Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 50: Anthukazi Ŵaŵi Achiganga

Nkhani 50: Anthukazi Ŵaŵi Achiganga

AYISRAELE ŵati akumana ndi masuzgu, yiwu angumupempha Yehova. Ndipu Yehova wanguŵamuka mwakuŵapaska alongozgi ambula mantha kuti aŵawovyi. Bayibolo litiŵadana alongozgi yaŵa kuti ŵeruzgi. Yoswa wenga mweruzgi wakwamba ndipu anyaki wo anguza pavuli paki ŵenga Otniele, Ehudi ndi Shamgara. Kweni pa ŵanthu wo anguwovya Ayisraele penga anthukazi ŵaŵi, Debora ndi Jaelu.

Debora wakambiskana ndi Baraki

Debora wenga mchimi. Yehova wamukambiyanga vo vichitikengi munthazi ndipu iyu wakambiyanga ŵanthu vo Yehova wamukambiya. Debora wenga so mweruzgi. Iyu wajanga pasi pa chimiti cha kanchindi kumapiri ndipu ŵanthu alutanga kwaku iyu kuti wakaŵawovyi masuzgu ngawu.

Panyengu iyi, Yabini ndiyu wenga fumu ya ku Kanani. Iyu wenga ndi magareta nga nkhondu 900. Gulu laki lankhondu lenga lanthazi ukongwa ndipu ivi vinguchitiska kuti Ayisraele anandi achichizgiki kuja anchitu ŵaki. Ndipu mula wa gulu lankhondu la Fumu Yabini wenga Sisera.

Zuŵa linyaki Debora wangutuma uthenga kwaku Mweruzgi Baraki kuti: ‘Yehova wakamba kuti: “Uto anthurumi 10,000 ndipu uluti nawu ku Phiri la Taboro. Kweniko, ndakumupereka Sisera m’janja laku. Ndipu ndamuchitiska kuti iwi ukamuthereski pamoza ndi gulu laki lankhondu.”’

Baraki wangukambiya Debora kuti: ‘Ndilutengi asani nawi ulutengi.’ Debora wanguluta nayu kweni wangukambiya Baraki kuti: ‘Urumbikengi ndiwi cha chifukwa cha kupunda uku, chifukwa Yehova waperekengi Sisera m’janja la munthukazi.’ Ndipu ivi ndivu vinguchitika.

Baraki wangusika ku Phiri la Taboro kuti wakakumani ndi asilikali aku Sisera. Mwamabuchibuchi, Yehova wanguchitiska zandi, ndipu asilikali anandi aku Sisera angubira. Kweni Sisera wangusika pa gareta laki ndipu wanguthaŵa.

Baraki, Jaelu ndi Sisera

Pati pajumpha kanyengu kamanavi waka, Sisera wangufika ku hema laku Jaelu. Ndipu Jaelu, wangumudaniya mu hema laki ndipu wangumupaska mukaka. Wati wamwa mukaka wangugona tulu takufwa natu. Ndipu Jaelu wanguto chisulu chakukhome hema ndi kukhoma nachu munthu muheni uyu ku mutu. Pavuli paki Baraki wati waza, Jaelu wangumulongo Sisera, kweni yapa ndipu wafwa. Sonu ungawona kuti vo wangukamba Debora vinguchitika nadi.

Pakumaliya paki Fumu Yabini nayu yingubayika ndipu Ayisraele angusaniya so chimangu kwa kanyengu kamanavi.

Ŵeruzgi 2:14-22; 4:1-24; 5:1-31.



Mafumbu

  • Kumbi ŵeruzgi mbayani, ungazumbuwa mazina nga ŵeruzgi anyaki?
  • Kumbi ndi nchitu yapade niyi yo Debora wenga nayu, nanga nchitu yeniyi yasazgangapunji?
  • Ayisraele ŵati awofyezeka ndi Fumu Yabini kweniso mura wa asilikali ŵaki Sisera, kumbi ndi uthenga wuli wakutuliya kwaku Yehova wo Debora wangupereka kwa Mweruzgi Baraki, ndipu ndi yani yo iyu wangukamba kuti walumbikengi?
  • Kumbi Jaelu wangulongo wuli kuti wenga munthukazi wachiganga?
  • Kumbi nchinthu wuli cho chinguchitika Fumu Yabini yati yafwa?

Mafumbu ngakusazgiyapu

  • Ŵerenga Ŵeruzgi 2:14-22.

    Kumbi Ayisraele anguchitanji kuti Yehova waŵakwiyiyi, ndipu isi tisambiranjipu? (Ŵeru. 2:20; Ntha. 3:1, 2; Ezek. 18:21-23)

  • Ŵerenga Ŵeruzgi 4:1-24.

    Kumbi anthukazi Achikhristu mazuŵa nganu asambiranji pa chigomezgu ndi chiganga cho Debora ndi Jaelu angulongo? (Ŵeru. 4:4, 8, 9, 14, 21, 22; Ntha. 31:30; 1 Ŵako. 16:13)

  • Ŵerenga Ŵeruzgi 5:1-31.

    Kumbi sumu yakupunda yo Baraki ndi Debora angumba, tingayigwiriskiya wuli nchitu nge rombu po tilindizga nkhondu yo yituza ya Haramagedone? (Ŵeru. 5:3, 31; 1 Miko. 16:8-10; Chivu. 7:9, 10; 16:16; 19:19-21)