Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 22: Yosefe Wanguŵikika M’jeri

Nkhani 22: Yosefe Wanguŵikika M’jeri

YOSEFE achimutole ku Egipiti ndipu we ndi vyaka 17. We kweniko, iyu angumuguliska ku munthu munyaki zina laki Potifara. Munthu uyu wenga nduna yaku Farao, fumu ya ku Egipiti.

Yesefe we m’jeri

Yosefe walimbikiyanga ukongwa kugwira nchitu kunyumba ya abwana ŵaki a Potifara. Sonu Yosefe wati wakuwa, Potifara wangumuŵika kuŵa mula wakuwonere nyumba yaki ndi vinthu vosi vo venga m’nyumba yaki. Nanga nchifukwa wuli Yosefe wasanirika m’jeri? Nchifukwa cha muwoli waku Potifara.

Yosefe wati wakuwa, wawonekanga mnyamata wakutowa ndipu muwoli waku Potifara wakhumbanga kugona nayu. Kweni Yosefe waziŵanga kuti nkhunanga ndipu wangukana. Mwaviyo, muwoli waku Potifara wangukwiya ukongwa. Sonu murumu waki wati waza kunyumba, wangumupusika ndipu wanguti: ‘Yosefe ndi muheni ukongwa, iyu wakhumbanga kugona nani.’ Potifara wangugomezga vo muwoli waki wangukamba, ndipu nayu wangumukwiyiya Yosefe. Ndipu wangumuŵika m’jeri.

Munthu yo wawoneriyanga akaidi wanguwona kuti Yosefe ndi munthu wamampha. Ndipu wangumuŵika kuja mula wakuwonere akaidi anyaki wosi. Nyengu yinyaki, Farao wangukwiyiya anchitu ŵaki ŵaŵi, wakubika ndi wakupereke vinyu ndipu wanguŵayika m’nyumba yakusungiyamu akaidi. Zuŵa linyaki usiku angulota malotu, kweni aziŵanga cha cho malotu ngo ngang’anamuwanga. Kwati kwacha, Yosefe wanguti: ‘Ndikambiyeni vo mwalota.’ Ŵati amukambiya Yosefe, Chiuta wangumovya kung’anamuliya malotu ngawu.

Kwaku yo waperekanga vinyu, Yosefe wangumukambiya kuti: ‘asani pajumpha mazuŵa ngatatu, utuwengi m’nyumba yaukaidi ndipu ukaweriyanga panchitu yaku.’ Sonu Yosefe wanguti, asani watuwa ukamukambiyi Farao zaku ini, ndipu undovyi kuti ndituzgiki m’nyumba yinu.’ Kweni kwa wakubika, Yosefe wanguti: ‘Asani pajumpha mazuŵa ngatatu, Farao wakudumuwengi mutu waku.’

Pazuŵa lachitatu vo wangukamba Yosefe vinguchitika nadi. Farao wangudumuwa nadi mutu waku yo wamubikiyanga. Kweni wakupereke vinyu wangutuwa ndipu wanguwere panchitu yaki. Iyu wanguluwa vosi vo Yosefe wangumukambiya. Ndipu wangumukambiya cha Farao zaku Yosefe, mwaviyo Yosefe wangulutirizga kuja muukaidi.

Chiyambo 39:1-23; 40:1-23.



Mafumbu

  • Kumbi Yosefe wenga ndi vyaka vilinga panyengu yo wangutoleke ku Egipiti, ndipu nchinthu wuli cho chinguchitika wati wafika kweniko?
  • Kumbi nchinthu wuli chinguchitika kuti Yosefe waŵikiki m’jeri?
  • Kumbi Yosefe wangupaskika udindu wuli m’jeri?
  • Panyengu yo wenga m’jeri, kumbi Yosefe wangumuchitiyanji munthu yo waperekiyanga vinyu kwaku Farao kweniso wakubika?
  • Kumbi nchinthu wuli cho chinguchitika wakupereke vinyu wati watuwa m’jeri?

Mafumbu ngakusazgiyapu

  • Ŵerenga Chiyambo 39:1-23.

    Kumbi nchinthu wuli cho chinguchitiska Yosefe kuti wathaŵi muwoli waku Potifara, chinanga wuli panyengu yo kwengavi malangu ngaku Chiuta ngakulembeka ngakukanizga ureŵi? (Chiya. 2:24; 20:3; 39:9)

  • Ŵerenga Chiyambo 40:1-23.

    Konkhoska mwakudumuwa malotu nga wakupereke vinyu, kweniso vo Yehova wangukambiya Yosefe kuti ndivu malotu yanga ngang’anamuwanga. (Chiya. 40:9-13)

    Kumbi wakubika wangulotanji, ndipu malotu ngo ngang’anamuwanganji? (Chiya. 40:16-19)

    Kumbi gulu la muŵanda wakugomezgeka ndi wakuwamu la mazuŵa nganu, lilondo wuli jalidu laku Yosefe? (Chiya. 40:8; Sumu 36:9; Yoha. 17:17; Machi. 17:2, 3)

    Kumbi lemba la Chiyambo 40:20 lilongo wuli mo Akhristu atenele kuwone maphwandu nga zuŵa lakuwiya? (Waku. 7:1; Marko 6:21-28)