Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 32: Milili 10

Nkhani 32: Milili 10

AWONA pavithuthuzi ivi. Chithuthuzi chechosi chilongo mulili wo Yehova wanguchitiska ku Egipiti. Chithuthuzi chakwamba, chilongo kuti Aroni wapuma pamaji mu Msinji wa Nile ndi nthonga yaki. Wati wachita viyo, maji nga mu msinji wo ngangusambuka ndopa. Somba zingufwa ndipu msinji ungwamba kununkha.

Mililli pa ŵanthu aku Egipiti

Pavuli paki, Yehova wanguchitiska kuti amchuwa atuwi mu Msinji wa Nile. Ndipu asanirikanga peposi, mu vipembu, mu viyaŵi kweniso pakugona. Sonu amchuwa yaŵa ŵati ŵafwa, Aegipiti anguwunjika amchuwa wosi pamoza ndipu charu chingununkha.

Ndipu Aroni wangupuma nthonga yaki pasi, ndipu fuvu lingusambuka tividononu timanatimana takuluma. Tinthu iti taphululukanga ndipu talumanga ukongwa. Uwu wenga mulili wachitatu mu charu cha Egipiti.

Milili yosi iyi yawiyanga Aegipiti pe, kweni Ayisraele yaŵawiyanga cha. Mulili wachinayi wenga vinyezi vikuluvikulu vo vinguwa mu nyumba zosi za Aegipiti. Mulili wachinkhondi unguwa pa viŵetu vosi. Ng’ombi, mbereri ndi mbuzi zinandi za Aegipiti zingufwa.

Pavuli paki, Mosese ndi Aroni anguto vyotu ndi kuviponya muchanya. Ndipu vinguchitiska kuti viŵetu vosi ndi ŵanthu ŵaje ndi vilonda vikuluvikulu. Uwu wenga mulili wa nambala 6.

Vati vachitika ivi, Mosese wangukweza janja laki kuchanya, ndipu Yehova wangutuma malimphezi ndi matalala. Ngenga matalala ngakofya ukongwa ngo ngenga ngechendawepu mu Egipiti.

Mulili wa nambala 8 wenga azombi anandi. Kenga kakwamba kuti azombi anandi viyo awi m’charu ichi. Angurya vosi vo vuwa yamatalala yinguleka kuvinanga.

Mulili wa nambala 9 wenga mdima. Kwa mazuŵa ngatatu, m’charu chosi cha Egipiti mwenga mdima ukulu, kweni ko kwajanga Ayisraele kwenga ukweru.

Pakumaliya paki, Chiuta wangukambiya ŵanthu ŵaki kuti amiji ndopa za mwana wa mbuzi pamwenga za mwana wa mbereri pachanya pa khomu la nyumba zawu. Ndipu pavuli paki, m’ngelu waku Chiuta wangujumpha mu Egipiti. Panyumba yo wanguwona kuti penga ndopa, wangubayapu weyosi cha. Kweni panyumba yo pengavi ndopa, m’ngelu waku Chiuta wangubaya ŵana wosi akwamba ŵa ŵanthu kweniso ŵana akwamba ŵa viŵetu. Uwu wenga mulili wa nambala 10.

Pavuli pa mulili wakumaliya uwu, Farao wangukambiya Ayisraele kuti alutengi. Ŵanthu ŵaku Chiuta yaŵa ŵenga akunozgeka kali, ndipu usiku weniwo angwamba kutuwa mu Egipiti.

Chituwa machaputala 7 mpaka 12.



Mafumbu

  • Mwakugwiriskiya nchitu vithuthuzi, konkhoska milili yitatu yakwamba yo Yehova wanguzisa mu Egipiti?
  • Kumbi milili yitatu yakwamba yipambana wuli ndi milili yinyaki yosi?
  • Kumbi ungazumbuwa mulili wa nambala 4, 5 ndi 6?
  • Konkhoska mulili wa nambala 7, 8 ndi 9.
  • Kumbi Yehova wangukambiya Ayisraele kuti achitenji, mulili wa nambala 10 wechendachitiki?
  • Kumbi mulili wa nambala 10, wenga mulili wuli ndipu nchinthu wuli cho chinguchitika pavuli paki?

Mafumbu ngakusazgiyapu

  • Ŵerenga Chituwa 7:19-8:23.

    Chinanga kuti amayera a ku Egipiti angwesa kuchita milili yakukozgana ndi milili yakwamba yiŵi yaku Yehova, kumbi yiwu anguchichizgika kuzomerezanji pavuli pa mulili wachitatu? (Chitu. 8:18, 19; Mate. 12:24-28)

    Kumbi mulili wa nambala 4 ungulongo wuli nthazi zaku Yehova zakuvikiliya ŵanthu ŵaki, ndipu kuziŵa venivi kutovya wuli ŵanthu aku Chiuta wo alindizga “suzgu yikulu” yo yikukambika kuti yituza? (Chitu. 8:22, 23; Chivu. 7:13, 14; 2 Miko.16:9)

  • Ŵerenga Chituwa 8:24; 9:3, 6, 10, 11, 14, 16, 23-25; 10:13-15, 21-23.

    Kumbi Farao ndi amayera amiyanga magulu ngaŵi nanga, ndipu mwakuyanana ndi yiwu mazuŵa nganu, nchinthu wuli cho magulu yanga ngatondeka kuchita? (Chitu. 8:10, 18, 19; 9:14)

    Kumbi lemba la Chituwa 9:16, lititiwovya wuli kuvwisa chifukwa cho Yehova wazomerezge Satana kuŵapu mpaka sonu? (Ŵaro. 9:21, 22)

  • Ŵerenga Chituwa 12:21-32.

    Kumbi Phaska wachitiska wuli ŵanthu anandi kuti asaniyi utaski, ndipu kumbi Phaska mwenuyu wachitiyanga chithuthuzi chinthu wuli? (Chitu. 12:21-23; Yoha.1:29; Ŵaro. 5:18, 19, 21; 1 Ŵako. 5:7)