Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 14: Chiuta Watesa Chigomezgu Chaku Abrahamu

Nkhani 14: Chiuta Watesa Chigomezgu Chaku Abrahamu

AWONA pa chithuthuzi ichi. Kumbi ŵanthu ŵaŵi wo ŵe penipo waŵaziŵa? Yo we ndi chimayi ku janja ndi Abrahamu ndipu mnyamata yo wagona pa nkhuni, ndi mwana waki. Kumbi nanga Abrahamu wakhumba kuchitanji? Iyu wawoneka nge kuti wakhumba kubaya mwana waki. Kumbi nchifukwa wuli iyu wakhumba kuchita viyo? Techendaziŵi chifukwa chaki, tiyi tiwoni dankha mo Abrahamu ndi Sara angusaniliya mwana uyu.

Abrahamu wapereka mwana waki sembi

Kumbuka kuti Chiuta wanguŵalayizga kuti ajengi ndi mwana munthurumi. Ivi vawonekanga kuti vingachitika cha chifukwa Abrahamu ndi Sara ŵenga akukota ukongwa. Kweni Abrahamu wenga ndi chigomezgu kuti Chiuta wachitengi vinthu vo vawonekanga kuti vingachitika cha. Sonu kumbi nchinthu wuli chinguchitika?

Chiuta wati waŵalayizga, pangujumpha chaka chimoza. Pavuli paki Abrahamu ndi Sara ŵenga ndi mwana munthurumi, zina laki Yisaki. Panyengu iyi, Abrahamu wenga ndi vyaka 100, ndipu Sara wenga ndi vyaka 90. Chiuta wangufiska nadi vo wangulayizga.

Kweni Yisaki wati wakuwa, Yehova wangwesa chigomezgu chaku Abrahamu. Iyu wangumudana ndipu wanguti: ‘Abrahamu!’ ndipu Abrahamu wangumuka kuti: ‘Nde pano!’ ndipu Chiuta wanguti: ‘Uto mwana waku yumoza pe, Yisaki, ndipu uluti ku phiri lo ndikukambiyengi. Kweniko ukamupereki sembi.’

Abrahamu wati wavwa mazu yanga, wanguchita chitima chifukwa wamuyanjanga ukongwa mwana waki. Kumbuka kuti Chiuta wangulayizga Abrahamu kuti ŵana ŵaki, azamuja m’charu cha Kanani. Kumbi ivi vatingi vichitikengi wuli asani Yisaki wangufwa? Chinanga wuli Abrahamu wanguziŵa cha chifukwa chaki, iyu wanguvwiya mbwenu Chiuta.

Wati wafika ku phiri, Abrahamu wangumanga Yisaki ndi kumuŵika pa guŵa lenilo iyu wangupanga. Ndipu wanguto chimayi kuti wabayi mwana waki. Kweni wati wato waka chimayi mungelu waku Chiuta wangudana Abrahamu, ndipu wanguti: ‘Abrahamu!, Abrahamu!’ Ndipu iyu wanguti: ‘Nde pano!’

Chiuta wanguti, ‘Leka kumubaya mwana yo chinanga nkhuchita nayu kanthu kanyaki kekosi. Sonu ndaziŵa kuti utindigomezga, chifukwa wandikanizga cha mwana waku, mwana waku yumoza pe.’

Abrahamu wenga ndi chigomezgu chikulu ukongwa mwaku Chiuta. Iyu wanguziŵa kuti palivi cho Yehova wangatondeka kuchita ndipuso kuti Yehova wazakumuyuska Yisaki. Kweni Chiuta wakhumbanga cha kuti Abrahamu wamubayi nadi Yisaki. Sonu Chiuta wangupangiska kuti mbereri yiwiri m’thundu lo lenga pafupi ndi po Abrahamu waperekiyanga sembi ndipu wangumukambiya kuti wayipereki sembi m’malu mwa mwana waki.

Chiyambo 21:1-7; 22:1-18.



Mafumbu

  • Kumbi Chiuta wangumulayizganji Abrahamu, ndipu Chiuta wangusunga wuli layizgu laki?
  • Nge mo palongole pachithuthuzi, kumbi Chiuta wanguyesa wuli chigomezgu chaku Abrahamu?
  • Kumbi Abrahamu wanguchitanji chinanga wuli iyu waziŵanga cha chifukwa cho Chiuta wangumukambiya kuti wabayi mwana waki?
  • Kumbi nchinthu wuli cho chinguchitika Abrahamu wati wato chimayi kuti wabayi mwana waki?
  • Kumbi chigomezgu chaku Abrahamu mwaku Chiuta chenga chikulu wuli?
  • Kumbi Chiuta wangumupaskanji Abrahamu kuti wapereki sembi, ndipu wanguchita wuli venivi?

Mafumbu ngakusazgiyapu

  • Ŵerenga Chiyambo 21:1-7.

    Kumbi nchifukwa wuli Abrahamu wanguduwa mwana waki pazuŵa la nambala 8? (Chiya. 17:10-12; 21:4)

  • Ŵerenga Chiyambo 22:1-18.

    Kumbi Yisaki wangulongo wuli kuti wavwiyanga awiski a Abrahamu, ndipu ivi vingupereka wuli chithuthuzi cha chinthu chakuzirwa ukongwa cho chinguzichitika kunthazi? (Chiya. 22:7-9; 1 Ŵako. 5:7; Ŵafi. 2:8, 9)