Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 6: Mwana Wamampha Ndi Mwana Muheni

Nkhani 6: Mwana Wamampha Ndi Mwana Muheni

AWONA Kaini ndi Abelu. Yapa sonu ndipu wosi ŵakuwa. Kaini wayanjanga kulima. Iyu wapandanga mbewu zakupambanapambana nge vipasu ndi mphangwi.

Kaini ndi Abelu apereka sembi kwaku Chiuta

Abelu waŵetanga mbereri. Iyu wayanjanga kuphwere tiŵana ta mbereri. Tiŵana iti takuwanga mpaka kuŵa mbereri zikuluzikulu, mwakuti Abelu wenga ndi mskambu ukulu wa mbereri.

Zuŵa linyaki Kaini ndi Abelu angupereka sembi kwaku Chiuta. Kaini wangupereka vipasu va m’munda waki. Ndipu Abelu nayu wangupereka mbereri yamampha ukongwa pa mbereri zaki. Yehova wangukondwa ndi Abelu kweniso sembi yaki. Kweni wangukondwa cha ndi Kaini kweniso sembi yaki. Kumbi wachiziŵa chifukwa chaki?

Kuti chenga chifukwa chakuti sembi yaku Abelu yenga yamampha kuphara yaku Kaini cha. Kweni nchifukwa chakuti Abelu wenga munthu wamampha. Iyu wayanjanga Yehova ndi muku waki. Kweni Kaini wenga muheni mtima, iyu wamuyanjanga cha mvurwa waki.

Chiuta wangukambiya Kaini kuti watenele kusintha nkharu yaki. Kweni Kaini wanguvwiya cha. Iyu wangukwiya ukongwa chifukwa Chiuta wayanjanga ukongwa Abelu. Mwaviyo, Kaini wangumukambiya Abelu kuti, ‘Tiyi tiluti kumunda.’ Uku sonu ŵengaku ŵija ndipu Kaini wangumupuma ukongwa mvurwa waki Abelu mpaka kumubaya. Chenga chinthu chakofya ukongwa cho Kaini wanguchita.

Kaini wathaŵa pavuli pakubaya mvurwa waki

Chinanga wuli Abelu wakufwa, kweni Chiuta weche kumukumbuka. Abelu wenga munthu wamampha ndipu Yehova waluwa cha munthu wange uyu. Zuŵa linyaki Yehova Chiuta wazakumuyuska Abelu kuzija so ndi umoyu. Panyengu iyi, Abelu wazamukufwa so cha. Wazamuja ndi umoyu wamuyaya pacharu chapasi. Kumbi ungakondwa cha kuziziŵana ndi ŵanthu nge Abelu?

Chiuta wakondwa cha ndi ŵanthu aheni nge Kaini. Mwaviyo Kaini wati wabaya mvurwa waki, Chiuta wangumulanga mwa kumudikiskiya kutali, kuti wangajanga pafupi ndi abali ŵaki cha. Ndipu Kaini wachiluta wanguto mzichi waki yumoza ndipu wanguja muwoli waki.

M’kuluta kwa nyengu, Kaini ndi muwoli waki angwamba kubala ŵana. Ŵana anyaki ŵaku Adamu ndi Eva nawuso angutorana ndi kubala ŵana. Ndipu pacharu chapasi penga ŵanthu anandi. Tiyi tisambiri za anyaki mwa ŵanthu yaŵa.

Chiyambo 4:2-26; 1 Yohane 3:11, 12; Yohane 11:25.



Mafumbu

  • Kumbi Kaini ndi Abelu agwiranga nchitu wuli?
  • Kumbi ndi sembi wuli zo Kaini ndi Abelu angupereka kwaku Yehova?
  • Nchifukwa wuli Yehova wangukondwa ndi sembi yaku Abelu kuleka yaku Kaini?
  • Kumbi Kaini wenga ndi umoyu wamtundu wuli, ndipu Yehova wangumuwovya wuli kuti wasinthi?
  • Kumbi Kaini wanguchitanji nayu mvurwa waki po ŵenga kwaku ŵija?
  • Konkhoska vo vingumuchitikiya Kaini wati wabaya mvurwa waki.

Mafumbu ngakusazgiyapu

  • Ŵerenga Chiyambo 4:2-26.

    Kumbi Yehova wangukambanji za jalidu lakofya lo Kaini wenga nalu? (Chiya. 4:7)

    Kumbi Kaini wangulongo wuli vo venga mu mtima waki? (Chiya. 4:9)

    Kumbi Yehova watiŵawona wuli ŵanthu wo abaya anyawu? (Chiya. 4:10; Yes. 26:21)

  • Ŵerenga 1 Yohane 3:11, 12.

    Kumbi nchifukwa wuli Kaini wangukwiya ukongwa ndipu ivi vitititcheŵeska wuli mazuŵa nganu? (Chiya. 4:4, 5; Ntha. 14:30; 28:22)

    Kumbi Bayibolo lilongo wuli kuti tikhoza kuja akugomezgeka chinanga abali ŵidu wosi atisuski chifukwa chakuti tisopa Yehova? (Sumu 27:10; Mate. 10:21, 22)

  • Ŵerenga Yohane 11:25.

    Kumbi Yehova watitisimikizgiyanji za ŵanthu wosi wo akufwa chifukwa chakulondo urunji? (Yoha. 5:24)