Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 20: Dina Wangujidaniya Suzgu

Nkhani 20: Dina Wangujidaniya Suzgu

KUMBI waŵawona ŵanthu wo Dina walutaku? Iyu waluta kuchicheza ndi asungwana anyaki wo aja m’charu cha Kanani. Kumbi awiski a Yakobe, atingi akondwengi navu venivi? Kuti timuki fumbu ili, tiyeni tikumbuki mo Abrahamu ndi Yisaki awoniyanga anthukazi a mu Kanani.

Dina waluta kuchicheza ndi asungwana achikanani

Kumbi Abrahamu wakhumbanga kuti mwana waki Yisaki watorani ndi munthukazi wa mu Kanani? Awa. Kumbi Yisaki ndi Rebeka akhumbanga kuti mwana wawu Yakobe watorani ndi munthukazi wa mu Kanani? Awa. Nanga wachiziŵa chifukwa chaki?

Chenga chifukwa chakuti ŵanthu a mu Kanani, asopanga achiuta aboza. Ŵenga ŵanthu amampha cha kuti munthu watorani nawu pamwenga kuyanjana nawu. Sonu tikhoza kuwona kuti Yakobe watingi wakondwengi cha kuti mwana waki munthukazi wayanjani ndi asungwana a mu Kanani.

Kukamba uneneska, Dina wangujidaniya nadi suzgu. Kumbi utimuwona mnyamata wa Chikanani pachithuthuzi ichi, yo walereska Dina? Zina laki ndi Shekemu. Zuŵa linyaki Dina wati waluta kuchicheza, Shekemu wangumuchichizga Dina kuti wagoni nayu. Uku kwenga kunanga, chifukwa ŵanthu akutorana pe ndiwu atenere kugonana. Vo Shekemu wanguchitiya Dina, vingwambiska masuzgu nganandi.

Azichi aku Dina ŵati ŵavwa vo vinguchitika, angukwiya ukongwa. Ndipu azichi ŵaki ŵaŵi, Simeoni ndi Levi, angukwiya ukongwa mwakuti anguto lipanga ndi kuluta mu msumba wo mwamabuchibuchi, ndi kuchiko anthurumi. Ŵana wosi anthurumi aku Yakobe anguluta kuchibaya Shekemu ndi anthurumi anyaki wosi. Ndipu Yakobe wangukwiya chifukwa cha vinthu viheni vo ŵana ŵaki anguchita.

Kumbi masuzgu ngosi yanga ngangwamba wuli? Ngangwamba chifukwa chakuti Dina wangwamba kuyanjana ndi ŵanthu wo alekanga kuvwiya malangu ngaku Chiuta. Kumbi isi titenere kwanjana ndi ŵanthu aviyo? Awa.

Chiyambo 34:1-34.



Mafumbu

  • Kumbi nchifukwa wuli Abrahamu ndi Yisaki akhumbanga cha kuti ŵana ŵawu atorani ndi ŵanthu a m’charu cha Kanani?
  • Kumbi Yakobe wanguzomerezga kuti mwana waki wakachezengi ndi asungwana a Chikanani?
  • Kumbi munthurumi yo walereska Dina pachithuthuzi po ndi yani, ndipu nchinthu chiheni wuli cho wanguchita?
  • Kumbi Simeoni ndi Levi anguchitanji ŵati ŵavwa vo vinguchitikiya mzichi wawu Dina?
  • Kumbi Yakobe, wanguzomerezga vo Simeoni ndi Levi anguchita?
  • Kumbi masuzgu ngosi yanga ngangwamba wuli?

Mafumbu ngakusazgiyapu

  • Ŵerenga Chiyambo 34:1-31.

    Kumbi Dina wanguchicheza ndi asungwana a charu cha Kanani kamoza pe? Konkhoska. (Chiya. 34:1)

    Chinanga wuli Shekemu wangukolele Dina, nchifukwa wuli tikamba kuti Dina ndiyu wenga wakunanga? (Ŵaga. 6:7)

    Kumbi achinyamata a mazuŵa nganu angalongo wuli kuti akumbuka vo vinguchitikiya Dina? (Ntha. 13:20; 1 Ŵako. 15:33; 1 Yoha. 5:19)