Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 28: Mo Wangupozomoke Mosese

Nkhani 28: Mo Wangupozomoke Mosese

AWONA mwana yo waliya ndipuso wako chikumbu cha msungwana. Mwana uyu ndi Mosese. Kumbi msungwana wakutowa yo wamuziŵa? Iyu ndi mwana munthukazi waku Farao. Sonu kumbi iyu wangumusaniya wuli Mosese?

Mwana munthukazi waku farao wasaniya Mosese

Mosese wati wawaku, anyina angumubisa kwa myezi yitatu, chifukwa akhumbanga cha kuti Aegipiti amubayi. Kweni anguziŵa kuti zuŵa linyaki ŵanthu amusaniyengi Mosese ndipu angusaniya nthowa yakuti mwana uyu wapozomoke.

Iwu anguto chiteti ndipu anguchimata phula kuti maji ngangaserenga cha mukati. Pavuli paki angumuŵikamu Mosese, ndipu anguchichiŵika mu uteka, m’mphepeti mwa Msinji wa Nile. Anyina Mosese angukambiya mwana wawu munthukazi Miriamu kuti wami pafupi ndipu wawonengi vo vichitikengi.

Pavuli paki, mwana munthukazi waku Farao wanguluta ku Msinji wa Nile kuchisamba. Iyu wanguwona chiteti mu uteka. Ndipu wangukambiya msungwana waki wanchitu kuti: ‘Luta kanditole chiteti chiya.’ Ndipu mwana waku Farao wati wachijura, wanguwona mwana wakutowa ukongwa. Mwana uyu wenga Mosese, iyu waliyanga ndipu msungwana uyu wangumuvwiya lisungu ukongwa. Iyu wangukhumba cha kuti mwana uyu wabayiki.

Ndipu Miriamu wanguza pafupi. Amuwoni pachithuthuzi po. Iyu wangufumba mwana munthukazi waku Farao kuti: ‘Kumbi nkhakudaniyeni munthukazi wa Chiyisraele kuti wakuleriyeni mwana uyu?’

Iyu wangumuka kuti: ‘Chondi luta.’

Sonu Miriamu wangutchimbiya kuchikambiya anyina. Anyina aku Mosese ŵati ŵaza, mwana waku Farao wanguŵakambiya kuti: ‘Toni mwana uyu mukandilere, ndazakukulipirani.’

Mwaviyo anyina aku Mosese anguchimulera mwana wawu. Mosese wati wakuwa, anyina anguchimupereka ku mwana munthukazi waku Farao ndipu iyu wangumuto kuŵa mwana waki. Ivi ndivu vinguchitika kuti Mosese wakuliyi m’nyumba yaku Farao.

Chiyambo 2:1-10.



Mafumbu

  • Kumbi mwana yo we pachithuthuzi po ndiyani, ndipu wako chikumbu chaku yani?
  • Kumbi anyina aku Mosese anguchitanji kuti mwana wawu waleki kubayika?
  • Kumbi kamsungwana ko ke pachithuthuzi po nkhayani, ndipu kanguchitanji?
  • Mwana munthukazi waku Farao wati wasaniya mwana, kumbi Miriamu wangukambanji?
  • Kumbi mwana munthukazi waku Farao wanguŵakambiyanji anyina Mosese?

Fumbu lakusazgiyapu

  • Ŵerenga Chituwa 2:1-10.

    Kumbi anyina aku Mosese angusaniya mwaŵi wuli wakusambiza mwana wawu weche m’mana, ndipu venivi vitiŵasambizanji apapi mazuŵa nganu? (Chitu. 2:9, 10; Mara. 6:6-9; Ntha. 22:6; Ŵaefe. 6:4; 2 Timo. 3:15)