Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 30: Chivwati Chikole Motu

Nkhani 30: Chivwati Chikole Motu

MOSESE wangwenda kuchifika ku phiri la Horebe kuti wakasaniyi uteka wakuliska mbereri zaki. We kweniko, wanguwona chivwati chichikole motu kweni kuti chanyekanga cha.

Mosese we pa chivwati chakunyeka motu

Mosese wanguti: ‘Ichi nchachilendu, ndiluti pafupi kuti nkhachiwoni umampha.’ Wati waluta pafupi, m’chivwati munguvwika mazu ngakuti: ‘Ungazanga pafupi cha. Zuwa sapatu zaku, chifukwa malu ngo ulipu ngakupatulika.’ Chiuta ndiyu waŵeleŵetanga kuporote mwa m’ngelu ndipu Mosese wangubisa chisku chaki.

Ndipu Chiuta wanguti: ‘Ndawona kusuzgika kwa ŵanthu ŵangu mu Egipiti. Sonu ndiŵatuzgengemu ndipu nditumengi iwi kuchituzga ŵanthu ŵangu mu Egipiti.’ Yehova wakhumbanga kuti ŵanthu ŵaki akaje m’charu chakutowa cha Kanani.

Kweni Mosese wangukamba kuti: ‘Nde yani ini kuti ndichiti ivi? Nanga asani ndingaluta, ndipu Ayisraele achindifumba kuti: “Ndiyani wakutuma?” Kumbi ini ndamukuti wuli?’

Chiuta wangumuka kuti: ‘Ivi ndivu wamukamba, YEHOVA Chiuta waku Abrahamu, Chiuta waku Yisaki ndi Chiuta waku Yakobe ndiyu wandituma kwaku imwi.’ Ndipu Yehova wangukamba so kuti: ‘Lenili ndilu zina langu mpaka muyaya.’

Ndipu Mosese wangukamba so kuti: ‘Nanga asani achileka kuvwana kuti mwandituma ndimwi?’

Chiuta wangumufumba kuti: ‘Nchinthu wuli cho che mujanja laku?’

Mosese wangumuka kuti: ‘Ndi nthonga.’

Chiuta wanguti: ‘Ayiponyi pasi.’ Ndipu Mosese wati wayiponya pasi, nthonga yiya yingusambuka njoka. Sonu Yehova, wangumulongo Mosese chakuziziswa chinyaki. Wangumukambiya kuti: ‘Serezga janja laku mu chakuvwala chaku.’ Mosese wanguserezga janja laki, ndipu wati walituzga, linguwoneka ngati la makhati. Kweni pavuli paki janja liya linguŵeriyamu. Sonu Yehova wangumupaska Mosese nthazi zakuti wakachiti chakuziziswa chachitatu. Pakumaliya paki Chiuta wanguti: ‘Po wamuchitiya chakuziziswa ichi, Ayisraele amuvwana kuti ndakutuma ndini.’

Vati vachitika vosi ivi, Mosese wanguluta kunyumba ndipu wangupempha Yetero kuti: ‘Chondi ndizomerezgeni kuti ndiluti ku Egipiti kwa abali ŵangu, nkhaŵawoni kuti ŵewuli.’ Ndipu Yetero wangukambiya Mosese kuti waluti umampha ndipu Mosese wangwamba ulendu wakuwere ku Egipiti.

Chituwa 3:1-22; 4:1-20.



Mafumbu

  • Kumbi ungazumbuwa zina la phiri lo liwoneka pachithuthuzi po?
  • Konkhoska chinthu chachilendu cho Mosese wanguwona wati waluta kuchiliska mbereri zaki ku phiri.
  • Kumbi m’chivwati mungutuwa mazu wuli ndipu ngenga ngakuyani?
  • Kumbi Mosese wangumukanji, Chiuta wati wamukambiya kuti wakatuzgi ŵanthu ŵaki mu Egipiti?
  • Kumbi Chiuta wangukambiya Mosese kuti wakaŵakambiyenji ŵanthu asani achifumba kuti ndiyani wangumutuma?
  • Kumbi Mosese watingi wakaŵasimikiziyengi wuli ŵanthu kuti wangutumika nadi ndi Chiuta?

Mafumbu ngakusazgiyapu

  • Ŵerenga Chituwa 3:1-22.

    Kumbi vo vinguchitikiya Mosese vititipaska wuli chigomezgu chakuti Yehova wakhoza kutiwovya chinanga tingajivwa kuti te ambula kwenele kufiska nchitu ya Chikhristu? (Chitu. 3:11, 13; 2 Ŵako. 3:5, 6)

  • Ŵerenga Chituwa 4:1-20.

    Kumbi Mosese wangusintha wuli maŵanaŵanu pa vyaka 40 vo wanguja ku Midiani, nanga wo akhumba kuja ndi maudindu mu mpingu asambiranjipu? (Chitu. 2:11, 12; 4:10, 13; Mika. 6:8; 1 Timo. 3:1, 6, 10)

    Chinanga kuti tichenyeka ndi Yehova kuziya mu gulu laki, kumbi vo Mosese wanguchita vititipaska chigomezgu wuli? (Chitu. 4:12-14; Sumu 103:14; Ŵahe. 12:4-11)