Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 8: Vinkhara Pacharu

Nkhani 8: Vinkhara Pacharu

KUMBI ungachita wuli asani ungawona munthu mutali ukongwa kufika kuchanya kwa nyumba, watuza kufupi ndi iwi? Ukhoza kuchita mantha ukongwa. Panyengu yinyaki, pacharu chapasi penga vinkhara. Bayibolo likamba kuti awiskewu a ŵanthu yaŵa ŵenga angelu wo angutuwa kuchanya. Sonu kumbi vinguchitika wuli kuti angelu abali ŵana?

Vinkhara vachiwawa

Kumbuka kuti mungelu muheni Satana, ndiyu wachitiskanga masuzgu. Iyu wayesesanga kukopa angelu ŵaku Chiuta kuti achitengi vinthu viheni. Ndipu m’kuluta kwa nyengu, angelu anyaki angwamba kuvwiya Satana. Angelu yaŵa anguleka kuchita nchitu zo Chiuta wanguŵapaska kuchanya. Yiwu anguza pacharu chapasi ndipu angusintha maliŵavu ngawu kuja nge ŵanthu. Kumbi utichiziŵa chifukwa cho anguchitiya viyo?

Bayibolo likamba kuti ŵana ŵaku Chiuta yaŵa, anguwona anthukazi akutowa pacharu chapasi, ndipu akhumbanga kuja nawu. Pavuli paki, yiwu anguza pacharu ndi kutorana nawu nthengwa. Bayibolo likamba kuti angunanga ukongwa, chifukwa Chiuta wangupanga angelu kuti ajengi kuchanya.

Ŵana wo angelu yaŵa angubalirana ndi anthukazi wo anguto, apambananga ukongwa ndi ŵana anyaki wosi. Pakwamba ŵana yaŵa ayanananga ndi anyawu, kweni pavuli paki angwamba kukuwa ukongwa ndipuso ŵenga ŵanthazi ukongwa kuphara munthu weyosi.

Ŵanthu yaŵa ŵenga aheni ukongwa. Ndipu chifukwa chakuti ŵenga akhomi ndipuso anthazi ukongwa, yiwu apwetekanga ŵanthu. Ayesesanga kuchichizga ŵanthu kuti achitengi vinthu viheni nge yiwu.

Panyengu iyi, Enoke ndipu wafwa, kweni pacharu chapasi pengaso munthu yumoza yo wenga wamampha. Munthu uyu wenga Nowa. Nyengu zosi iyu wachitanga venivo Chiuta wakhumbanga.

Zuŵa linyaki Chiuta wangukambiya Nowa kuti, nyengu yakuti Iyu wanangi ŵanthu wosi aheni yafika. Kweni Chiuta watingi wapozomoskengi Nowa, banja laki kweniso nyama zinandi. Tiyi tiwoni mo Chiuta wanguŵapozomoske.

Chiyambo 6:1-8; Yuda 6.



Mafumbu

  • Kumbi nchinthu wuli cho chinguchitika angelu anyaki aku Chiuta ŵati avwiya Satana?
  • Kumbi nchifukwa wuli angelu anyaki anguleka nchitu yawu kuchanya ndi kuza pacharu?
  • Nchifukwa wuli kwenga kunanga kuti angelu ŵazi pacharu ndi kujipangiya maliŵavu ngaumunthu?
  • Kumbi ŵana ŵa angelu apambananga wuli ndi ŵana anyaki?
  • Nge mo uwone pachithuthuzi, kumbi ŵana yaŵa angwamba kuchitanji ŵati aja vinkhara?
  • Enoke wati wafwa, kumbi munthu wamampha yo wanguja pacharu wenga yani, ndipu nchifukwa wuli Chiuta wangumuyanja?

Mafumbu ngakusazgiyapu

  • Ŵerenga Chiyambo 6:1-8.

    Kumbi lemba la Chiyambo 6:6, lilongo wuli kuti vakuchita vidu vikhoza kukwiyisa Yehova? (Sumu 78:40, 41; Ntha. 27:11)

  • Ŵerenga Yuda 6.

    Kumbi angelu a m’mazuŵa ngaku Nowa wo ‘ŵengavi kusunga malu ngawu ngakwamba’ atitikumbuskanji mazuŵa nganu? (1 Ŵako. 3:5-9; 2 Pet. 2:9, 10)