Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 13: Abrahamu Wenga Mubwezi Waku Chiuta

Nkhani 13: Abrahamu Wenga Mubwezi Waku Chiuta

ZANDI wati wamala ŵanthu anguluta kuchija ku Uru. Msumba uwu wenga wakukhupuka ndipu wenga ndi nyumba zamampha. Kweni ŵanthu wo ajanga mu msumba uwu, asopanga angoza. Ivi ndivuso achitanga ŵeche ku Babele. Kweni Nowa ndi mwana waki Semu angulutirizga kusopa Yehova, ndipu ŵenga akupambana ndi ŵanthu wo ajanga ku Uru kweniso ku Babele.

Nowa wangufwa pati pajumpha vyaka 350 kutuwa panyengu ya zandi. Nowa wati wafwa, pangujumpha waka vyaka viŵi ndipu wawangaku munthu yo utimuwona pachithuthuzi ichi. Iyu wenga munthu wapade ukongwa kwaku Chiuta. Zina laki lenga Abrahamu. Iyu ndi banja laki ajanga mu msumba wa Uru.

Abrahamu walereska nyenyezi

Zuŵa linyaki Yehova wangukambiya Abrahamu kuti: ‘Tuwa mu Uru ndi kwa abali ŵaku, uluti ku charu cho ndikulongongi.’ Kumbi Abrahamu wangumuvwiya Chiuta ndi kuleka vinthu vosi vamampha vo venga mu msumba wa Uru? Ee, wangumuvwiya. Chifukwa chakuti nyengu zosi wavwiyanga vo Chiuta wakambanga, Abrahamu wanguja mubwezi waku Chiuta.

Abrahamu wachituwaku ku Uru, wangutuwaku ndi abali ŵaki anyaki. Iyu wanguluta ndi muwoli waki Sara, awiski a Tera ndi Loti yo wenga mwana wa muku waki. Ndipu wosi anguchifika ku Harani kweniko Tera wangufwiya. Yiwu sonu ŵenga kutali ukongwa ndi ku Uru.

Pati paluta kanyengu kamanavi, Abrahamu ndi abali ŵaki angutuwaku ku Harani ndipu anguluta ku charu cha Kanani. Ndipu Yehova wangumukambiya kuti: ‘Charu ichi ndichu ndipaskengi ŵana ŵaku.’ Abrahamu wanguja m’charu cha Kanani ndipu iyu wajanga m’mahema.

Chiuta wangumovya Abrahamu ndipu wenga ndi mbereri zinandi ukongwa, viŵetu va mitundu yinyaki ndipuso wenga ndi anchitu anandi. Kweni Abrahamu ndi Sara ŵengavi mwana.

Abrahamu wati wakwaniska vyaka 99, Yehova wangumukambiya kuti: ‘Nditikulayizga kuti uŵengi uskewu wa mitundu yinandi.’ Panyengu iyi Abrahamu ndi Sara ŵenga akukota ukongwa mwakuti angabala ŵana so cha. Kumbi ivi vatingi vichitikengi wuli?

Chiyambo 11:27-32; 12:1-7; 17:1-8, 15-17; 18:9-19.



Mafumbu

  • Kumbi ŵanthu wo ŵajanga mu msumba wa Uru, ŵenga ndi nkharu wuli?
  • Kumbi munthu yo we pachithuthuzi yapa ndi yani, nanga wanguwaku zukwanji ndipu wajanga pani?
  • Kumbi Chiuta wangukambiya Abrahamu kuti wachitenji?
  • Nchifukwa wuli Abrahamu wangudanikanga kuti mubwezi waku Chiuta?
  • Kumbi Abrahamu wenga ndi yani wachituwa ku Uru?
  • Kumbi Chiuta wangumukambiyanji Abrahamu wati wafika m’charu cha Kanani?
  • Kumbi Chiuta wangumulayizganji Abrahamu panyengu yo wenga ndi vyaka 99?

Mafumbu ngakusazgiyapu

  • Ŵerenga Chiyambo 11:27-32.

    Kumbi Abrahamu wenga munewaki waku Lote? (Chiya. 11:27)

    Chinanga wuli Tera ndiyu wakambika kuti wanguluta ndi banja laki ku Kanani, kumbi tiziŵa wuli kuti Abrahamu ndiyu wenga mweneku wa ulendu uwu ndipu nchifukwa wuli wanguchita viyo? (Chiya. 11:31; Machi. 7:2-4)

  • Ŵerenga Chiyambo 12:1-7.

    Abrahamu wati wafika ku charu cha Kanani, kumbi Yehova wangusazgiyaku wuli phanganu lo wangupangana nayu? (Chiya. 3:15; 12:7; Ŵaga. 3:16)

  • Ŵerenga Chiyambo 17:1-8, 15-17.

    Kumbi zina laku Abramu lingusinthika wuli panyengu yo wenga ndi vyaka 99, ndipu chenga chifukwa wuli? (Chiya. 17:5)

    Kumbi ndi vitumbiku vakunthazi nivi vo Yehova wangulayizga Sara? (Chiya. 17:15, 16)

  • Ŵerenga Chiyambo 18:9-19.

    Kumbi lemba la Chiyambo 18:19, lilongo kuti ada ŵe ndi udindu wuli m’banja? (Mara. 6:6, 7; Ŵaefe. 6:4)

    Kumbi nchinthu wuli chingumuchitikiya Sara, cho chilongo kuti tingamubisa kanthu cha Yehova? (Chiya. 18:12, 15; Sumu 44:21)