Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 3: Ŵanthu Ŵakwamba

Nkhani 3: Ŵanthu Ŵakwamba

KUMBI nchinthu wuli cho uwona kuti chasazgikiyapu pa chithuthuzi ichi? Ungawona kuti mbanthu. Ŵanthu yaŵa ndi munthurumi ndi munthukazi akwamba. Kumbi ndiyani wanguŵapanga? Ndi Chiuta. Kumbi zina laku Chiuta utiliziŵa? Ndi Yehova. Ndipu mazina nga ŵanthu yaŵa ndi Adamu ndi Eva.

Adam ndi Eva mu munda wa Edene

Kumbi Yehova Chiuta wangumupanga wuli Adamu? Iyu wanguto dongu ndi kuwumba liŵavu lamunthu lambula kalema. Pavuli paki, wangumuphutiya mvuchi m’mphunu zaki ndipu Adamu wanguŵa wamoyu

Yehova Chiuta wangumupaska nchitu Adamu. Wangumukambiya kuti wadani mazina nyama zosi. Adamu wakhumbikanga kuti waziwoneseski dankha nyama zosi kuti wazipaski umampha mazina ngakwenere. Adamu wachidana mazina nyama zo, wangwamba kuwona chinthu chinyaki. Kumbi wachiziŵa cho wanguwona?

Iyu wanguwona kuti nyama zosi zenga ziŵiziŵi. Kwenga njovu yinthurumi ndi yinthukazi, nkharamu yinthurumi ndi yinthukazi. Kweni Adamu wengavi munthukazi. Mwaviyo, Yehova wangumugoneska tulu tikulu Adamu ndipu wangutoku mbaŵala yaki yimoza yakurwandi. Yehova wangugwiriskiya nchitu mbaŵala yo, kupanga munthukazi yo wanguja muwoli waku Adamu.

Panyengu iyi, Adamu wangukondwa ukongwa. Eva nayu watenele kuti wangukondwa ukongwa kuja m’munda wakutowa uwu. Yapa sonu yiwu atingi abalengi ŵana ndi kuja pamoza mwalikondwa.

Khumbu laku Yehova lenga lakuti Adamu ndi Eva aje ndi umoyu wamuyaya. Iyu wakhumbanga kuti Adamu ndi Eva asambuski charu chosi kuŵa chakutowa nge munda wa Edene. Adamu ndi Eva atenele kuti angukondwa ukongwa kuti achitengi nchitu iyi. Kumbi iwi watingi ukondwengi kugwira nawu nchitu yakusambuska charu kuŵa munda wakutowa? Kweni likondwa laku Adamu ndi Eva lingulutiliya cha. Tiyi tiwoni chifukwa chaki.

Sumu 83:18; Chiyambo 1:26-31; 2:7-25.



Mafumbu

  • Kumbi chithuthuzi cha M’nkhani ya nambala 3 chipambana wuli ndi chithuthuzi cha M’nkhani ya nambala 2?
  • Kumbi ndiyani wangulenga munthu wakwamba, ndipu zina la munthu uyu lenga yani?
  • Kumbi Yehova wangumupaska nchitu wuli Adamu?
  • N’chifukwa wuli Yehova wangumugoneska tulu tikulu Adamu?
  • Kumbi Adamu ndi Eva atingi ajengi ndi umoyu mpaka zukwanji ndipu Yehova wanguŵapaska nchitu wuli?

Mafumbu ngakusazgiyapu

  • Ŵerenga Sumu 83:18. (NW)

    Kumbi zina laku Chiuta ndiyani, ndipu we ndi udindu wapade wuli pacharu chosi chapasi? (Yere. 16:21; Dan. 4:17)

  • Ŵerenga Chiyambo 1:26-31.

    Kumbi nchinthu wuli cho Chiuta wangumaliya kulenga pazuŵa la nambala 6, nanga chakulengeka ichi chapambananga wuli ndi nyama? (Chiya. 1:26)

    Kumbi Yehova wanguŵapaskanji ŵanthu, nanga nyama wanguzipaskanji? (Chiya. 1:30)

  • Ŵerenga Chiyambo 2:7-25.

    Kumbi Adamu wakhumbikanga kuchitanji kuti wadani mazina nyama zosi? (Chiya. 2:19)

    Kumbi lemba la Chiyambo 2:24, lititiwovya wuli kuziŵa mo Yehova wawone nthengwa, kupatukana ndi kupatana? (Mate. 19:4-6, 9)