke? Nchinthu wuli cho chingumuwovya kuti chivwanu chaki chilutirizgi kukuwa pa nyengu yo wenga pachihema?