Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 16: Yisaki Wato Munthukazi Wamampha

Nkhani 16: Yisaki Wato Munthukazi Wamampha

KUMBI wamuziŵa munthukazi yo wawoneka pachithuthuzi ichi? Zina laki ndi Rebeka. Ndipu munthurumi yo watuza kuzikumana nayu ndi Yisaki. Rebeka waŵengi muwoli waku Yisaki. Kumbi ivi vinguchitika wuli?

Abrahamu wakhumbanga kuti wamusaniriyi munthukazi wamampha mwana waki Yisaki. Iyu wakhumbanga cha kuti Yisaki wato munthukazi wa mu Kanani, chifukwa chakuti ŵanthu a ku Kanani asopanga angoza. Sonu Abrahamu wangudana wanchitu waki ndipu wangumukambiya kuti: ‘Ndikhumba kuti iwi uluti kucharu cha abali ŵangu ku Harani ndipu ukamutore mwana wangu Yisaki munthukazi.’

Mwaviyo, wanchitu waku Abrahamu wanguto ngamila 10 ndipu wangwambapu ulendu waki. Wati wafika kufupi ndi kweniko abali ŵaku Abrahamu ajanga, wanguma dankha pachisimi. Iyi yenga nyengu ya kumazulu, yeniyo anthukazi a mu msumba wo azineŵanga maji pachisimi. Wanchitu waku Abrahamu wanguromba kwaku Yehova ndipu wanguti: ‘Sono mwali mweniyo wandipaskengi maji ndi kumweska so ngamila, ndiyu waŵi mweniyo imwe mwasankha kuja muwoli waku Yisaki.’

Rebeka wakumana ndi Yisaki

Pambula kuswela, Rebeka wanguza kuzineŵa maji. Ndipu wanchitu waku Abrahamu wati wamupempha maji, wangumupaska. Iyu wanguneŵa so nganyaki ndi kupaska ngamila zosi chifukwa zenga ndi nyota. Iyi yenga nchitu yikulu ukongwa chifukwa ngamila zitumwa maji nganandi ukongwa.

Rebeka wati wamaliza kupaska maji ngamila, wanchitu waku Abrahamu wangumufumba zina la awiski. Ndipuso wangumupempha kuti wakagoni kunyumba kwawu. Ndipu Rebeka wanguti: ‘Nde mwana waku Betuele, ndipu malu ngakuti imwi mukagoni ngaliku.’ Ndipu wanchitu yo wanguziŵa kuti Betuele wenga mwana wa muku waki waku Abrahamu, Nahoro. Sonu iyu wangujikama ndipu wanguwonga Yehova pakumulongozga kwa abali ŵaku Abrahamu.

Usiku weniwo, wanchitu waku Abrahamu wangukambiya Betuele ndi mzichi waku Rebeka, Labani, chifukwa cho wanguziya. Ndipu wosi anguzomerezga kuti Rebeka waluti nayu, kuti wakatorani ndi Yisaki. Kumbi Rebeka wangumukanji ŵati amufumba? Iyu wanguti: ‘Ndilutengi.’ Ndipu mulenji waki, yiwu angukwera ngamila zawu ndikwamba ulendu wawu kuwere ku Kanani.

Yiwu angufika ndi mazulu. Ndipu Rebeka, wanguwona munthu wachiyenda m’munda. Munthu uyu wenga Yisaki, ndipu wangukondwa ukongwa wati wawona Rebeka. Yapa ndipu pajumpha waka vyaka vitatu kutuliya po anyina aku Yisaki a Sara, angufwiya. Panyengu iyi ndipu weche ndi chitima. Kweni Yisaki, wangumuyanja ukongwa Rebeka ndipu sonu wangwamba so kukondwa.

Chiyambo 24:1-67.



Mafumbu

  • Kumbi munthurumi ndi munthukazi wo ŵe pachithuthuzi mbayani?
  • Kumbi Abrahamu wanguchita wuli kuti wamusaniriyi munthukazi mwana waki, ndipu chenga chifukwa wuli?
  • Kumbi rombu la wanchitu waku Abrahamu lingumukika wuli?
  • Kumbi Rebeka wangumuka wuli ŵati amufumba kuti watorani ndi Yisaki?
  • Kumbi nchinthu wuli cho chinguchitiska kuti Yisaki wakondwi so?

Mafumbu ngakusazgiyapu

  • Ŵerenga Chiyambo 24:1-67.

    Kumbi Rebeka wangulongo kuti wenga ndi nkharu wuli wati wakumana ndi wanchitu waku Abrahamu pachisimi? (Chiya. 24:17-20; Ntha. 31:17, 31)

    Kumbi mazuŵa nganu Akhristu angasambiranji pa manozgeru nga nthengwa yaku Yisaki ngo Abrahamu wangunozga? (Chiya. 24:37, 38; 1 Ŵako. 7:39; 2 Ŵako. 6:14)

    Kumbi nchifukwa wuli titenele kusaniya nyengu yakulungulukiya nge po wanguchitiya Yisaki? (Chiya. 24:63; Sumu 77:12; Ŵafi. 4:8)