Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 5: Kwamba Kwa Umoyu Wa Masuzgu

Nkhani 5: Kwamba Kwa Umoyu Wa Masuzgu

ADAMU ndi Eva angwamba kukumana ndi masuzgu nganandi, ŵati adikiskika m’munda wa Edene. Yiwu akhumbikanga kulimbikiya kugwira nchitu kuti asaniyi chakurya. M’malu mwakuti kume vimiti va vipasu vamampha, yiwu anguwona kuti kwamenga vimiti vamingaminga. Ivi ndivu vinguchitika Adamu ndi Eva ŵati aleka kuvwiya Chiuta, ndipu ubwezi wawu ndi Chiuta ungumaliya penipo.

Adamu wagwira nchitu mwanthazi ndi mwana waki

Kweni chinthu chiheni ukongwa chenga chakuti yiwu angwamba kutama, kukota ndipu pakumaliya paki angufwa. Kumbuka kuti Chiuta wanguŵatcheŵeska kuti asani angarya chipasu cha m’chimiti cho iyu wanguŵakaniza, mbwenu afwengi. Chenga chinthu chambula zeru ukongwa kuti yiwu aleki kuvwiya Chiuta.

Ŵana ŵaku Adamu ndi Eva angubalika Chiuta wati wadikiska apapi ŵawu m’munda wa Edene. Ivi vilongo kuti ŵana nawu angwenele kukota ndi kufwa.

Adamu ndi Eva atingi ajengi ndi umoyu wamampha ukongwa pamoza ndi ŵana ŵawu, asani yiwu anguvwiya Yehova. Yiwu atingi ajengi ndi umoyu walikondwa ndipuso wamuyaya pacharu chapasi. Pengavi yo watingi wakotengi, kutama ndi kufwa.

Adamu ndi Eva atingi ajengi ndi umoyu wamampha ukongwa pamoza ndi ŵana ŵawu, asani yiwu anguvwiya Yehova. Yiwu atingi ajengi ndi umoyu walikondwa ndipuso wamuyaya pacharu chapasi. Pengavi yo watingi wakotengi, kutama ndi kufwa.

Eva ndi ŵana ŵaki

Chiuta wakhumba kuti ŵanthu aje ndi umoyu wamuyaya ndipuso walikondwa. Ndipu Iyu walayizga kuti, zuŵa linyaki ivi vazamuchitika nadi. Kuti ndi charu pe cha cho chazamuja chakutowa, kweniso ŵanthu nawu azamuja ndi umoyu wambula matenda. Ŵanthu wosi pacharu azamuja paubwezi ndi weyosi kweniso ndi Chiuta.

Kweni Eva wenga so mubwezi waku Chiuta cha. Mwaviyo, posi po wabaliyanga ŵana, wasuzgikanga. Iyu wavwanga kuŵaŵa ukongwa pakubala. Kuleka kuvwiya Yehova kungumudaniya masuzgu nganandi ukongwa, akhumba nawi ungazomerezga. Asi viyo?

Chiyambo 3:16-23; 4:1, 2; Chivumbuzi 21:3, 4.



Mafumbu

  • Adamu ndi Eva angubala ŵana anandi anthurumi ndi anthukazi. Zina la mwana wawu wakwamba lenga Kaini ndipu wachiŵi wenga Abelu. Kumbi utichiziŵa cho chinguŵachitikiya?
  • Kumbi n’chinthu wuli chingwamba kuchitikiya Adamu ndi Eva ndipu chenga chifukwa wuli?
  • N’chifukwa wuli ŵana ŵaku Adamu ndi Eva angwenere kukota ndi kufwa?
  • Asani Adamu ndi Eva anguvwiya Yehova, kumbi umoyu wawu ndi wa ŵana ŵawu watingi uŵengi wuli?
  • Kumbi Eva wangukumana ndi masuzgu wuli chifukwa cha kuleka kuvwiya?
  • Zumbuwa mazina nga ŵana ŵaŵi akwamba aku Adamu ndi Eva.
  • Kumbi ŵana anyaki wo ŵe pachithuthuzi po mbayani?

Mafumbu ngakusazgiyapu

  • Ŵerenga Chiyambo 3:16-23 ndi 4:1, 2.

    Kumbi kutembeka kwa nyata kungukwaska wuli umoyu waku Adamu? (Chiya. 3:17-19; Ŵaro. 8:20, 22)

    Kumbi nchifukwa wuli zina lakuti Eva, lo ling’anamuwa kuti ‘Nyinawu wa Ŵamoyu Wosi,’ lenga lakwenele? (Chiya. 3:20)

    Kumbi Yehova wangulongo wuli kuti wanguchitiya lisungu Adamu ndi Eva ŵati ŵabuda? (Chiya. 3:7, 21)

  • Ŵerenga Chivumbuzi 21:3, 4.

    Kumbi ndi ‘vinthu vakali’ nivi vo ukhumba kuti vizituwepu?