Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 7: Munthu Wachiganga

Nkhani 7: Munthu Wachiganga
Enoke

ŴANTHU ŵati ayamba kwandana pacharu chapasi, anandi ŵaku yiwu achitanga vinthu viheni nge Kaini. Kweni penga munthu yumoza yo wenga wakupambana ndi anyaki wosi. Zina laki lenga Enoke. Iyu wenga munthu wachiganga. Ŵanthu wosi panyengu yo achitanga vinthu viheni ukongwa, kweni Enoke wanguleka cha kuteŵete Chiuta.

Kumbi utichiziŵa chifukwa cho ŵanthu achitiyanga vinthu viheni? Kumbi ukumbuka kuti ndi yani yo wanguchitiska kuti Adamu ndi Eva aleki kuvwiya Chiuta ndi kurya chipasu cho yiyu wanguŵakaniza? Wenga m’ngelu muheni. Bayibolo likamba kuti ndi Satana. Ndipu iyu wateseska kuti munthu weyosi waŵi muheni.

Munkhungu ndipuso wakubaya ŵanthu

Zuŵa linyaki, Yehova Chiuta wangutuma Enoke kuti wakakambiyi ŵanthu uthenga unyaki wo yiwu akhumbanga cha kuwuvwa. Uthenga uwu wenga wakuti: ‘Zuŵa linyaki Chiuta wazamubaya ŵanthu wosi aheni.’ Ŵanthu ŵati ŵavwa mazu yanga, angukwiya ukongwa mwakuti akhumbanga kumubaya Enoke. Yapa sonu Enoke wakhumbikanga kuti waje wambula mantha, kuti wakambiyi ŵanthu vo Chiuta wazamuchita.

Mwaviyo, Chiuta wanguwona kuti Enoke wangajanga ndi ŵanthu aheni yaŵa nyengu yitali cha. Enoke wanguja ndi umoyu vyaka 365 pe mbwenu. Nchifukwa wuli tikamba kuti “vyaka 365 pe”? Nchifukwa chakuti kali ŵanthu ŵenga ndi nthazi ukongwa kuphara mazuŵa nganu, ndipu ŵajanga ndi umoyu kwa nyengu yitali. Tikamba ivi, chifukwa chakuti mwana waku Enoke, zina laki Metusele, wanguja ndi umoyu kwa vyaka 969.

Ŵanthu achita vinthu viheni

Kweni Enoke wati wafwa, ŵanthu angulutirizga kuchita vinthu viheni kuphara pakwamba. Bayibolo likamba kuti m’nyengu iyi, ‘maŵanaŵanu ngosi nga ŵanthu ngenga ngaheni nyengu zosi, mwakuti charu chosi chinguzaza ndi chiwawa.’

Kumbi utichitiziŵa cho chinguchitiska kuti panyengu yo paŵi masuzgu nganandi viyo pacharu? Chenga chifukwa chakuti Satana wangusaniya nthowa yinyaki yakuchitiskiya ŵanthu kuti achitengi vinthu viheni. Tisambirengi ivi m’nkhani yapanthazi.

Chiyambo 5:21-24, 27; 6:5; Ŵahebere 11:5; Yuda 14, 15.



Mafumbu

  • Kumbi Enoke wapambananga wuli ndi ŵanthu anyaki wosi?
  • Kumbi nchifukwa wuli ŵanthu a m’nyengu yaku Enoke achitanga vinthu viheni vinandi?
  • Kumbi ndi vinthu viheni nivi vo ŵanthu achitanga? (Wona chithuthuzi.)
  • Kumbi nchifukwa wuli Enoke wakhumbikanga kuja wachiganga?
  • Kumbi ŵanthu kali ajanga ndi umoyu vyaka vilinga, nanga Enoke wanguja ndi umoyu vyaka vilinga?
  • Kumbi nchinthu wuli cho chinguchitika Enoke wati wafwa?

Mafumbu ngakusazgiyapu

  • Ŵerenga Chiyambo 5:21-24, 27.

    Kumbi Enoke wenga paubwezi wa mtundu wuli ndi Yehova? (Chiya. 5:24)

    Malinga ndi vo Bayibolo likamba, kumbi ndiyani yo wanguja ndi umoyu kwa vyaka vinandi pacharu kuphara munthu weyosi, ndipu wangufwa we ndi vyaka vilinga? (Chiya. 5:27)

  • Ŵerenga Chiyambo 6:5.

    Kumbi Enoke wati wafwa, uheni wenga wuli pacharu ndipu ivi vikozgana wuli ndi nyengu yidu yinu? (2 Timo. 3:13)

  • Ŵerenga Ŵahebere 11:5.

    Kumbi Enoke wenga ndi jalidu wuli lo ‘lingukondweska Chiuta,’ ndipu chakutuwapu chaki chenga chinthu wuli? (Chiya. 5:22)

  • Ŵerenga Yuda 14, 15.

    Kumbi Akhristu mazuŵa nganu angalondo wuli chiganga chaku Enoke pakutcheŵeska ŵanthu za nkhondu yo yituza ya Haramagedone? (2 Timo. 4:2; Ŵahebere 13:6)