Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 24: Yosefe Watesa Abali Ŵaki

Nkhani 24: Yosefe Watesa Abali Ŵaki

YOSEFE wakhumbanga kuwona asani abali ŵaki ŵeche ndi umoyu wambula lisungu kweniso wankhaza. Mwaviyo iyu wanguŵakambiya kuti: ‘Anganya imwi mwe azondi, mwaza kuziwona kuti ndinampha po charu chidu chilivi nthazi.’

Yiwu angumuka kuti: ‘Awa ndisi azondi cha, tikamba uneneska, isi tosi te ŵana ŵa munthu yumoza. Tengapu 12, kweni mvurwa widu yumoza wakufwa ndipu wakumaliya we kunyumba ndi ada.’

Kweni Yosefe wanguchita ngati watiŵagomezga cha. Ndipu wanguto muku waki Simeoni ndi kumuŵika m’jeri, kweni anyaki wosi wanguŵazomerezga kuto chakurya ndi kuluta nachu kwawu. Ndipu wanguŵakambiya kuti: ‘Po mwazamuziya so, mukazi ndi mvurwa winu wakumaliya.’

Ŵati afika kwawu ku Kanani, yiwu angukonkhoske awiskewu a Yakobe vosi vo vinguchitika. Yakobe wanguchita chitima ukongwa. Ndipu wangwamba kuliya kuti: ‘Yosefe wakufwa, ndipu sonu Simeoni nayu so wafwa. Ndikuzomerezgeningi cha sonu kuluta ndi mwana wangu wakumaliya Benjamini.’ Kweni chakurya chati chayamba kumala, Yakobe wanguŵazomerezga kuti aluti nayu Benjamini ku Egipiti kuti akaguli so chakurya.

Sonu Yosefe wanguwona kuti aku ŵaki atuza so. Iyu wenga wakukondwa ukongwa kuwona mvurwa waki Benjamini. Kweni pengavi weyosi yo wanguziŵa kuti munthu wakuzirwa uyu, wenga Yosefe. Sonu Yosefe wanguchita chinthu chinyaki kuti wayesi abali ŵaki 10.

Iyu wangukambiya anchitu ŵaki kuti azazi vakurya m’mathumba nga abali ŵaki. Kweni yiwu anguziŵa cha kuti waŵikamu so kapu yaki ya siliva m’thumba laku Benjamini. Ŵati anyamuka, angwenda mtunda umanavi waka, ndipu Yosefe wangutuma anchitu ŵaki kuti aŵalondo. Ŵati aŵasaniya, anguŵafumba kuti: ‘Nchifukwa wuli mwaba kapu yasiliva ya abwana ŵidu?’

Wosi angumuka kuti: ‘Taba kapu yawu cha isi. Yo wasanirikengi nayu, wabayiki.’

Sonu anchitu ŵa angwamba kupenja m’mathumba ngosi ndipu kapu yingusanirika m’thumba laku Benjamini, nge mo uwone pachithuthuzi yichi. Ndipu anchitu wo angukamba kuti: ‘Mosi mungaluta, kweni Benjamini tiwereriyengi nayu.’ Sonu kumbi aku ŵaki 10 ŵa, anguchita wuli?

Wosi anguwerere pamoza ndi Benjamini, kuluta kwaku Yosefe. Ndipu Yosefe wangukambiya aku ŵaki kuti: ‘Mosi mungaluta, kweni Benjamini wajengi kunu nge kapolu wangu.’

Sonu Yuda wangukamba kuti: ‘Asani ndingaluta kunyumba kwambula mwana uyu, ada amukufwa chifukwa atimuyanja ukongwa. Sonu chondi, toni ini kuti ndije kapolu winu kweni zomerezgani kuti mwana uyu waluti kunyumba.’

Sonu Yosefe wanguwona kuti aku ŵaki asintha. Yiwu akuleka umoyu uheni ndi wankhaza wo ŵenga nawu. Sonu tiyi tiwoni vo Yosefe wanguchita.

Chiyambo 42:9-38; 43:1-34; 44:1-34.

Aku ŵaki aku Yosefe ambika mlandu


Mafumbu

  • Nchifukwa wuli Yosefe wangukamba kuti abali ŵaki ŵenga azondi?
  • Kumbi nchifukwa wuli Yakobe wanguzomerezga kuti mwana waki wakumaliya Benjamini, waluti ku Egipiti?
  • Kumbi kapu yasiliva yaku Yosefe yingusanirika wuli mu thumba laku Benjamini?
  • Kumbi Yuda wangukambanji kuti Benjamini wafwatuliki?
  • Kumbi aku ŵaki aku Yosefe angusintha wuli?

Mafumbu ngakusazgiyapu

  • Ŵerenga Chiyambo 42:9-38.

    Kumbi mazu ngaku Yosefe ngo nge pa lemba la Chiyambo 42:18, nchikumbusu chamampha wuli kwaku wosi wo ŵe ndi udindu m’gulu laku Yehova mazuŵa nganu? (Nehe. 5:15; 2 Ŵako. 7:1, 2)

  • Ŵerenga Chiyambo 43:1-34.

    Chinanga wuli Rubene wenga mura, kumbi nchinthu wuli cho chilongo kuti Yuda ndiyu waŵeleŵetanga mumalu mwa aku ŵaki wosi? (Chiya. 43:3, 8, 9; 44:14, 18; 1 Miko. 5:2)

    Kumbi Yosefe, wanguŵayesa wuli abali ŵaki ndipu chenga chifukwa wuli? (Chiya. 43:33, 34)

  • Ŵerenga Chiyambo 44:1-34.

    Kumbi Yosefe wanguchita wuli kuti abali ŵaki aleki kumuziŵa? (Chiya. 44:5, 15; Ŵale. 19:26)

    Kumbi aku ŵaki aku Yosefe angulongo wuli kuti akuleka mtima wa sanji wo ŵenga nawu? (Chiya. 44:13, 33, 34)