Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 9: Nowa Wakhoma Chingaraŵa

Nkhani 9: Nowa Wakhoma Chingaraŵa
Ŵanthu aseka Nowa

NOWA wenga ndi munthukazi ndi ŵana anthurumi ŵatatu. Mazina nga ŵana ŵaki ngenga Shemu, Hamu ndi Yafete. Ndipu weyosi wenga ndi muwoli waki. Mwaviyo, m’banja laku Nowa mwenga ŵanthu 8.

Chiuta wangukambiya Nowa kuti wachiti nchitu yikulu yeniyo wenga wechendayichitepu. Wangumukambiya kuti wakhomi chingaraŵa chikulu. Chingaraŵa ichi chenga chikulu nge sitima, kweni chawonekanga nge chibokosi chitali kweniso chikulu ukongwa. Ndipu Chiuta wangukambiya Nowa kuti ‘wachipangi ndi vigaŵa vitatu vakuyerekana, chapasi, chapakati ndi chapachanya ndipuso kuti wayikemu vipinda.’ Vipinda vo venga vakuti ajemu Nowa ndi banja laki, nyama kweniso kuti asungemu vakurya.

Chiuta wangukambiya so Nowa kuti wamati phula chingaraŵa chosi kuti maji ngaleki kusele mukati. Ndipu Chiuta wanguti: ‘Ndinangengi charu chosi chapasi ndi maji nga zandi. Yosi yo walekengi kusele m’chingaraŵa wafwengi.’

Nowa ndi ŵana ŵaki anguvwiya Yehova, ndipu angwamba kukhoma chingaraŵa. Kweni ŵanthu anyaki aŵasekanga. Ndipu angulutirizga kuchita vinthu viheni. Nowa wachiŵakambiya vo Chiuta watingi wachitengi, pengavi yo wavwananga.

Banja laku Nowa lisereza nyama ndi vakurya mu chingaraŵa

Nchitu yakukhoma chingaraŵa yinguto nyengu yitali, chifukwa chenga chikulu ukongwa. Ndipu pati pajumpha vyaka vinandi, anguchimaliza. Sonu Chiuta wangukambiya Nowa kuti waselezgi nyama mu chingaraŵa. Wangumukambiya kuti nyama za mitundu yinyaki waziselezgengi ziŵi ziŵi, yinthurumi ndi yinthukazi. Kweni Chiuta wangukambiya Nowa kuti nyama za mitundu yinyaki waziselezgengi 7. Ndipu wangumukambiya so kuti waselezgi viyuni va mitundu yosi. Nowa wanguchita vosi vo Chiuta wangumukambiya.

Pakumaliya, Nowa wangusele m’chingaraŵa ndi banja laki losi. Ndipu Chiuta wangujala pakhomu. Nowa wangulindizga pamoza ndi banja laki losi. Ajiyeruzgiyi kuti nawi we m’chingaraŵa ndipu ulindizgiya nawu limoza. Kumbi watingi uŵanaŵanengi kuti zandi watingi wazengi nadi nge mo Chiuta wangukambiya?

Chiyambo 6:9-22; 7:1-9.



Mafumbu

  • Kumbi m’banja laku Nowa mwenga ŵanthu alinga, nanga ungazumbuwa mazina nga ŵana ŵaki anthurumi ŵatatu?
  • Kumbi ndi nchitu yikulu niyi yo Chiuta wangukambiya Nowa kuti wachiti ndipu chenga chifukwa wuli?
  • Kumbi ŵanthu anyaki achitanga wuli Nowa wachiŵakambiya za chingaraŵa?
  • Kumbi Chiuta wangukambiya Nowa kuti wachiti nazu wuli nyama?
  • Chiuta wati wajara pakhomu la chingaraŵa, kumbi Nowa ndi banja laki akhumbikanga kuchitanji?

Mafumbu ngakusazgiyapu

  • Ŵerenga Chiyambo 6:9-22.

    Kumbi nchinthu wuli chinguchitiska kuti Nowa waje muteŵeti wamampha waku Chiuta wawuneneska? (Chiya. 6:9, 22)

    Kumbi Yehova watichiwona wuli chiwawa, ndipu ivi vingatiwovya wuli kusankha masaza ngo tingaseŵe, vo tingaŵerenga ndipuso vo tingawonele? (Chiya. 6:11, 12; Sumu 11:5)

    Kumbi tingamuyezga wuli Nowa asani tilonde ulongozi kuziya m’gulu laku Yehova? (Chiya. 6:22; 1 Yoha. 5:3)

  • Ŵerenga Chiyambo 7:1-9.

    urunji Nowa nge murunji, yititiwovya wuli mazuŵa nganu? (Chiya. 7:1; Ntha. 10:16; Yesa. 26:7)