Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 31: Mosese ndi Aroni Aluta Kwaku Farao

Nkhani 31: Mosese ndi Aroni Aluta Kwaku Farao

MOSESE wati wawere ku Egipiti, wangukambiya muku waki Aroni vakuziziswa vosi vo vinguchitika. Sonu Mosese ndi Aroni ŵati alongo Ayisraele vakuziziswa ivi, wosi anguvwana kuti Yehova wenga nawu.

Pavuli paki, Mosese ndi Aroni anguluta kuchiwonana ndi Farao. Ndipu angumukambiya kuti: ‘Yehova Chiuta wa Yisraele wakamba kuti, azomerezgi ŵanthu ŵangu kwa mazuŵa ngatatu, kuti aluti akandisopi m’chipululu.’ Kweni Farao wangumuka kuti: ‘Ndigomezga Yehova cha ini. Ndipu ndizomerezgengi cha kuti Ayisraele aluti.’

Farao wangukwiya ukongwa, chifukwa ŵanthu akhumbanga kupumuwa kugwira nchitu kuti akasopi Yehova. Mwaviyo, iyu wanguŵachichizga kugwira nchitu yikulu ukongwa kuphara ya nyengu zosi. Ayisraele angwamba kumudandawuliya Mosese mo yiwu asuzgikiyanga ndipu Mosese wanguchita chitima. Kweni Yehova wangumukambiya kuti wangadandaulanga cha. Ndipu wanguti: ‘Ndichitiskengi Farao kuti watuzgi ŵanthu ŵangu.’

Mosese ndi Aroni pamasu paku Farao

Mosese ndi Aroni, anguluta so kwaku Farao. Yapa sonu anguchichita chakuziziswa. Aroni wanguponya nthonga yaki pasi, ndipu yingusambuka njoka yikulu. Kweni ŵanthu azeru aku Farao nawu anguponya nthonga zawu ndipu nazu zingusambuka njoka. Kweni awona, njoka yaku Aroni yingumeza njoka zosi za ŵanthu aku Farao. Kweni Farao wanguzomerezga mbwenu cha kuti Ayisraele aluti.

Sonu nyengu yingukwana yakuti Yehova wamukhawuliski Farao. Kumbi uziŵa po wangumukhawuliskiya? Chiuta wanguchitiska milili 10 mu charu cha Egipiti.

Milili yinandi yati yachitika, Farao watumanga uthenga kwaku Mosese ndi kumukambiya kuti: ‘Lekeska milili ndipu ndiwazomerezgengi Ayisraele kuti aluti.’ Kweni asani mulili wamala, Farao wasinthanga maŵanaŵanu ngaki. Ndipu iyu wazomerezganga cha kuti ŵanthu aluti. Kweni mulili wa nambala 10 wati wachitika, Farao wanguŵazomerezga Ayisraele kuti aluti.

Kumbi utiyiziŵa milili 10 yo yinguchitika? Jura kuseri kuti tisambiri za milili yeniyi.

Chituwa 4:27-31; 5:1-23; 6:1-13, 26-30; 7:1-13.



Mafumbu

  • Kumbi utiyiziŵa milili 10 yo yinguchitika? Jura kuseri kuti tisambiri za milili yeniyi.
  • Kumbi Mosese ndi Aroni angumukambiyanji Farao, nanga wanguŵamukanji?
  • Nge mo wawone pachithuthuzi, nchinthu wuli cho chinguchitika Aroni wati waponya pasi nthonga yaki?
  • Kumbi Yehova wangumukhawulisa wuli Farao, ndipu Farao wanguchita wuli?
  • Kumbi nchinthu wuli chinguchitika pavuli pa mulili wa nambala 10?

Mafumbu ngakusazgiyapu

  • Ŵerenga Chituwa 4:27-31 ndi 5:1- 23.

    Kumbi Farao wang’anamuwanganji pakukamba kuti: ‘Nditimuziŵa cha Yehova.’ (Chitu. 5:2; 1 Samu. 2:12; Ŵaro. 1:21)

  • Ŵerenga Chituwa 6:1-13, 26-30. (NW)

    Kumbi nchinthu wuli chakukwaskana ndi Yehova cho Abrahamu, Yisaki ndi Yakobe alekanga kuchiziŵa? (Chitu. 3:13, 14; 6:3; Chiya. 12:8)

    Kumbi kuziŵa kuti Yehova wangumugwiriskiya nchitu mbwenu Mosese chinanga wuli iyu wangujiwona kuti wenga wambula kwenele kuchita nchitu yo wangupaskika, kutitichitiska kuti tijiwonengi wuli? (Chitu. 6:12, 30; Luka 21:13-15)

  • Ŵerenga Chituwa 7:1-13.

    Kumbi ateŵeti aku Chiuta a mazuŵa nganu angasambiranjipu pa mo Mosese ndi Aroni angupereke uthenga waku Yehova wacheruzgu kwaku Farao mwambula mantha? (Chitu. 7:2,3, 6; Machi. 4:29-31)

    Kumbi Yehova wangulongo wuli nthazi zaki pa achiuta a ku Egipiti? (Chitu. 7:12; 1 Miko. 29:12)