Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 26: Jobu Wenga Wakugomezgeka Kwaku Chiuta

Nkhani 26: Jobu Wenga Wakugomezgeka Kwaku Chiuta

KUMBI munthu yo wawoneka yapa kuti ngwakutama utimuvwiya lisungu? Zina laki ndi Jobu, ndipu munthukazi yo, ndi muwoli waki. Kumbi waviziŵa vo iyu watimukambiya Jobu? Iyu watiti: ‘Tuka Chiuta ufwi.’ Tiyi tiwoni chifukwa cho iyu wangukambiya mazu yanga kweniso chifukwa cho Jobu wangusuzgikiya ukongwa.

Job we ndi vilonda

Jobu wenga munthu wakugomezgeka mweniyo wavwiyanga Yehova. Iyu wajanga m’charu cha Uzu, kufupi ndi Kanani. Yehova wamuyanjanga ukongwa Jobu, kweni penga munthu munyaki yo watinkhanga Jobu. Kumbi utimuziŵa?

Wenga Satana Diabolo. Kumbuka kuti Satana ndi mungelu muheni yo watinkha Yehova. Iyu wanguchitiska kuti Adamu ndi Eva aleki kuvwiya Yehova. Ndipu waŵanaŵananga kuti wakhoza so kuchitiska munthu weyosi kuti waleki kuvwiya Yehova. Kweni kumbi iyu wanguchita nadi viyo? Awa. Aŵanaŵana za ŵanthu anandi akugomezgeka wo tasambira zaku yiwu. Kumbi mbalinga wo ungazumbuwa mazina ngawu?

Yakobe ndi Yosefe ŵati ŵafwa ku Egipiti, Jobu ndiyu wenga munthu wakugomezgeka ukongwa kwaku Yehova pacharu chosi chapasi. Yehova wakhumbanga kuti Satana waziŵi kuti iyu wangachitiska cha ŵanthu wosi kuja aheni. Ndipu wanguti: ‘Awona mo Jobu waliri wakugomezgeka kwaku ini.’

Satana wangumuka kuti: ‘Ngwakugomezgeka chifukwa chakuti imwi mwamutumbika, iyu wendi vinthu vinandi vamampha. Kweni asani mungamulonda vinthu vosi vo wenavu wakutukeningi.’

Sonu Yehova wangukamba kuti: ‘Chita vosi vo ukhumba. Mulondi chechosi. Chita viheni vosi vo ukhumba kumuchitiya Jobu. Tiwonengi asani iyu wanditukengi. Kweni uwoneseski kuti ungamubayanga cha.’

Chakwamba, Satana wanguchitiska kuti ŵanthu ŵabi ng’ombi ndi ngamila zaku Jobu, ndipuso mbereri zaki zosi zingubayika. Pavuli paki, iyu wangubaya ŵana ŵaku Jobu 10, anthurumi ndi anthukazi ndi chimphepu chikulu. Pakumaliya paki, Satana wangupweteka Jobu ndi nthenda yiheni ukongwa. Ndipu Jobu wangusuzgika ukongwa. Ndichu chifukwa chaki muwoli waki wangumukambiya kuti: ‘Tuka Chiuta ufwi.’ Kweni Jobu wanguchita cha venivo. Kweniso kunguza abwezi ŵaki atatu aboza ndipu angumukambiya kuti wasuzgikanga chifukwa chakuti wachitanga vinthu viheni. Kweni Jobu, wangulutirizga kuja ŵakugomezgeka.

Ivi vingukondweska Yehova ndipu pavuli paki wangumutumbika Jobu, nge mo muwone pachithuthuzi ichi. Iyu wangumuchizga Jobu ndipu wangubala so ŵana 10 akutowa ukongwa. Jobu wenga so ndi ng’ombi, mbereri ndipuso ngamila zinandi kuphara zo wenga nazu pakwamba.

Kumbi nawi uŵengi wakugomezgeka kwaku Yehova nyengu zosi nge Jobu? Asani uŵengi wakugomezgeka, nawi so Chiuta wazakukutumbika. Ukhoza kuzija ndi umoyu wambula kumala panyengu yo charu chosi chapasi chazamuja chakutowa nge mo wenge munda wa Edene.

Jobu 1:1-22; 2:1-13; 42:10-17.

Job ndi banja laki


Mafumbu

  • Kumbi Jobu wenga yani?
  • Kumbi Satana wangwesa kuchita chinthu wuli, nanga iyu wangupunda?
  • Kumbi Yehova wanguzomerezga Satana kuti wachitenji ndipu nchifukwa wuli?
  • Nchifukwa wuli muwoli waku Jobu wangumukambiya kuti ‘tuka Chiuta ufwi’? (Wona chithuthuzi.)
  • Nge mo uwone pachithuthuzi chachiŵi, kumbi Yehova wangumutumbika wuli Jobu ndipu nchifukwa wuli?
  • Asani isi tiŵengi akugomezgeka kwaku Yehova nge Jobu, kumbi ndi vitumbiku wuli vo tazamulonde?

Mafumbu ngakusazgiyapu

  • Ŵerenga Jobu 1:1-22.

    Kumbi mazuŵa nganu Akhristu angamuyezga wuli Jobu? (Jobu 1:1; Ŵafi. 2:15; 2 Pet. 3:14)

  • Ŵerenga Jobu 2:1-13.

    Kumbi Jobu ndi muwoli waki angupambana m’nthowa ziŵi nizi pa mo anguchitiya ndi chiyesu chakutuliya kwaku Satana? (Jobu 2:9, 10; Ntha. 19:3; Mika 7:7; Mala. 3:14)

  • Ŵerenga Jobu 42:10-17.

    Kumbi mphotu zo Jobu ndi Yesu angulonde chifukwa cha kuja akugomezgeka ziyanana wuli? (Jobu 42:12; Ŵafi. 2:9-11)

    Kumbi vitumbiku vo Jobu wangulonde chifukwa cha kuja wakugomezgeka kwaku Chiuta, vititiwovya wuli? (Jobu 42:10, 12; Ŵahe. 6:10; Yako. 1:2-4, 12; 5:11)