Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 10: Zandi Mukulu

Nkhani 10: Zandi Mukulu

ŴANTHU wosi wo ŵenga kubwalu kwa chingaraŵa angusintha cha umoyu wawu. Yiwu agomezganga mbwenu cha kuti kuzengi Zandi. Panyengu iyi ndipu asekanga ukongwa kuphara pakwamba. Kweni pati pajumpha kanyengu kamanavi, anguleka kuseka.

Ŵanthu ndi nyama zo ze m’maji achita mantha

Mwamabuchibuchi, kungwamba kuwa chivuwa chikulu. Chivuwa ichi chadikanga nge mo ungadiliya maji ngo nge mu ndowu. Nowa waneneskanga nadi. Kweni yapa ndipu nyengu yamala kali kuti ŵanthu anyaki asele mu chingaraŵa, chifukwa chakuti Yehova wangujala pakhomu.

Pati pajumpha kanyengu kamanavi, madambu ngosi nganguzaza maji. Maji ngawonekanga nge misinji yikuluyikulu. Kweniso ngangubizga vimiti vosi, ngangugudubuwa vimya ndi vimiti vikuluvikulu, ndipuso kwavwikanga chiwawa cha kupopoma kwa maji. Ŵanthu wosi anguchita mantha. Yiwu angwesa kukwera m’mapiri. Yapa sonu ndipu angwamba kuŵanaŵana kuti mphanyi angumuvwiya Nowa ndi kusele nayu m’chingaraŵa khomu leche lakujulika. Kweni chenga chivuli.

Maji ngangulutiriya mbwenu kukwera. Vuwa yingulutirizga kuwa kwa mazuŵa 40 usiku ndi msana. Maji ngangukwela ukongwa mwakuti mapiri ngosi ngatali ukongwa ngangubila. Nge mo Chiuta wangukambiya, ŵanthu wosi wo ŵenga kubwalu kwa chigaraŵa angufwa pamoza ndi nyama zosi. Kweni wosi wo angusele m’chigaraŵa angupona.

Nowa ndi ŵana ŵaki anguchita umampha ukongwa kukhoma chingaraŵa. Maji nganguchinyamuliya muchanya ndipu chayandamanga. Zuŵa linyaki vuwa yati yakata kunguŵala lumwi. Zuŵa ili, kunguwoneka kwakutowa ukongwa. Charu chosi chapasi chinguzaza maji. Chinthu chija cho chawonekanga chenga chingaraŵa cho chayandamanga pamaji.

Chingaraŵa chiyanjama pa maji

Vinkhara vo vingubalika ndi angelu vingumala. Ndipu panyengu iyi pengavi wakuti wangapweteka ŵanthu. Vosi vingufwa pamoza ndi anyinawu kweniso ŵanthu wosi aheni. Sonu kumbi nchinthu wuli cho chinguchitikiya awiskewu?

Yiwu ŵenga ŵanthu chayiwu nge isi cha. Kweni ŵenga angelu wo angutuwa kuchanya kuzija pacharu chapasi nge ŵanthu. Panyengu yo kunguziya zandi, yiwu angufwa cha. Angusintha maliŵavu ngawu ndipu anguwere so kuchanya nge angelu. Kweni Chiuta wanguŵazomerezga so cha kuja pamoza ndi angelu ŵaki. Ndipu anguja angelu ŵaku Satana. M’Bayibolo adanika kuti mademoni pamwenga kuti mizimu yiheni.

Sonu Chiuta wanguputiska mphepu pacharu, ndipu maji ngangwamba kuphwa. Pati pajumpha myezi yinkhondi, chingaraŵa chingujarikika pachanya pa phiri. Pangujumpha mazuŵa nganandi, ndipu ŵanthu wo ŵenga m’chingaraŵa angwamba kuwona songu za mapiri kubwalu. Ndipu maji ngangulutirizga kuphwa.

Ndipu Nowa wangutuzga chiyuni cha chaholi m’chingaraŵa. Chaholi uyu waphururukanga ndi kuwere so ku chingaraŵa, chifukwa kubwalu kwengavi malu ngamampha ngakuti wabotepu. Nyengu yosi yo wenga kubwalu, chaholi uyu waphururukanga ndi kubota so pa chingaraŵa.

Nkhunda

Nowa wakhumbanga kuziŵa kuti panyaki maji ngaphwa nadi, sonu panyengu iyi, wangutuma chikupi kuti chiluti kubwalu kwa chingaraŵa. Kweni nachuso chinguwerere chifukwa kwengavi malu ngakuti chibotepu. Nowa wangutuma so chikupi ndipu chinguza ndi jani la chimiti cha olivi ku mulomu. Mwaviyo, Nowa wanguziŵa kuti maji ngosi ngaphwa. Nowa wanguchituma so kachitatu, ndipu chinguchisaniya malu ngakujapu.

Yapa sonu Chiuta wangukambiya Nowa kuti: ‘Tuwamu m’chingaraŵa, iwi, banja laku losi kweniso nyama zosi.’ Yiwu anguja m’chingaraŵa kujumpha chaka chimoza. Sonu awona likondwa lo yiwu ŵenga nalu kuti wosi pamoza atuliya so kubwalu ŵeche ndi umoyu.

Chiyambo 7:10-24; 8:1-17; 1 Petro 3:19, 20.



Mafumbu

  • Kumbi nchifukwa wuli pengavi munthu yo watingi waselengi m’chingaraŵa vuwa yati yayamba?
  • Kumbi Yehova wanguchitiska kuti vuwa yiwi kwa mazuŵa ngalinga ndipu maji ngangukwera kufika pani?
  • Kumbi nchinthu wuli chinguchitikiya chingaraŵa maji ngati ngayamba kuzaza charu chosi?
  • Kumbi vinkhara vingupozomoka pa Zandi, nanga nchinthu wuli chinguchitikiya awiskewu?
  • Kumbi chingaraŵa chinguchitanji pati pajumpha myezi yinkhondi?
  • Kumbi nchifukwa wuli Nowa wangutuzga chaholi m’chingaraŵa?
  • Kumbi Nowa wanguziŵa wuli kuti maji ngaphwa pacharu?
  • Kumbi Chiuta wangumukambiyanji Nowa wati waja m’chingaraŵa ndi banja laki kujumpha chaka chimoza?

Mafumbu ngakusazgiyapu

  • Ŵerenga Chiyambo 7:10-24.

    Kumbi vinthu vamoyu vingumala wuli pacharu? (Chiya. 7:23)

    Kumbi maji nga Zandi nganguphwa pati pajumpha mazuŵa ngalinga? (Chiya. 7:24)

  • Ŵerenga Chiyambo 8:1-17.

    Kumbi lemba la Chiyambo 8:17, lilongo wuli kuti khumbu laku Yehova la pakwamba la charu chapasi lechendasinthi? (Chiya. 1:22)

  • Ŵerenga 1 Pet. 3:19, 20.

    Kumbi angelu akugarukiya angulonde cheruzgu wuli ŵati awere kuchanya? (Yuda 6)

    Kumbi nkhani yaku Nowa ndi banja laki, yititovya wuli kuja ndi chigomezgu chakuti Yehova we ndi nthazi yakutaskiya ŵanthu ŵaki? (2 Pet. 2:9)