Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 19: Yakobe we ndi Banja Likulu

Nkhani 19: Yakobe we ndi Banja Likulu
Yakobe ndi mwana waki

AWONA banja likulu lo le pachithuthuzi ichi. Yaŵa mbana anthurumi 12, aku Yakobe. Iyu wenga so ndi ŵana anthukazi. Kumbi uziŵapu zina laku weyosi wa ŵana yaŵa? Tiyi tisambiri za anyaki ŵaku yiwu.

Leya wangubala Rubene, Simeoni, Levi ndi Yuda. Rakelo wati wawona kuti iyu wabala cha, wadandawulanga ukongwa. Mwaviyo wanguto mwali waki wanchitu, Biliha ndipu wangumupaska Yakobe. Pavuli paki, Biliha wangubala ŵana ndipu mazina ngawu ngenga Dani ndi Naftali. Ndipu Leya nayu wangupereka mwali waki wanchitu Zilpa, kwaku Yakobe, ndipu nayu wangubala ŵana, mazina ngawu ngenga Gadi ndi Ashere. Pavuli paki, Leya wangubala so ŵana anthurumi ŵaŵi, Isakara ndi Zebuluni.

Pakumaliya paki, Rakelo nayu wangubala mwana. Ndipu wangumudana zina lakuti Yosefe. Kunthazi uku, tisambirengi vinandi vakukwaskana ndi Yosefe, chifukwa wenga munthu wakukhumbika ukongwa. Ŵana 11 yaŵa, ndiwu Yakobe wangubala panyengu yo wajanga ndi awiski aku Rakelo, a Labani.

Yakobe wenga so ndi ŵana anthukazi, kweni Bayibolo lizumbuwa zina la mwana munthukazi yumoza pe. Zina laki wenga Dina.

Nyengu yinyaki, Yakobe wanguŵanaŵana kuti watuweku kwaku Labani, ndi kuwere ku Kanani. Mwaviyo, wanguwunganiska banja laki losi ndi miskambu ya mbereri ndi ng’ombi zaki, ndi kuyamba ulendu utali ukongwa.

Yakobe ndi banja laki ŵati ŵafika ku Kanani, pangujumpha kanyengu kamanavi waka, ndipu Rakelo wangubala mwana munyaki munthurumi. Mwana uyu wangumubaliya munthowa wachiluta ku Efrata. Rakelo wangusuzgika ukongwa pakubala mwana waki uyu, ndipu iyu wangufwiya penipo. Kweni kabonda ko, kenga kamoyu. Ndipu Yakobe wangukadana zina lakuti Benjamini.

Titenere kukumbukanga mazina 12 nga ŵana anthurumi aku Yakobe, chifukwa ndiwu angupanga mtundu wosi wa Yisraele. Mafuku 12 nga Yisraele ngaziŵika ndi mazina nga ŵana 10 aku Yakobe, ndipuso ŵana ŵaŵi aku Yosefe. Yisaki, wanguja ndi umoyu kwa vyaka vinandi ŵati awaku ŵana yaŵa, ndipu watenere kuti wenga wakukondwa ukongwa kuti wenga ndi azuku anthurumi anandi. Kweni tiyi tiwoni dankha vo vinguchitikiya mzuku waki munthukazi Dina.

Chiyambo 29:32-35; 30:1-26; 35:16-19; 37:35.



Mafumbu

  • Zumbuwa mazina nga ŵana anthurumi 6 aku Yakobe, wo wangubalilana ndi muwoli waki wakwamba Leya.
  • Zumbuwa mazina nga ŵana anthurumi ŵaŵi wo Zilpa, mwali wanchitu waku Leya wangubalilana ndi Yakobe.
  • Zumbuwa mazina nga ŵana anthurumi ŵaŵi wo Biliha, mwali wanchitu waku Rakelo wangubalilana ndi Yakobe.
  • Kumbi mbana anthurumi ŵaŵi naŵa wo Rakelo wangubala, nanga nchinthu wuli cho chinguchitika mwana wachiŵi wati wawaku?
  • Kumbi pachithuthuzi palongo kuti Yakobe we ndi ŵana anthurumi alinga, nanga anguzipanga mtundu nuwu?

Mafumbu ngakusazgiyapu

  • Ŵerenga Chiyambo 29:32-35; 30:1-26 ndi 35:16-19.

    Nge po tawone ŵana anthurumi 12 aku Yakobe, kumbi m’nyengu zakali ŵana anthurumi Achihebere apaskikanga wuli mazina?

  • Ŵerenga Chiyambo 37:35.

    Kumbi tiziŵa wuli kuti Yakobe wenga so ndi ŵana anyaki anthukazi, chinanga wuli Bayibolo lizumbuwa Dina pe? (Chiya. 37:34, 35)