Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 1: Chiuta Watamba Kupanga Vinthu

Nkhani 1: Chiuta Watamba Kupanga Vinthu

VINTHU vosi vamampha vo tenavu vikutuliya kwaku Chiuta. Iyu wakupanga lumwi kuti msana kujengi ukweru ndipuso mwezi ndi nyenyezi, kuti vitimbulikiyengi usiku. Chiuta wakupanga charu kuti taŵanthu tijengemu.

Lumwi, mwezi ndi nyenyezi venga vakwamba cha kupangika ndi Chiuta. Kumbi utiviziŵa vo wangwamba kupanga? Chiuta wangwamba kupanga ŵanthu akuyanana ndi iyu. Ŵanthu yaŵa tingaŵawona cha, nge po tingaleke kuwone Chiuta. M’Bayibolo, ŵanthu yaŵa adanika kuti angelu. Chiuta wangupanga angelu kuti wajengi nawu kuchanya.

M’ngelu wakwamba yo Chiuta wangupanga wenga wakuzirwa ukongwa. Uyu wenga Mwana waki wakwamba ndipu wagwiranga nchitu limoza ndi Awiski. Iyu wangovya Chiuta pakupanga vinthu vinyaki vosi. Wangumovya so kupanga lumwi, mwezi, nyenyezi ndi charu chidu chapasi.

Kumbi panyengu iyi charu chapasi chawonekanga wuli? Pakwamba pacharu chapasi, pengavi munthu weyosi yo watingi wajengepu. Charu chosi chapasi chenga waka chinyanja chikulu, kweniso pengavi kanthu kekosi. Kweni khumbu laku Chiuta lenga lakuti ŵanthu ajengi pacharu chapasi. Mwaviyo, iyu wangwamba kutinozge vinthu. Kumbi iyu wanguchita wuli?

Pakwamba, charu chapasi chakhumbikanga ukweru. Mwaviyo, Chiuta wangupangiska kuti ukweru wa lumwi ufiki pacharu. Wanguwupanga kuti kuje usiku ndi msana. Pavuli paki Chiuta wanguchitiska kuti mtunda utumphuki pachanya pa maji.

Pakwamba mtunda uwu wengavi chinthu chechosi. Wawonekanga nge chithuthuzi cho uwona yapa. Wengavi chinanga ndi maluŵa, vimiti kweniso nyama. M’nyanja namuso mwengavi chinanga ndi somba yeyosi. Chiuta wenga ndi nchitu yikulu ukongwa kuti wapangi charu kuŵa chakwenele kujamu nyama ndi ŵanthu.

Yeremiya 10:12; Ŵakolose 1:15-17; Chiyambo 1:1-10.

Charu chambula kubala vipasu


Mafumbu

  • Kumbi vinthu vosi vamampha vikutuliya pani, ungakambapu chimoza cha vinthu ivi?
  • Kumbi chinthu chakwamba cho Chiuta wangulenga chenga chinthu wuli?
  • Kumbi nchifukwa wuli mungelu wakwamba wenga wapade?
  • Konkhoska mo charu chenge pakwamba. (Wona chithuthuzi.)
  • Kumbi Chiuta wanguchita wuli kuti wanozgi charu kuti chiŵi chakwenele kujamu nyama ndi ŵanthu?

Mafumbu ngakusazgiyapu

  • Ŵerenga Yeremiya 10:12.

    Kumbi vinthu vo Chiuta wakulenga vilongo mijalidu yaki niyi? (Yesa. 40:26; Ŵaro. 11:33)

  • Ŵerenga Ŵakolose 1:15-17.

    Kumbi Yesu wenga ndi nchitu wuli pakulenga vinthu ndipu isi titenele kumuwona wuli? (Ŵako. 1:15-17)

  • Ŵerenga Chiyambo 1:1-10.

    Kumbi ndiyani wakulenga charu? (Chiya. 1:1)

    Kumbi nchinthu wuli chinguchitika pazuŵa lakwamba lakulenge vinthu? (Chiya. 1:3-5)

    Konkhoska vo vinguchitika pazuŵa lachiŵi lakulenge vinthu. (Chiya. 1:7, 8)