Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 29: Chifukwa cho Mosese Wathaŵiya

Nkhani 29: Chifukwa cho Mosese Wathaŵiya

AWONA Mosese wathaŵa kutuwa ku Egipiti. Kumbi utiŵawona ŵanthu wo atimutchimbizga? Kumbi wachiziŵa chifukwa cho akhumba kumubayiya Mosese? Tiyi tiwoni.

Mosese wathaŵiya ku Egipiti

Mosese wangukuliya m’nyumba yaku Farao, fumu yaku Egipiti. Iyu wenga munthu wazeru kweniso wakuzirwa ukongwa. Mosese waziŵanga kuti iyu wenga wa ku Egipiti cha, kweni wenga mwana wa Ayisraele, wo ŵenga akapolu.

Wati wafika vyaka 40, zuŵa linyaki Mosese wanguŵanaŵana kuti waluti kuchiwona mo ŵanthu a mtundu waki ajaliyanga. Wanguchisaniya kuti asuzgikanga ukongwa. Iyu wanguwona munthu wa Chiegipiti wachipuma munthu wa Chiyisraele. Mosese wangulereska uku ndi uku, ndipu wati wawona kuti kwengavi weyosi yo wamuwonanga, iyu wangupuma munthu wa Chiegipiti mpaka kumubayiya penipo. Ndipu Mosese wangumuwundiya munthu yo mu mchenga.

Zuŵa linyaki, Mosese wanguluta so kuchiwona ŵanthu a mtundu waki. Iyu waŵanaŵananga kuti wakhoza kuŵawovya kuti angajanga akapolu so cha. Kweni wanguwona anthurumi ŵaŵi a Chiyisraele achipumana, ndipu Mosese wangufumba yo wenga wakunanga kuti: ‘Utimupumiyanji mubali waku?’

Munthu yo wangumuka kuti: ‘Ndiyani wakukuŵika kuti utilamuliyengi ndipuso kuti utiyeruzgengi? Kumbi ukhumba kundibaya nge mo ungubayiya mu Egipiti yuwa?’

Sonu Mosese wanguchita mantha. Iyu wanguziŵa kuti vo wanguchitiya munthu wa Chiegipiti yuwa vinguziŵika. Farao nayu wanguvwa vo Mosese wanguchita, ndipu wangutuma ŵanthu kuti akamubayi Mosese. Ichi ndichu chifukwa chaki Mosese wanguthaŵa kutuwa ku Egipiti.

Mosese wati watuwa ku Egipiti wanguluta ku charu cha Midiani. Wati wafika wanguchikumana ndi banja laku Yetero ndipu wangutorana ndi mwana waki zina laki Zipora. Mosese wenga muliska wa mbereri ndipu waliskanga mbereri za asibweni ŵaki a Yetero. Iyu wanguja m’charu cha Midiani vyaka 40. Ndipu Mosese wati wafika vyaka 80, zuŵa linyaki wachiliska mbereri zaku Yetero, panguchitika chinthu chinyaki chakuziziswa cho chingusintha umoyu waki wosi. Jura kuseri kuti uwoni chakuziziswa ichi.

Chituwa 2:11-25; Machitudu 7:22-29.



Mafumbu

  • Kumbi Mosese wangukuliya pani, ndipu nchinthu wuli cho iyu waziŵanga za apapi ŵaki?
  • Kumbi Mosese wanguchitanji wati wakwaniska vyaka 40?
  • Kumbi Mosese wangumukambiyanji munthu wa Chiyisraele yo wapumananga ndi munyaki, ndipu munthu yo wangumuka wuli?
  • Nchifukwa wuli Mosese wanguthaŵa ku Egipiti?
  • Kumbi Mosese wanguthaŵiya pani ndipu wanguchikumana ndi yani kweniko?
  • Kumbi Mosese wachitanganji pa vyaka 40 vo wangujaliya ku Midiani, wati wathaŵa ku Egipiti?

Mafumbu ngakusazgiyapu

  • Ŵerenga Chituwa 2:11-25.

    Chinanga kuti Mosese wanguja vyaka vinandi wachisambira zeru za ŵanthu a ku Egipiti, kumbi iyu wangulongo wuli kugomezgeka kwaku Yehova kweniso ku ŵanthu a mtundu waki? (Chitu. 2:11, 12; Ŵahe. 11:24)

  • Ŵerenga Machitidu 7:22-29.

    Kumbi isi tingasambiranji pa vo Mosese wangwesa kuchita kuti wafwatuwi yija Ayisraele ku ukapolu, ku Egipiti? (Machi. 7:23-25; 1 Pet. 5:6, 10)