Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 4: Chifukwa Cho Angudikiskikiya Mu Edene

Nkhani 4: Chifukwa Cho Angudikiskikiya Mu Edene

AWONA vo vichitika pachithuthuzi ichi. Adamu ndi Eva adikiskika mu munda wakutowa wa Edene. Kumbi wachiziŵa chifukwa chaki?

Adamu ndi Eva adikiskika mu munda wa Edene

Nchifukwa chakuti yiwu akuchita chinthu chiheni ukongwa. Ndipu sonu Yehova watiŵalanga. Kumbi chinthu chiheni cho Adamu ndi Eva anguchita utichiziŵa?

Yiwu anguchita chinthu cho Chiuta wanguŵakambiya kuti angachitanga cha. Chiuta wanguŵakambiya kuti angarya vipasu vinyaki vosi va m’munda. Kweni vipasu va m’chimiti chimoza angaryanga cha, chifukwa asani ŵarya afwengi. Vipasu va m’chimiti ichi venga vakuti yiwu angaryanga cha. Ndipu tosi tiziŵa kuti nkhunanga kuto chinthu chamweni kwambula kupempha. Sonu kumbi nchinthu wuli cho chinguchitika?

Zuŵa linyaki, Eva wenga yija m’munda ndipu njoka yingwamba kulongoro nayu. Ayivwa vo yingukamba. Yingumukambiya Eva kuti waryi chipasu cha m’chimiti cho Chiuta wanguŵakaniza kurya. Kweni po Yehova wangupanga njoka, wanguzipanga kuti zingalongoronga cha. Ichi chilongo kuti wengapu yo wanguchitiska kuti njoka yilongoro. Kumbi wenga yani?

Kuti wenga Adamu cha. Watenele kuti wenga yumoza wa ŵanthu wo Yehova wangupanga pakwamba, wechendapangi charu. Iyu wangupanga angelu, ndipu isi tingaŵawona cha. M’ngelu yumoza wenga wakujikuzga ukongwa. Iyu wangwamba kuŵanaŵana kuti nayu wangawusa nge Chiuta. Ndipu wakhumbanga kuti ŵanthu avwiyengi iyu m’malu mwakuvwiya Yehova. M’ngelu uyu ndiyu wanguchitiska kuti njoka yilongoro.

M’ngelu uyu wangumupusiska Eva. Wangumukambiya kuti asani warya chipasu cho wayananengi ndi Chiuta, ndipu Eva wanguvwana. Iyu wangurya chipasu chiya, Adamu nayuso wangurya. Adamu ndi Eva angutondeka kuvwiya Chiuta, ndichu chifukwa chaki iyu wanguŵadikiska m’munda wakutowa.

Kweni zuŵa linyaki Chiuta wazamuwoneseska kuti charu chosi chapasi wachitoweska nge mo wenge munda wa Edene. Kunthazi uku tisambirengi mwenimo iwi nawi mungawovye kuti charu chiŵi chakutowa. Sonu tiyi tiwoni dankha vo vinguchitikiya Adamu ndi Eva.

Chiyambo 2:16, 17; 3:1-13,24; Chivumbuzi 12:9.



Mafumbu

  • Kumbi nchinthu wuli chichitikiya Adamu ndi Eva pachithuthuzi ichi?
  • Kumbi nchifukwa wuli Yehova wanguŵalanga?
  • Kumbi njoka yingumukambiyanji Eva?
  • Ndiyani wanguchitiska kuti njoka yilongoro ndi Eva?
  • Kumbi nchifukwa wuli Adamu ndi Eva angudikiskika m’munda wa Edene?

Mafumbu ngakusazgiyapu

  • Ŵerenga Chiyambo 2:16, 17 ndi 3:1-13, 24.

    Kumbi fumbu lo njoka yingufumba Eva, lingulongo wuli kuti lenga lakususka Yehova? (Chiya. 3:1-5; 1 Yoha. 5:3)

    Kumbi vo Eva wanguchita vitititcheŵeska wuli? (Ŵafi. 4:8; Yako. 1:14, 15; 1 Yoha. 2:16)

    Kumbi Adamu ndi Eva angulongo wuli kuti angutondeka kuzomerezga vo angunanga? (Chiya. 3:12, 13)

    Kumbi nchifukwa wuli Yehova wanguŵika akerubi kuvuma kwa munda wa Edene? (Chiya. 3:24)

  • Ŵerenga Chivumbuzi 12:9.

    Kumbi Satana watesesa wuli kuchitiska ŵanthu kugarukiya muwusu waku Chiuta? (1 Yoha. 5:19)