ŴANTHU yaŵa uwona yapa, achichizga anyawu kuti agwirengi nchitu. Awona yo we ndi likhwechu ndipu wakhwapa munthu yo wagwira nchitu. Ŵanthu wo agwira nchitu mba m’banja laku Yakobe ndipu adanika kuti Ayisraele. Ndipu ŵanthu wo atiŵachichizga kugwira nchitu mba Egipiti. Ayisraele sonu mbakapolu ku Egipiti. Kumbi venivi vinguchitika wuli?

Aegipiti achitiya nkhaza ayisraele

Kwa vyaka vinandi, banja laku Yakobe lajanga mwachimangu mu Egipiti. Yosefe ndiyu waphweriyanga banja ili, iyu wenga munthu wakuzirwa ukongwa mu Egipiti ndipu wenga wachiŵi kwaku Farao. Kweni pavuli paki Yosefe wangufwa. Farao wakwamba wati wafwa, Farao munyaki wangwamba kuwusa mu Egipiti ndipu watinkhanga Ayisraele.

Ndipu Farao muheni uyu, wangusambuska Ayisraele kuja akapolu. Iyu wangusankha ŵanthu ankhaza ndipuso ambura lisungu kuti aŵawoneriyengi. Ŵanthu yaŵa, achichizganga Ayisraele kuti amuzengiyengi misumba Farao. Kweni mtundu wa Yisraele ungulutirizga kwandana. Ndipu pavuli paki, Aegipiti angwamba kuwopa kuti Ayisraele aŵengi anandi kweniso anthazi ukongwa.

Aegipiti achitiya nkhaza ayisraele

Kumbi uziŵa cho Farao wanguchita? Iyu wangukambiya azamba wo awovyanga anthukazi a Chiyisraele pakubala ŵana kuti: ‘Mubayengi ŵana anthurumi wosi wo abalengi.’ Kweni azamba yaŵa ŵenga amampha ukongwa, aŵabayanga cha ŵana anthurumi.

Pavuli paki Farao wangulamula ŵanthu ŵaki wosi kuti: ‘Toni ŵana wosi anthurumi a Chiyisraele ndipu muŵabayi. Kweni ŵana anthukazi pe muŵaleki ndi umoyu.’ Farao wangulamula chinthu chiheni ukongwa. Asi viyo? Kweni tiyi tiwoni mo wangupozomoke mwana munthurumi yumoza.

Chituwa 1:6-22.



Mafumbu

  • Kumbi pachithuthuzi po, ndi yani yo we ndi likhwechu ndipu wathyapa yani?
  • Kumbi nchinthu wuli cho chinguchitikiya Ayisraele, Yosefe wati wafwa?
  • Nchifukwa wuli Aegipiti angwamba kopa Ayisraele?
  • Kumbi Farao wangupereka dangu wuli kwa azamba wo awovyanga anthukazi a Chiyisraele pakubala?

Mafumbu ngakusazgiyapu

  • Ŵerenga Chituwa 1:6-22.

    Kumbi Yehova wangwamba wuli kufiska layizgu lo wangupangana ndi Abrahamu? (Chitu. 1:7; Chiya. 12:2; Machi. 7:17)

    Kumbi azamba a Chihebere angulongo wuli kuti umoyu ngwakupaturika? (Chitu. 1:17; Chiya. 9:6)

    Kumbi azamba ŵenaŵa, angupaskika mphotu wuli chifukwa chakugomezgeka kwaku Yehova? (Chitu. 1:20, 21; Ntha. 19:17)

    Kumbi Satana wangwesa wuli kutimbanyizga khumbu laku Chiuta la Mbewu yakulayizgika yaku Abrahamu? (Chitu. 1:22; Mate. 2:16)