Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 17: Ŵana Amuwoli Akupambana

Nkhani 17: Ŵana Amuwoli Akupambana
Esau

ANYAMATA ŵaŵi wo ŵe yapa mbakupambana ukongwa. Iwi utiŵawona wuli? Kumbi mazina ngawu utingaziŵa? Yo we ndi uta ndi Esau ndipu yo we ndi mbereri ndi Yakobe.

Esau ndi Yakobe ŵenga ŵana amuwoli ŵaku Yisaki ndi Rebeka. Awiskewu a Yisaki ayanjanga ukongwa Esau chifukwa wenga wakubaya nyama ndipu wazanga ndi chakurya panyumba. Kweni Rebeka wayanjanga ukongwa Yakobe, chifukwa wenga wakuzika ndipuso wambula ndewu.

Panyengu iyi, ambuyawu a Abrahamu ndipu ŵechendafwi. Tikhoza kuwona kuti Yakobe wayanjanga kuvwisiya ambuyaki achikamba zaku Yehova. Abrahamu wangufwa wendi vyaka 175, yapa ndipu ŵana amuwoli yaŵa ŵe ndi vyaka 15.

Esau wati wafika vyaka 40, wanguto anthukazi ŵaŵi a Chikanani. Kweni ivi vingukwiyiska Yisaki ndi Rebeka, chifukwa anthukazi yaŵa asopanga Yehova cha.

Zuŵa linyaki panguchitika chinthu chinyaki cho chinguchitiska kuti Esau wamukwiyiyi mvurwa waki. Panyengu yinyaki, Yisaki wakhumbanga kuti wapereki vitumbiku ku mwana waki mula. Sonu pakuti Esau wenga mula, ndiyu wenga wakwenele kulonde vitumbiku. Kweni yapa ndipu Esau waguliska kali ura waki, wo watingi umuchitiskengi kuti walonde vitumbiku. Kweniso panyengu yo anyamata yaŵa awangaku ndipu Chiuta wakamba kali kuti Yakobe ndiyu wazamulonde vitumbiku. Ndipu ivi ndivu vinguchitika nadi. Yisaki wangutumbika mwana waki Yakobe.

Yakobe

Pavuli paki, Esau wati waziŵa vo vinguchitika wangumukwiyiya mvurwa waki Yakobe. Iyu wangukwiya ukongwa mpaka wangukamba kuti wamubayengi. Rebeka wati waziŵa ivi, wangufipa mtima ukongwa. Ndipu wangukambiya murumu waki Yisaki kuti: ‘Vijengi umampha cha asani Yakobe nayu wangato yumoza wa anthukazi a munu mu Kanani.’

Pachifukwa ichi, Yisaki wangudana mwana waki Yakobe, ndi kumukambiya kuti: ‘Ungatonga yumoza wa anthukazi a munu mu Kanani cha. Kweni uluti kunyumba ya ambuyaku a Betuele, ku Harani. Ukatoku yumoza wa ŵana anthukazi a mwana wawu munthurumi, Labani.’

Yakobe wanguvwiya awiski ndipu nyengu yeniyo wangwamba ulendu wakuluta ku Harani, ko kwajanga abali ŵaki.

Chiyambo 25:5-11, 20-34, 35; 27:1-46; 28:1-5; Ŵahebere 12:16, 17.



Mafumbu

  • Kumbi Esau ndi Yakobe ŵenga ayani, nanga ŵenga akupambana wuli?
  • Kumbi Esau ndi Yakobe ŵenga ndi vyaka vilinga panyengu yo Abrahamu wangufwiya?
  • Kumbi Esau wanguchitanji cho chingukwiyisa ukongwa anyina ndi awiski?
  • Kumbi nchifukwa wuli Esau wangumukwiyiya ukongwa mubali waki Yakobe?
  • Kumbi ndi dangu wuli lo Yisaki wangupaska mwana waki Yakobe?

Mafumbu ngakusazgiyapu

  • Ŵerenga Chiyambo 25:5-11, 20-34.

    Kumbi Yehova wangukambiya limu vinthu wuli vakukwaskana ndi ŵana anthurumi ŵaŵi ŵaku Rebeka? (Chiya. 25:23)

    Kumbi penga mphambanu wuli pakati pa mo Esau ndi Yakobe awoniyanga nkhani ya ura? (Chiya. 25:31-34)

  • Ŵerenga Chiyambo 26:34, 35; 27:1-46; ndi 28:1-5.

    Kumbi Esau wangulongo wuli kuti watumbikanga cha vinthu vauzimu? (Chiya. 26:34, 35; 27:46)

    Kumbi Yisaki wangukambiya Yakobe kuti wachitenji kuti walonde vitumbiku vaku Chiuta? (Chiya. 28:1-4)

  • Ŵerenga Ŵahebere 12:16, 17.

    Kumbi vo Esau wanguchita vilongo wuli uheni wakunyoza vinthu vakupaturika?