Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 52: Gideoni ndi Ankhondu Ŵaki 300

Nkhani 52: Gideoni ndi Ankhondu Ŵaki 300

KUMBI waviwona vo vichitika yapa? Ŵanthu wosi yaŵa mbankhondu a Chiyisraele. Ŵanthu wo asindama atumwa maji. Yo wama nawu pafupi ndi mweruzgi Gideoni. Iyu wawona po ŵanthu yaŵa amwiya maji.

Woneseska mo ŵanthu wo amwiya maji. Anyaki achita kunamiya pa kumwa maji. Kweni yumoza wakotama ndipu watumwa maji ndi janja laki kuti wawonengi vo vichitika. Iyu wachita umampha ukongwa chifukwa Yehova wangukambiya Gideoni kuti wasankhi ŵanthu ŵija wo ajengi akutcheŵa pakumwa maji. Chiuta wangukamba kuti anyaki wosi ŵaŵawezge kunyumba. Tiyi tiwoni chifukwa chaki.

Ayisraele angukumana so ndi masuzgu nganandi, chifukwa chakuleka kuvwiya Yehova. Amidiyani ŵenga ndi nthazi kuphara yiwu ndipu aŵabayanga. Sonu Ayisraele angupempha Yehova kuti waŵawovyi ndipu Yehova wanguvwa pemphu lawu.

Yehova wangukambiya Gideoni kuti wato gulu lankhondu, sonu Gideoni wanguwunganiska asilikali 32,000. Kweni gulu lankhondu lo latingi likachitengi nkhondu ndi Ayisraele lenga ndi ŵanthu 135,000. Sonu Yehova wangukambiya Gideoni kuti: ‘Asilikali wo wato mbanandi ukongwa.’ Nchifukwa wuli Yehova wangukamba viyo?

Chenga chifukwa chakuti asani Ayisraele angupunda nkhondu, atingi aŵanaŵanengi kuti nchifukwa cha nthazi zawu ndipuso kuti akhumbikanga chovyu chaku Yehova cha kuti apundi nkhondu. Sonu Yehova wangukambiya Gideoni kuti: ‘Akambiyi wosi wo ŵe ndi mantha kuti awere kunyumba.’ Ndipu Gideoni wati waŵakambiya, asilikali 22,000 anguwere kunyumba. Iyu wanguja ndi asilikali 10,000 kuti akachiti nkhondu ndi asilikali 135,000.

Gideoni watesa ŵanthu ŵaki

Kweni yivwa vo Yehova wangukamba, iyu wanguti: ‘Asilikali wo wato ŵeche anandi.’ Sonu wangukambiya Gideoni kuti waluti nawu ku msinji kuti akamwi maji ndipu wosi wo amuchita kunamiya pakumwa maji, wakaŵawezge kunyumba. Sonu Yehova wangumulayizga kuti, ‘Ndichitiskengi kuti ukapundi nkhondu ndi asilikali 300 wo ŵenga akutcheŵa pakumwa maji.’

Nyengu ya nkhondu yati yakwana, Gideoni wangugaŵa asilikali 300 m’magulu ngatatu. Weyosi wangumupaska mbata ndi kachiŵiya ko kenga ndi nyali mukati. Pakati pa usiku, wosi anguwungana kuzunguliya msasa wa arwani ŵaŵu. Ndipu nyengu yeniyo, wosi angumba mbata ndi kuswa tiviŵiya ndipu angudanirizga kuti: ‘Lipanga laku Yehova ndi laku Gideoni!’ Arwani ŵaŵu ŵati ayuka, angutimbanyizika ndipuso ŵenga ndi mantha. Wosi angwamba kuthaŵa, ndipu Ayisraele angupunda nkhondu.

Ŵeruzgi chaputala 6 mpaka 8.



Mafumbu

  • Kumbi Ayisraele angukumana ndi masuzgu wuli ndipu chenga chifukwa wuli?
  • Kumbi nchifukwa wuli Yehova wangukambiya Gideoni kuti wanguto asilikali anandi ukongwa?
  • Kumbi Gideoni wati wakambiya ŵanthu wo ŵenga ndi mantha kuti awere kunyumba, wanguja ndi asilikali alinga?
  • Nge mo uwone pachithuthuzi, konkhoska mo Yehova wangutuzgiyaku nambala ya asilikali aku Gideoni kuja asilikali 300.
  • Kumbi Gideoni wanguŵagaŵa wuli asilikali ŵaki 300, nanga Ayisraele angupunda wuli nkhondu?

Mafumbu ngakusazgiyapu

  • Ŵerenga Ŵeruzgi 6:36-40.

    Kumbi Gideoni wanguwoneseska wuli kuti khumbu laku Yehova lafiskika?

    Kumbi isi mazuŵa nganu titiliziŵa wuli khumbu laku Yehova? (Ntha. 2:3-6; Mate. 7:7-11; 2 Timo. 3:16, 17)

  • Ŵerenga Ŵeruzgi 7:1-25.

    Kumbi tisambiranji kwa asilikali 300 wo angulutirizga kuja akutcheŵa kupambana ndi anyaki wo anguleka kutcheŵa? (Ŵeru. 7:3, 6; Ŵaro. 13:11, 12; Ŵaefe. 5:15-17)

    Kumbi tisambira wuli mwa kulondo Yesu Khristu yo ndi Gideoni Mura, nge mo asilikali 300 angusambiriya mwa kulondo Gideoni? (Ŵeru. 7:17; Mate. 11:29, 30; 28:19, 20; 1 Pet. 2:21)

    Kumbi fundu ya pa lemba la Ŵeruzgi 7:21 (NW), yakuti: “angulutirizga kuma weyosi pamalu ngaki,” yititiwovya wuli kuti titenele kukhorwa kuteŵete kwekosi ko tingatumika, m’gulu laku Yehova? (1 Ŵako. 4:2; 12:14-18; Yako. 4:10)

  • Ŵerenga Ŵeruzgi 8:1-3.

    Asani tapambana maŵanaŵanu ndi mubali pamwenga mzichi, kumbi tisambiranji pa mo Gideoni wangumaliskiya mphindanu yo yengapu ndi Aefraimu? (Ntha. 15:1; Mate. 5:23, 24; Luka 9:48)