Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 15: Muwoli Waku Lote Wangulereska Kuvuli

Nkhani 15: Muwoli Waku Lote Wangulereska Kuvuli

KUMBI wamukumbuka Lote, mwana wa muku waki waku Abrahamu? Lote wanguluta pamoza ndi Abrahamu ku Kanani. Iyu ndi banja laki ajanga limoza ndi Abrahamu mu charu cha Kanani. Zuŵa linyaki, Abrahamu wangukambiya Lote kuti: ‘Malu ngakuti tijepu ndi viwetu vidu ngamana. Tiyi tipatukani. Asani ungaluta rwandi linyaki nani ndilutengi rwandi linyaki.’

Lote wanguchiwona dankha charu cho. Ndipu wanguwona chigaŵa chamampha cho chenga ndi maji kweniso uteka unandi wamampha kuti wangaryiskaku viŵetu vaki. Ichi chenga Chigaŵa cha Yordane. Mwaviyo, Lote wanguto banja laki ndi viwetu vaki kuchija navu kweniko. Ndipu pakumaliya paki anguzenga nyumba zawu mu msumba wa Sodomu.

Ŵanthu ŵa ku Sodomu ŵenga aheni ukongwa. Ndipu ivi vingumukondweska cha Lote, chifukwa iyu wenga munthu wamampha. Chiuta nayu wangukondwa navu cha. Pakumaliya paki, Chiuta wangutuma angelu ŵaŵi kuchimutcheŵeska Lote kuti Chiuta wanangengi msumba wa Sodomu ndi Gomora chifukwa cha vinthu viheni vo ŵanthu achitanga.

Angelu angukambiya Lote kuti: ‘Yendeska! Uto muwoli waku ndi ŵana ŵaku anthukazi ŵaŵi mutuwemu munu.’ Lote ndi banja laki asweranga kutuwa, ndipu angelu anguŵako pajanja ndi kuŵatuzgiya kubwalu kwa msumba. Ndipu m’ngelu munyaki wanguti: ‘Thaŵani, pozomoskani umoyo winu! Mungalereskanga kuvuli cha. Thaŵiyani ku mapiri, mungafwa.’

Lote ndi ŵana ŵaki anguvwiya ndipu anguthaŵa kutuwa mu Sodomu. Yiwu kuti anguma pamwenga kulereska kuvuli so cha. Kweni muwoli waku Lote wanguvwiya cha. Ŵati ŵayendapu kamtunda kamanavi kutuwa mu Sodomu, muwoli waku Lote wangwamba kukumbuka vinthu vo angusiya mu Sodomu ndipu wanguma ndi kulereska kuvuli. Pavuli paki wangusambuka chiduli cha muche. Kumbi wamuwona pachithuthuzi ichi?

Kumbi tasambiranji m’nkhani iyi? Tasambira kuti Chiuta wapozomoska wo atimuvwiya, ndipu wo aleka kumuvwiya azamutaya umoyu wawu.

Chiyambo 13:5-13; 18:20-33; 19:1-29; Luka 17:28-32; 2 Petro 2:6-8.

Lote watuwa mu Sodomu


Mafumbu

  • Kumbi nchifukwa wuli Abrahamu ndi Lote angupatukana?
  • Kumbi nchifukwa wuli Lote wangusankha kuja mu Sodomu?
  • Kumbi ŵanthu ŵa ku Sodomu ŵenga ndi nkharu wuli?
  • Kumbi angelu ŵaŵi angumutcheŵeskanji Lote?
  • Kumbi nchifukwa wuli muwoli waku Lote wangusambuka chiduli cha muche?
  • Kumbi tisambiranji pa nkhani ya muwoli waku Lote?

Mafumbu ngakusazgiyapu

  • Ŵerenga Chiyambo 13:5-13.

    Kumbi tisambiranji kwaku Abrahamu pa nkhani yakumaliska mphindanu asani tayambana? (Chiya. 13:8, 9; Ŵaro. 12:10; Ŵafi. 2:3, 4)

  • Ŵerenga Chiyambo 18:20-33.

    Kumbi vo Yehova wanguchitiya Abrahamu, vititisimikizgiya wuli kuti Yehova ndi Yesu azamuyeruzga mwa urunji? (Chiya. 18:25, 26; Mate. 25:31-33)

  • Ŵerenga Chiyambo 19:1-29.

    Kumbi nkhani ya m’Bayibolo iyi yilongo kuti Chiuta watikuwona wuli kugonana kwa anthurumi pamwenga anthukazi ŵijaŵija? (Chiya. 19:5, 13; Ŵale. 20:13)

    Kumbi pe kupambana wuli pakati pa mo Lote ndi Abrahamu angulondere ulongozgi wakutuwa kwaku Chiuta ndipu isi tisambiranjipu? (Chiya. 19:15, 16, 19, 20; 22:3)

  • Ŵerenga Luka 17:28-32.

    Kumbi muwoli waku Lote waviwonanga wuli vinthu vakuliŵavu, ndipu ivi vitititcheŵeska wuli? (Luka 12:15; 17:31, 32; Mate. 6:19-21, 25)

  • Ŵerenga 2 Petro 2:6-8.

    Kumbi tingamulondo wuli Lote pa nkhani ya mo titenele kuwone ŵanthu aheni wo tija nawu? (Ezek. 9:4; 1 Yoha. 2:15-17)