Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 25: Banja Lisamiya ku Egipiti

Nkhani 25: Banja Lisamiya ku Egipiti

YOSEFE wangutondeka kujiko. Ndipu wangukambiya anchitu ŵaki wosi kuti atuwi m’nyumba. Wati wajamu iyu ndi abali ŵaki, Yosefe wangwamba kuliya. Tikhoza kuwona kuti abali ŵaki anguzizwa ukongwa, chifukwa aziŵanga cha cho waliyanga. Pakumaliya paki, wangukamba kuti: ‘Ndini Yosefe. Kumbi ada ŵeche amoyu?’

Abali ŵaki wosi anguzizwa, mwakuti angutondeka kumuka. Yiwu anguchita mantha. Kweni Yosefe wanguŵakambiya kuti: ‘Zani pafupi.’ Ndipu ŵati afika pafupi, wanguŵakambiya kuti: ‘Ndini mubali winu Yosefe, yuwa mungumuguliska ku Egipiti.’

Ndipu Yosefe wangulutirizga kukamba nawu mwaulemu kuti: ‘Mungadandawulanga cha chifukwa chakuti mungundiguliska kunu. Chiuta ndiyu wangundituma ini kunu ku Egipiti kuti ndizipozomoski ŵanthu. Ndipu Farao wakundiŵika kuja wakuwusa charu chosi cha Egipiti. Sonu yendeskani, muluti kwa ada mukaŵakambiyi vosi ivi. Ndipu mukaŵakambiyi kuti ŵazi azijengi kunu.’

Ndipu Yosefe wanguŵakumbatiya ndi kuŵafyofyontha abali ŵaki wosi. Sonu Farao wati wavwa kuti kwaza abali ŵaku Yosefe, wangukambiya Yosefe kuti: ‘Apaski magareta kuti aluti kuchito awiskewu ndi mabanja ngawu ngosi ndi kuza nawu kunu. Ndazakuŵapaska malu ngamampha ukongwa munu mu Egipiti.’

Ivi ndivu anguchita nadi. Pachithuthuzi ichi, ungamuwona Yosefe wachikumana ndi awiski, ŵati afika ku Egipiti ndi banja lawu losi.

Banja laku Yakobe lingukuwa ukongwa. Panyengu yo asamiyanga ku Egipiti, Yakobe limoza ndi ŵana ŵaki, kweniso azuku ŵaki, wosi pamoza angukwana 70. Ndipuso penga aziwoli a ŵana ŵaki, panyaki so anchitu anandi. Ŵanthu wosi yaŵa anguchija ku Egipiti. Ndipu adanikanga kuti Ayisraele, chifukwa chakuti Chiuta wangusintha zina laku Yakobe kuja Yisraele. Ayisraele, ŵenga ŵanthu apade ukongwa kwaku Chiuta, nge mo tiwoniyengi kunthazi uku.

Chiyambo 45:1-28; 46:1-27.

Yosefe ndi banja laki


Mafumbu

  • Kumbi nchinthu wuli chinguchitika Yosefe wati wajisumuwa kwa abali ŵaki?
  • Kumbi nchinthu wuli cho Yosefe wangukambiya abali ŵaki mwachanju?
  • Kumbi Farao wangukambanji wati wavwa za abali ŵaku Yosefe?
  • Kumbi panyengu yo Yakobe wasamiyanga ku Egipiti, banja laki lenga ndi ŵanthu alinga?
  • Kumbi banja laku Yakobe lingwamba kudanika ndi zina wuli, ndipu chenga chifukwa wuli?

Mafumbu ngakusazgiyapu

  • Ŵerenga Chiyambo 45:1-28.

    Kumbi nkhani yaku Yosefe yilongo wuli kuti Yehova wakhoza kusintha chiŵembu cho ŵanthu angakhumba kuchitiya ateŵeti ŵaki kuja chinthu chamampha? (Chiya. 45:5-8; Yesa. 8:10; Ŵafi. 1:12-14)

  • Ŵerenga Chiyambo 46:1-27.

    Kumbi Yehova wangumusimikizgiyanji Yakobe wachiluta ku Egipiti? (Chiya. 46:1-4)