Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 2: Munda wa Kutowa

Nkhani 2: Munda wa Kutowa

AWONA mo charu chiwoneke yapa. Chechosi chiwoneka kuti nchakutowa. Awona uteka, vimiti, maluŵa ndi nyama zosi. Kumbi ungalongo po pe njovu ndi nkharamu?

Vinyama mu munda wa Edene

Kumbi nchinthu wuli cho chinguchitika kuti paŵi munda wakutowa uwu? Tiyi tiwoni vo Chiuta wanguchita kuti watinozge charu.

Chakwamba, Chiuta wangupangiska kuti pacharu pame uteka. Ndipu wangupangaso vakume vakupambanapambana, vimiti vimanavimana ndi vikuluvikulu. Vinthu ivi vitovya kuti charu chiwonekengi chakutowa. Kweniso vimiti vinandi vititipaska chakurya chakunowa.

Pavuli paki, Chiuta wangupanga somba kuti zijengi m’maji ndipuso viyuni kuti viphururukengi m’chanya. Iyu wangupanga nyama zikuluzikulu ndi zimanazimana nge: Agalu, ambwiyawu ndi mahachi. Kumbi ndi nyama nizi zo iwi uziŵa? Kumbi titenele kukondwa cha kuti Chiuta wakutipangiya vinthu vosi ivi?

Pakumaliya, Chiuta wangupanga chigaŵa chinyaki cha charu kuŵa malu ngapade. Chigaŵa ichi wanguchidana kuti munda wa Edene. Wenga munda wamampha ukongwa. Chechosi cho chenga m’munda uwu chenga chakutowa. Ndipu Chiuta wakhumbanga kuti charu chosi chije chakutowa nge munda wenuwu.

Awona so chithuthuzi cha munda uwu. Kumbi utichiziŵa cho Chiuta wanguwona kuti mulivi? Tiyi tiwoni.

Chiyambo 1:11-25; 2:8,9



Mafumbu

  • Kumbi Chiuta wanguchinozga wuli charu kuti taŵanthu tijengemu?
  • Zumbuwa nyama zikuluzikulu zo Chiuta wangulenga. (Wona chithuthuzi.)
  • Kumbi nchifukwa wuli munda wa Edene wenga wapade?
  • Kumbi Chiuta wakhumbanga kuti charu chosi chije wuli?

Mafumbu ngakusazgiyapu

  • Ŵerenga Chiyambo 1:11-25.

    Kumbi Chiuta wangulenganji pazuŵa lachitatu lakulenge vinthu? (Chiya. 1:12)

    Kumbi nchinthu wuli cho chinguchitika pazuŵa lachinayi lakulenge vinthu? (Chiya. 1:16)

    Kumbi ndi nyama za mitundu wuli zo Chiuta wangulenga pazuŵa la nambala 5 ndi 6? (Chiya. 1:20, 21, 25)

  • Ŵerenga Chiyambo 2:8, 9.

    Kumbi Chiuta wangupanda vimiti viŵi vapade nivi m’munda wa Edene ndipu vamiyanganji?