Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 33: Kuyambuka Nyanja Yiyera

Nkhani 33: Kuyambuka Nyanja Yiyera

AWONA vo vichitika yapa. Yo walongo nthonga yaki pa Nyanja Yiyera, ndi Mosese. Wo ŵenayu kumtunda ko mba Yisraele. Kweni wo abira m’nyanja, ndi Farao pamoza ndi gulu laki losi lankhondu. Tiyi tiwoni vo vinguchitika.

Asilikali achiegipiti abila m’nyanja

Nge mo tasambiriya, Chiuta wati wachitiska mulili wa nambala 10, Farao wangukambiya Ayisraele kuti atuwi mu Egipiti. Ayisraele pafupifupi 600,000, anthurumi, anthukazi ndi ŵana angutuwa mu Egipiti. Kweniso penga ŵanthu anandi wo angugomezga Yehova, ndipu anguluta limoza ndi Ayisraele. Wosi anguluta ndi mbereri, mbuzi ndipuso ng’ombi zawu zosi.

Ayisraele ŵechendasoki, angupempha Aegipiti vakuvwala ndipuso vinthu vagolidi ndi siliva. Aegipiti ŵenga ndi mantha ukongwa chifukwa cha mulili wakumaliya wo unguŵawiya. Mwaviyo, yiwu anguŵapaska Ayisraele vosi vo angupempha.

Pati pajumpha mazuŵa ngamanavi Ayisraele angufika pa Nyanja Yiyera, ndipu angupumuwa. Ayisraele ŵati aluta, Farao ndi ŵanthu ŵaki angwamba kudandawula kuti aŵazomerezgiyanji Ayisraele kuti aluti. Yiwu anguti. ‘Tazomerezga akapolu ŵidu kuti aluti.’

Sonu Farao wangusintha maŵanaŵanu. Mwaliŵiliŵi, Iyu wanguto gareta laki ndipu wangukambiya ankhondu ŵaki kuti anozgeki. Yiwu anguto so magareta ngapade 600, kweniso magareta ngosi nga mu charu cha Egipiti ndipu angwamba kulondo Ayisraele.

Ayisraele ŵati awona kuti Farao ndi ankhondu ŵaki atiŵalondo, anguchita mantha ukongwa. Yiwu ŵengavi kwakuthaŵiya. Kunthazi kwawu kwenga Nyanja Yiyera, ndipu kuvuli kwawu kwazanga Aegipiti. Kweni Yehova wanguŵika mtambu pakati pa ŵanthu ŵaki ndi Aegipiti. Mwaviyo, Aegipiti atondekanga kuwona Ayisraele kuti akaŵako.

Sonu Yehova wangukambiya Mosese kuti walongo nthonga yaki pa Nyanja Yiyera. Ndipu wati wachita viyo, Yehova wanguchitiska kuti chimphepu cha vuma chiputi panyanja. Ndipu maji nga m’nyanja ngangugaŵikana pakati.

Ndipu Ayisraele angwamba kwenda kudumuwa pakati panyanja, pamchenga wakumira. Panguto nyengu yitali kuti gulu losi la ŵanthu likafiki kusirya linyaki, pamoza ndi viŵetu vawu vosi. Ndipu Aegipiti angwamba so kuwona Ayisraele. Ŵati awona kuti akapolu ŵawu ŵenga patali, Aegipiti anguŵatchimbiriya ndipu angusele m’nyanja kuti akaŵako.

Ŵati asere m’nyanja, Chiuta wanguchitiska kuti matayala nga magareta ngawu ngakhwetuki. Yapa sonu Aegipiti angwamba kuchita mantha, ndipu angwamba kuliya kuti: ‘Yehova watiŵarwiya nkhondu Ayisraele. Tiyeni tithaŵi!’ Kweni ichi chenga chivuli.

Ivi vinguchitika Yehova wati wakambiya Mosese kuti walongo nthonga yaki pa Nyanja Yiyera, nge mo wawone pachithuthuzi. Ndipu Mosese wati wachita ivi, maji ngo ngangugaŵikana ngangukumana so pakati ndipu Aegipiti wosi angubila pamoza ndi magareta ngawu. Gulu losi lankhondu lingusele m’nyanja kulondo Ayisraele. Ndipu pengavi yumoza wa Aegipiti mweniyo wangupozomoka.

Ŵanthu wosi ŵaku Chiuta angukondwa kuti apozomoka. Anthurumi wosi angumba sumu yakuwonga Yehova ndipu anguti: ‘Yehova wapunda nkhondu. Iyu waponya mahachi ndi akukwerapu ŵaki m’nyanja.’ Mzichi waku Mosese, Miriamu wanguto kang’oma kaki ndipu anthukazi wosi anguto ting’oma tawu ndipu angumulondo. Wosi anguvina mwalikondwa ndi kumba nawu sumu yo ambanga anthurumi yakuti: ‘Yehova wapunda nkhondu. Iyu waponya mahachi ndi akukwerapu ŵaki m’nyanja.’

Chituwa machaputala 12 mpaka 15.



Mafumbu

  • Kumbi anthurumi, anthukazi kweniso ŵana a Chiyisraele wo angutuwa ku Egipiti ŵenga alinga, nanga mbayani so wo anguluta nawu?
  • Kumbi Farao wanguvwa wuli wati wazomerezga Ayisraele kuti akengi ndipu wanguchitanji?
  • Kumbi Yehova wanguchitanji kuti Aegipiti atondeki kuko ŵanthu ŵaki?
  • Kumbi nchinthu wuli cho chinguchitika Mosese wati walongo nthonga yaki pa Nyanja Yiyera, nanga Ayisraele anguchitanji?
  • Nchinthu wuli cho chinguchitika Aegipiti ŵati asere mu nyanja kuti akako Ayisraele?
  • Kumbi Ayisraele angulongo wuli kuti angukondwa ndipuso anguwonga Yehova kuti wanguŵapozomoska?

Mafumbu ngakusazgiyapu

  • Ŵerenga Chituwa 12:33-36.

    Kumbi Yehova wanguwoneseska wuli kuti waŵatumbika ŵanthu ŵaki chifukwa cha vyaka vosi vo anguja mu ukapolu ku Egipiti? (Chitu. 3:21, 22; 12:35, 36)

  • Ŵerenga Chituwa 14:1-31.

    Kumbi mazu ngo nge pa Chituwa 14:13, 14, ngo Mosese wangukamba, ngakwasa wuli ateŵeti aku Yehova mazuŵa nganu po alindizga nkhondu yo yituza ya Haramagedone? (2 Miko. 20:17; Sumu 91:8)

  • Ŵerenga Chituwa 15:20, 21.

    Kumbi nchifukwa wuli ateŵeti aku Yehova atenele kumba sumu zakumutumbika? (Chitu. 15:1, 2; Sumu 105:2, 3; Chivu. 15:3, 4)

    Kumbi anthukazi Achikhristu mazuŵa nganu asambiranji pa vo Miriamu ndi anthukazi anyaki anguchita pa Nyanja Yiyera pakulumba Yehova? (Chitu. 15:20, 21; Sumu 68:11)