Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 18: Yakobe Waluta ku Harani

Nkhani 18: Yakobe Waluta ku Harani

KUMBI waŵaziŵa ŵanthu wo Yakobe walongoro nawu? Yakobe wati wayenda ulendu kwa mazuŵa nganandi, wangukumana ndi ŵanthu yaŵa pachisimi. Yiwu aliskanga mbereri zawu. Ndipu Yakobe wanguŵafumba kuti: ‘Kumbi mutuliya pani?’

Yiwu anguti: Tatuwa ku ‘Harani.’

Yakobe wanguŵafumba so kuti: ‘Kumbi mutimuziŵa Labani?’

Yiwu anguti: ‘hinya titimuziŵa, mwana waki munthukazi Rakelo ndi yo watuza po ndi mbereri za awiski.’ Kumbi iwi wamuwona Rakelo?

Yakobe wakumanana ndi Rakelo

Yakobe wati wawona Rakelo we ndi mbereri za awiski a Labani, wo mbasibweni ŵaku Yakobe, wanguluta pachisimi kuchituzgapu mwa, kuti mbereri zimwi maji. Ndipu Yakobe wangumukumbatiya Rakelo ndi kumukambiya kuti ndi msiŵani waki. Iyu wangukondwa ukongwa, ndipu wanguluta ku nyumba ndi kuchikambiya awiski a Labani.

Labani wangukondwa ukongwa chifukwa Yakobe wanguza kuzija nayu. Iyu wangukondwa so Yakobe wati wapempha kuti watorani ndi Rakelo. Kweni Labani wangumukambiya kuti wagwiri dankha nchitu vyaka 7 kuti wato Rakelo. Chifukwa chakuti Yakobe wangumuyanja ukongwa Rakelo, iyu wanguzomera. Kumbi utiviziŵa vo vinguchitika yati yafika nyengu yakuti atorani?

Labani wangupereka Leya, mwana waki mura kwaku Yakobe, m’malu mwakupereka Rakelo. Ndipu Yakobe wanguzomerezga kuti wagwirengi nchitu kwaku Labani vyaka so 7, kuti wato Rakelo. Ndipu Labani wangumupaska nadi Rakelo kuja muwoli waki. Panyengu yo, Chiuta wazomerezganga ŵanthu kuto muta. Kweni m’nyengu yidu yinu, Bayibolo likamba kuti munthu watenere kuto munthukazi yumoza pe.

Chiyambo 19:1-30.



Mafumbu

  • Kumbi msungwana yo we pachithuthuzi ndi yani, nanga Yakobe wangumuchitiyanji?
  • Kumbi Yakobe wanguzomela kuchitanji kuti watorani ndi Rakelo?
  • Kumbi Labani wanguchitanji yati yafika nyengu yakuti Yakobe ndi Rakelo atorani?
  • Kumbi Yakobe wanguzomela so kuchitanji kuti watorani ndi Rakelo?

Mafumbu ngakusazgiyapu

  • Ŵerenga Chiyambo 29:1-30.

    Kumbi Yakobe wangulongo wuli kuti wenga wamampha mtima chinanga kuti Labani wangumuchitiya uryarya, nanga venivi vititisambizanji? (Chiya. 25:27; 29:26-28; Mate. 5:37)

    Kumbi vo Yakobe wanguchita vilongo wuli kupambana kwa chanju cheneku ndi kutoleka waka mtima? (Chiya. 29:18, 20, 30; Sumu ya. 8:6)

    Kumbi mbanthukazi anayi naŵa wo anguzija m’nyumba yaku Yakobe, wo pavuli paki wanguzibalilana nawu ŵana anthurumi? (Chiya. 29:23, 24, 28, 29)